Read NQAARIIT NE ROOG 2 Maad we 15 Bible Online

2 Maad we 15 - NQAARIIT NE ROOG bible

2 Maad we 15

¹No hiid qarɓeen ƭik fo hiid o ɓetuu ɗikandeer ole no maat Yerobowam kam Isra’el, Asariya fee o ƥiy Amatsiya reeƭatu o maad Yudaa.

²Xa kiid xarɓaxay fo xa kiid ɓetaa fo leng a jeg’u, ye ta sogna refaa o maad. A maadooxa xa kiid qarɓeen ƥetik fo xa kiid xa ƭaq kam Yeerusaleem. Ya um Yekoliya a ne’’e, a gen Yeerusaleem.

³A fi’a kaa faaxna na kid no Yaal oxe, ne faap um Amatsiya a fi’it’uuna deŋ.

⁴Kaa koy, a ñaang a sadaxand ake moocand’aand, too xeet fee a maad’a o ƥoxottaa teen sadax fa cuuraay.

⁵O Yaal oxe a xawta o maad Asariya a tik a maak, too ten a refit’u boo neen a xonu. No mbind naa sayooxna a gen’atu, soo Yotaam fee o ƥeem adooxan’ina mbind no maad ne a ɗoxaa xeet fee no saax le.

⁶Ke yoqna na pi ake Asariya fop kaa mbindel no «Safe le no caloori ke no maad we Yudaa».

⁷Asariya a daba daan um, a gasel na ƥak ale Dawid, soo Yotaam fee o ƥeem a rondandin.

⁸No hiid qarɓeen tadik fo hiid o ɓetuu dadkandeer ole no maat Asariya kam Yudaa, Sakari fee o ƥiy Yerobowam reeƭatu o maad Isra’el. A maadooxa a qool ɓetaa fo leng kam Samari.

⁹A fi’a kaa faaxeerna na kid no Yaal oxe nen daan um, too waas’ee pakaad ke Yerobowam fee o ƥiy Nebat a bakaadnoortoogna xeet fee Isra’el.

¹⁰Saalum fee o ƥiy Yabes a hiɓanaan o ngir, a wartin Ible’aam[8] soo a jang maat naa.

¹¹Ke yoqna na pi ake Sakari kaa mbindel no «Safe le no caloori ke no maad we Isra’el».

¹²Neene, keeke o Yaal oxe a lay’ina a Yehu a fadnooxa: «Xan xa taan of a maadooxaa kam Isra’el boo no suk nahkandeer naa.»

¹³Saalum fee o ƥiy Yabes reeƭatu o maad Isra’el no hiid qarɓeen tadik fo hiid o ɓetuu nahkandeer ole no maat Usiya kam Yudaa. A maadooxa o nqool o leng kam Samari.

¹⁴Menahem fee o ƥiy Gaadi a inoora Tirsa, a gar Samari, a war a Saalum fee o ƥiy Yabes soo a jang maat naa.

¹⁵Ke yoqna na pi ake Saalum fo ne ta hiɓanitna a Sakari o ngir kaa mbindel no «Safe le no caloori ke no maad we Isra’el».

¹⁶Maaga, Menahem a songa teeru fee Tifsa, a saŋik we ngen’ina taaga fop, soo a raadin o jegel olaa widna maaga fop, a xotit Tirsa. A song’a teeru feene, yaam ne da mbañ’uuna o mbetan tokand ke, soo a xiir rew we ndeeƭna xa pud fop.

¹⁷No hiid qarɓeen tadik fo hiid o ɓetuu nahkandeer ole no maat Asariya kam Yudaa, Menahem fee o ƥiy Gaadi reeƭatu o maad Isra’el. A maadooxa xa kiid xarɓaxay kam Samari.

¹⁸A fi’a kaa faaxeerna na kid no Yaal oxe. No ñoow um fop kaa gen’u no fi’aa pakaad ke Yerobowam fee o ƥiy Nebat a bakaadnoortoogna xeet fee Isra’el.

¹⁹Tiglat-Pileseer[9] fee o maad oxe Asuur a roka no fiisel ole Isra’el. Maaga, Menahem a cooxaan ngap parig teemeed tadik fo parig qarɓeen nahik xaaliis fa nqoolu, ndax oxeene a dimle’in bo ta saƭkand maat um.

²⁰Xaaliis faaga fop Menahem a coox’ina o maad oxe Asuur, kaa xotit’un no yaal kalal ke Isra’el. Oxuu refna na den, a bateer um a reeƭa xa monjong qarɓeen ƥetik xaaliis fa nqoolu. Maaga, o maad oxe Asuur a sutooxa saax laa, a xot a ƭat um.

²¹Ke yoqna na pi ake Menahem fop kaa mbindel no «Safe le no caloori ke no maad we Isra’el».

²²Menahem a daba daan um, soo Peqahiya fee o ƥeem a rondandin.

²³No hiid qarɓeen ƥetkandeer ole no maat Asariya kam Yudaa, Peqahiya fee o ƥiy Menahem reeƭatu o maad Isra’el. A maadooxa xa kiid xa ƭaq kam Samari.

²⁴A fi’a kaa faaxeerna na kid no Yaal oxe, too waas’ee pakaad ke Yerobowam fee o ƥiy Nebat a bakaadnoortoogna xeet fee Isra’el.

²⁵Peqah fee o ƥiy Remaliya, too a reeƭu jawdiin Peqahiya, a hiɓanaan o ngir. A wartaan Samari na ndok-kam ale no mbind no maad ne, a war itam a Argob fa Ariye. Peqah kaa yoonit’u goor Gaagalaad qarɓeen ƥetik. Neene mat a wartu a Peqahiya soo a jang maat naa.

²⁶Ke yoqna na pi ake Peqahiya fop kaa mbindel no «Safe le no caloori ke no maad we Isra’el».

²⁷No hiid qarɓeen ƥetik fo hiid o ɗikandeer ole no maat Asariya kam Yudaa, Peqah fee o ƥiy Remaliya reeƭatu o maad Isra’el. A maadooxa xa kiid qarɓeen ƭik kam Samari.

²⁸A fi’a kaa faaxeerna na kid no Yaal oxe, too waas’ee pakaad ke Yerobowam fee o ƥiy Nebat a bakaadnoortoogna xeet fee Isra’el.

²⁹Na jamaane Peqah fee o maad Isra’el, Tiglat-Pileseer fee o maad oxe Asuur a gara, a jaɓ teeru fee Iyon, Abel-Bet-Maaka, Yanowah, Qedes, Hasoor, o jegel ole Galaad, ole Galile fo saax le Neftali fop. A ɓisa took a hup doole we ngen’ina meene fop kam Asuur.

³⁰Hoose fee o ƥiy Eela a hiɓana a Peqah fee o ƥiy Remaliya o ngir, a warin soo a jang maat naa. Keene kaa jopir’u fo hiid qarɓeen ƭikandeer ole no maat Yotaam fee o ƥiy Usiya kam Yudaa.

³¹Ke yoqna na pi ake Peqah fop kaa mbindel no «Safe le no caloori ke no maad we Isra’el».

³²No hiid o ɗikandeer ole no maat Peqah fee o ƥiy Remaliya kam Isra’el, Yotaam fee o ƥiy Usiya reeƭatu o maad Yudaa.

³³Xa kiid qarɓeen ƭik fo xa kiid xa ƥetaq a jeg’u ye ta sogna refaa o maad. A maadooxa xa kiid xarɓaxay fo xa kiid ɓetaa fo leng kam Yeerusaleem. Ya um Yerusa a ne’’e, a ref o ƥiy Saadok.

³⁴Yotaam a fi’a kaa faaxna na kid no Yaal oxe, ne faap um Usiya a fi’it’uuna deŋ.

³⁵Kaa koy, a ñaang a sadaxand ake moocand’aand, too xeet fee a maad’a o ƥoxottaa teen sadax fa cuuraay. Yotaam o mat max’u o don-maax took ole no Mbind ne no Yaal oxe.

³⁶Ke yoqna na pi ake Yotaam fop kaa mbindel no «Safe le no caloori ke no maad we Yudaa».

³⁷Na jamaane faaga, o Yaal oxe a hebliida a Resin fee o maad Araam fa Peqah fee o ƥiy Remaliya, da song saax le Yudaa.

³⁸Yotaam a daba daan um, a gasel na ƥak ale Dawid fee o taan um, soo Ahas fee o ƥeem a rondandin.