Read NQAARIIT NE ROOG 2 Maad we 12 Bible Online

2 Maad we 12 - NQAARIIT NE ROOG bible

2 Maad we 12

¹Yowaas a refa o maad, ye ta jegna xa kiid ɓetaa ƭaq.

²No hiid o ɓetuu ɗikandeer ole no maat Yehu, a reeƭata o maad soo a maadoox xa kiid qarɓeen nahik kam Yeerusaleem. Ya um Sibiya a ne’’e, a gen Beer-Seeba.

³Yowaas a fi’a kaa faaxna na kid no Yaal oxe no ñoow o ñis um fop, yaam Yehoyada fee o saasadax yar’un.

⁴Kaa koy, a ñaang a sadaxand ake moocand’aand, too xeet fee a maad’a o ƥoxottaa teen sadax fa cuuraay.

⁵Yowaas a laya saasadax we yee: «Xaaliis fee keseena fop na ɓisiideel kam Mbind ne no Yaal oxe, ta ref xaaliis fee na bateer ale no wiin we mbaat fee na ɓoxoteel no fud o letu no Mbind ne no Yaal oxe,

⁶fat o saasadax oxuu refna a xotantin a xoox um no wiin waa ta andna, soo muu o kef a refna no Mbind ne, a xendandel teen.»

⁷Kaa koy, o hiid qarɓeen ƭik fo hiid o dadkandeer ole no maat Yowaas a soƥ’a saasadax we nqendandafulee xa kef axe no Mbind ne no Yaal oxe.

⁸Maaga, o maad Yowaas a xoyna a Yehoyada fee o saasadax o maak oxe fo saasadax lakas we fop, a lay a den ee: «Xar taxu boo fa ndiik nu nqendandee xa kef axe no Mbind ne no Yaal oxe? Me ta refna koy, nu njangankatee a qoox nuun xaaliis fee no we nu andna, ndaa fat a xendandtikel Mbind ne no Yaal oxe soom.»

⁹Saasadax we a yekoora yee ndaawitkatee xaaliis fee no wiin we, too topatooxkatee a qendand ale no Mbind ne no Yaal oxe.

¹⁰Maaga, Yehoyada fee o saasadax a waaƭa arka, a sex o gom took o afnir ole soo a diƈin paam o sadaxand ole, no saax o ñamaak ole no ndokand ne no Mbind ne no Yaal oxe. Saasadax we yetooxoogna no ndokand ne ngadin’e o yipaa kam arka neene xaaliis fee ɓisiidoogeena kam Mbind ne no Yaal oxe fop.

¹¹Mbanuu da nga’’ina yee xaaliis fee kam arka ne a maya, o piibind oxe no maad oxe fo o saasadax o maak oxe a nqoyooge, a yip xaaliis fee na xa saaku soo a eedin.

¹²Xaaliis feene a eed’ange boo a ƴut, a cooxooge we adooxanna calel ke no Mbind ne no Yaal oxe, soo weene a ndabid teen daadaaƴ we fo jaajal we no Mbind ne no Yaal oxe

¹³fo maamax we fo seesex we na ƥil ake. A mbaag’a itam o njik a qanq fo a ƥil a maak a mosu fo cike-jike lakas ke soxla’eena fop, ndax xa kef axe no Mbind ne no Yaal oxe a nqendandel.

¹⁴Xaaliis feene koy ɓisiid’eena no Mbind ne no Yaal oxe, jalanit’aand Mbind ne palka xaaliis mbaat capil mbaat xa toon xa biisir mbaat a luuƥ mbaat tig lakas kaa refna wurus mbaat xaaliis.

¹⁵Kaa rabditoogel soom jaajal we, soo a jiriiñooreel na nqendand ale no Mbind ne no Yaal oxe.

¹⁶We ndabdoogna jaajal we koy, ngaynaakoogaand, yaam wiin wooru a ndeeƭu.

¹⁷Xaaliis fee ɓisiidoogeena koy na seek ale na sadax fa nqendandoor fee fo fa mbaasnoor pakaad fee, yipoogaand kam arka ne, ndaa saasadax we njegoogun.

¹⁸No camaane kaaga, Hasa’el fee o maad Araam a gara a song teeru fee Gaat. A cinj ye ta jaɓuuna, a waajana a Yeerusaleem.

¹⁹Ndak fo ndak, Yowaas fee o maad Yudaa a fokata tig oo tig cegu njiriiñ ke fop, Yosafat, Yehoram fa Ahasiya we daan um ndeeƭna maad Yudaa fo ten fa xoox um a ƥoxot’ina o Yaal oxe. A xota itam wurus fee reeƭna na kamba le no Mbind ne no Yaal oxe fa fee na kamba le no mbind no maad ne. Kaaga fop a ɓisaan a Hasa’el fee o maad Araam nen ci’it. Maaga, Hasa’el a xaƴa song le ta waajan’ina a Yeerusaleem.

²⁰Ke yoqna na pi ake Yowaas fop kaa mbindel no «Safe le no caloori ke no maad we Yudaa».

²¹Parɓa ke ten a ngiɓanaan o ngir, a mbartin Bet-Milo refna na pudnand alaa Sila.

²²Yosakar fee o ƥiy Sime’at fa Yosabad fee o ƥiy Someer we parɓa um o mat mbar’un. A gase me no daan um na ƥak ale Dawid, soo Amatsiya fee o ƥeem a rondandin.