Read NQAARIIT NE ROOG 2 Maad we 13 Bible Online

2 Maad we 13 - NQAARIIT NE ROOG bible

2 Maad we 13

¹No hiid qarɓeen ƭik fo hiid o dadkandeer ole no maat Yowaas fee o ƥiy Ahasiya kam Yudaa, Yehowahas fee o ƥiy Yehu reeƭatu o maad Isra’el. A maadooxa xa kiid xarɓaxay fo xa kiid ɓetaa ƭaq kam Samari.

²A fi’a kaa faaxeerna na kid no Yaal oxe soo a fi pakaad leng kut ke Yerobowam fee o ƥiy Nebat a bakaadnoortoogna xeet fee Isra’el, a fañ o waas.

³O Yaal oxe a fuuxana Ii-isra’el we, too kaa gen’u no ɓoxotaa a den na xa ƥay Hasa’el fee o maad Araam fo na xa ƥay Ben-Hadad fee o ƥeem.

⁴Yehowahas a xeɗooxa o Yaal oxe, soo ta nan-giloox a qeƭ um, yaam a ga ne o maad oxe Araam a toroxandtaa Ii-isra’el we.

⁵O Yaal oxe a lulta a den o baawat, ta wat a den na xa ƥay no Aa-araam we. No kaa xotitna maaga, Ii-isra’el we a ñoowoogata na jam nen eetaand.

⁶Kaa koy, mbaasee pakaad ke mbind Yerobowam a mbakaadnoortoogna xeet fee Isra’el. Den itam a soobooxa teen, a ndeefaa a ƭat aleene, too sax o daaƴ ole Asera a maad’a o sipeel kam Samari.

⁷Yehowahas koy, ŋaaŋaay pis qarɓeen ƥetik a yoqiɗ’u fo a sareet-xire xarɓaxay fo xiixire cuni xarɓaxay waa ñaaƴoogna. O maad oxe Araam kaa saŋik’u yoq waa fop, a fi a den da nand fo fo ut olaa na duuteel.

⁸Ke yoqna na pi ake Yehowahas fop fo njambaar ne ten kaa mbindel no «Safe le no caloori ke no maad we Isra’el».

⁹Yehowahas a daba daan um, a gasel kam Samari, soo o ƥeem Yehowas[5] a rondandin.

¹⁰No hiid qarɓeen tadik fo hiid o ɓetuu ɗikandeer ole no maat Yowaas kam Yudaa, Yehowas fee o ƥiy Yehowahas reeƭatu o maad Isra’el. A maadooxa xa kiid xarɓaxay fo xa kiid ɓetaa fo leng kam Samari.

¹¹A fi’a kaa faaxeerna na kid no Yaal oxe, too waas’ee fa leng no pakaad ke Yerobowam fee o ƥiy Nebat a bakaadnoortoogna xeet fee Isra’el, a reefaa a ƭat aleene.

¹²Ke yoqna na pi ake Yehowas fop fo njambaar ne ten fo ne ta xire’itna fa Amatsiya fee o maad Yudaa, keene fop kaa mbindel no «Safe le no caloori ke no maad we Isra’el».

¹³Yehowas a daba daan um, a gasel kam Samari paam maad we Isra’el, soo Yerobowam a rondandin.

¹⁴Ye Eliise a yenna jir le ñaamuuna, Yehowas fee o maad Isra’el a reta maa ten, a lool mbaambir um, a layin ee: «Faap es! Faap es! Wo hupu a sareet-xire ke fo pis ke Isra’el fop.»

¹⁵Eliise a layaan ee: «Jangi a qali fo a kas.» O maad oxe a janga a qali fo a kas.

¹⁶Cinj kaaga, Eliise a layahina o maad oxe Isra’el ee: «Ŋaayni a qali le!» Ye ta ŋaaynuuna, Eliise a doona xa ƥay um took xa ƥay axe no maad oxe, a layin ee:

¹⁷«Weti o falangteer ole farna fo batand», ta wetin. Eliise a layahinaan ee: «Xaƴi a kas!» Maaga, a xaƴa a kas, soo Eliise a layin ee: «Keene kaa ref a kas o ndam onqaa inoorna no Yaal oxe, a kas o ndam took no Aa-araam we. Xan o xawit Aa-araam we Afeq boo moocand a den.»

¹⁸Eliise a layahina o maad oxe yee: «Xoti a kas ake», soo ta xot a den. Eliise a layaan ee: «Xawi a den a lanq!» Maaga, a xawa a den a lanq boo a caf a tadak soo a geenoox.

¹⁹O kiin Roog oxe a fuuxanaan, a layin ee: «Waag’aa o xaw boo a caf a ƥetak mbaat ɓetaa fo leng, yaaga xawkoogaa Aa-araam we boo moocand a den. Ndiiki koy, a caf a tadak rek o xawkaa a den.»

²⁰Eliise a xona soo a gasel. O hiid oluu refna, a yaj no Moomowaab a njangaliidooga kam saax le Isra’el.

²¹Bes, waa ngaskoogna o qon a ƈooka a leng na yaj akaaga. Ndak fo ndak, a ndeɓa o dal olaa kam a mboy alaa Eliise soo a ƈuf. Ye o qon oxe a duqirna fo xa kiiƈ axe Eliise, a ñoowatina soo a inoox a geenoox.

²²Hasa’el fee o maad Araam kaa toroxandoogu Ii-isra’el we no ñoow o ñis Yehowahas fop.

²³Kaa koy, o Yaal oxe a yirma a den soo a waasan a den yaam ngiɓoor ne ta dalin’ina fa Abraham fa Isaak fa Yakoob. Bug’ee o moocand a den, too boo xaye deɓee a den maa goƭuuna.

²⁴Hasa’el fee o maad Araam a xona, soo Ben-Hadad fee o ƥeem a rondandin.

²⁵Yehowas fee o ƥiy Yehowahas a jangatina na Ben-Hadad fee o ƥiy Hasa’el teeru ke Hasa’el a jangit’ina na faap um Yehowahas yaa fa xire faa. Yehowas a xawaan a caf a tadak, a jangatin teeru ke Ii-isra’el we a njeg’ina.