Read NQAARIIT NE ROOG 2 Maad we 14 Bible Online

2 Maad we 14 - NQAARIIT NE ROOG bible

2 Maad we 14

¹No hiid o ɗikandeer ole no maat Yehowas fee o ƥiy Yehowahas kam Isra’el, Amatsiya fee o ƥiy Yowaas reeƭatu o maad Yudaa.

²Xa kiid qarɓeen ƭik fo xa kiid xa ƥetaq a jeg’u, ye ta sogna refaa o maad. A maadooxa xa kiid qarɓeen ƭik fo xa kiid ɓetaa nahaq kam Yeerusaleem. Ya um Yowadan a ne’’e, a gen Yeerusaleem.

³A fi’a kaa faaxna na kid no Yaal oxe, ndaa koy reftee nen o taan um Dawid. A fi’a leng kut ke faap um Yowaas a fi’na.

⁴Kaa koy, a ñaang a sadaxand ake moocand’aand, too xeet fee a maad’a o ƥoxottaa teen sadax fa cuuraay.

⁵Ye Amatsiya a saƭkandna maat um, a dalfooxa o war parɓa ke ten mbar’ina o maad Yowaas fee faap um.

⁶Kaa koy, warnoor’ee xa ƥiy axe no waawar weene, a reefandin no ke bindeena no safe le no kebil ke Moyiis, ne o Yaal oxe a heblituuna yee: «Paap ke mbarnoorkaand yaam xa ƥiy den, too xa ƥiy axe itam mbarnoorkaand yaam we ndimna a den, ndaa oxuu refna xan a warel yaam bakaad um.»

⁷Amatsiya a wara Ee-edoom cuni xarɓaxay na yulanq alaa no fo jem ole. Ye fa ñoq ale, a jaɓa teeru fee Sela, a ne’in Yoqteel, too gon leene a maadtu boo no ñaal roog ne xaye.

⁸Maaga, Amatsiya a lulta maa Yehowas fee o maad Isra’el, a ref o ƥiy Yehowahas fo o ndaan Yehu, ndax ta layanel o ten ee: «Gariidi i nqire!»

⁹Yehowas fee o maad Isra’el a naxooxa a Amatsiya fee o maad Yudaa yee: «Bes, ndakar-ñiig ne Libaŋ a lulta o layanel ndaxar seedar ne Libaŋ ee: ‹Ci’anaam o ƥiy onqe mi o ƥiy onqe wo o tew!› Kaa koy, ƥaaɓaan ke Libaŋ a ngara, a nduut ndakar-ñiig ne.

¹⁰Ke xawoona Ee-edoom we taxu o yoɗ a kand. Felakinooxi no ndam onqeene too moof no mbind of. Xar taxu boo o bug o rok na xire faa malkeeroonga, maa o yenitkaa, wo fo maat ne Yudaa fop?»

¹¹Kaa koy, a ƭat Amatsiya yong’ee no raagooxel olaaga. Maaga, Yehowas fee o maad Isra’el a jagandooxana xire, a gomrit fa Amatsiya fee o maad Yudaa Bet-Semes fee fogna na Yudaa.

¹²Ii-isra’el we a nqawa Yuuyudaa we boo oxuu refna a ƴuf no mbind um.

¹³Maaga Bet-Semes o mat Yehowas fee o maad Isra’el a damtu a Amatsiya fee o maad Yudaa too a ref o ƥiy Yowaas fo o ndaan Ahasiya. Cinj kaaga, a gara Yeerusaleem, a sex no saŋe ne o gur olaa o cigdel um a fi’na xa noonoong teemeed nahik, a xotit no Ndokand ne Efrayim boo no Ndokand naa no kooñ naa.

¹⁴Cinj kaaga, a janga wurus fee fa xaaliis fee fop fo tig oo tig ke fop ndeeƭna kam Mbind ne no Yaal oxe fo na kamba le no mbind no maad ne, a jangahin faɗ soo a nomtoox Samari.

¹⁵Ke yoqna na pi ake Yehowas fop fo njambaar ne ten fo ne ta xire’itna fa Amatsiya fee o maad Yudaa kaa mbindel no «Safe le no caloori ke no maad we Isra’el».

¹⁶Yehowas a daba daan um, a gasel Samari paam maad we Isra’el, soo Yerobowam fee o ƥeem a rondandin.

¹⁷Amatsiya fee o ƥiy Yowaas too a reeƭu o maad Yudaa a ñoow’a xa kiid xarɓaxay fo xa kiid xa ƥetaq a cinj fa nqon fee Yehowas fee o ƥiy Yehowahas reeƭna o maad Isra’el.

¹⁸Ke yoqna na pi ake Amatsiya kaa mbindel no «Safe le no caloori ke no maad we Yudaa».

¹⁹Amatsiya a hiɓante o ngir Yeerusaleem, a ƴuf Lakiis, ndaa a daabe soo a wartel maaga.

²⁰A doone took pis, a ɓisiidel Yeerusaleem soo a gasel me no daan um, na ƥak ale Dawid.

²¹Xeet fee Yudaa fop a njanga a Asariya[6] fee jeg’ina xa kiid xarɓaxay fo xa kiid ɓetaa fo leng, a ndalnin o maad ta rondand a Amatsiya fee faap um.

²²A cinj ye faap um a dabna daan um, Asariya a jangatina teeru fee Eylat, ta fogahin na Yudaa soo ta maxatinin.

²³No hiid xarɓaxay fo hiid o ɓetkandeer ole no maat Amatsiya fee o ƥiy Yowaas too a reeƭu o maad Yudaa, Yerobowam fee o ƥiy Yehowas reeƭatu o maad Isra’el. A maadooxa xa kiid qarɓeen nahik fo o hiid o leng kam Samari.

²⁴A fi’a kaa faaxeerna na kid no Yaal oxe, too waas’ee fa leng no pakaad ke Yerobowam fee o ƥiy Nebat a bakaadnoortoogna xeet fee Isra’el.

²⁵A jangatina xa piisel axe Ii-isra’el we a njeg’ina fop, ke xotitna no ndokand naa Hamat no ɓemb-roog o janoon boo no maag o Xanju laa no ɓemb-roog o ñamaak, ne o Yaal oxe Roog fee Isra’el a layit’uuna a reefandin no tuleer Yoona fee o tag um, refna o ƥiy Amitay, a gen Gaat-Hefeer.

²⁶O Yaal oxe kaa ga’’u o torox o ɗomu le no Ii-isra’el we. Jeg’atee o leng o leng oxaa ƴufgiidna a den.

²⁷Kaa koy, o Yaal oxe heboox’ee o moocand Ii-isra’el we. Ten taxu a mucla a den na pexey Yerobowam fee o ƥiy Yehowas.

²⁸Ke yoqna na pi ake Yerobowam fop fo njambaar um no qire ke ten fo ne ta nomtantiidna Ii-isra’el we teeru fee Damaas fa fee Hamat mbog’ina na Yudaa, kaa mbindel no «Safe le no caloori ke no maad we Isra’el».

²⁹Yerobowam a daba daan um, a gasel Samari[7] paam maad we Isra’el, soo Sakari fee o ƥeem a rondandin.