Read NQAARIIT NE ROOG 2 Maad we 16 Bible Online

2 Maad we 16 - NQAARIIT NE ROOG bible

2 Maad we 16

¹No hiid xarɓaxay fo hiid o ɓetuu ɗikandeer ole no maat Peqah fee o ƥiy Remaliya kam Isra’el, Ahas fee o ƥiy Yotaam reeƭatu o maad Yudaa.

²Xa kiid qarɓeen ƭik a jeg’u, ye ta sogna refaa o maad. A maadooxa xa kiid xarɓaxay fo xa kiid ɓetaa fo leng kam Yeerusaleem. Fi’ee kaa faaxna na kid no Yaal oxe Roog um, ta guutatir fo ne o taan um Dawid a fi’it’uuna.

³A reefa o jaf no maad we Isra’el boo sax a dox o ƥeem nen sadax, yaam a laalaa a pi a cednooxu ke no qeet ke o Yaal oxe a rax’ina mbaambir Ii-isra’el we.

⁴A ɓoxotta sadax fa cuuraay took a ñaang a sadaxand ake fo took a pimb ake fo yoora ndaxar saqtu nuu refna.

⁵Resin fee o maad Araam fa Peqah fee o ƥiy Remaliya, too a ref o maad Isra’el, a ngara ndax da nqire fo o maad Ahas. A mbida a Yeerusaleem o kurul-keƥ, ndaa mbaag’iran o nqaw.

⁶No camaane leng kut kaaga, Resin fee o maad Araam a ɓoxota Ee-edoom we teeru fee Eylat a cinj ye ta raxitna teen wiin we Yudaa. Ee-edoom we a nomtooxiida, a ngenahinaa teen boo no ñaal roog ne xaye.

⁷Ahas a dalfooxa o lul wiin maa Tiglat-Pileseer fee o maad oxe Asuur ee: «Kaam ref o tag of fo nen o ƥeef. Gari muclaam na xa ƥay no maad oxe Araam fo o maad oxe Isra’el songiidaxama.»

⁸Ahas a janga xaaliis fee fa wurus fee ndeeƭna kam Mbind ne no Yaal oxe fo na kamba le no mbind no maad ne, a lultin o maad oxe Asuur nen ci’it.

⁹O maad oxe Asuur a fi’a ke Ahas a lay’uuna, soo a ret a song teeru fee Damaas boo a jaɓin. We ngen’ina taaga, a ɓisa a den Kiir took o hup doole soo a warnoor a Resin.

¹⁰O maad Ahas a reta Damaas, a xetik maaga fa Tiglat-Pileseer fee o maad oxe Asuur. Ye ta ga’na o sadaxand ole reeƭna Damaas, a lulta a Uriya fee o saasadax nitaal ne fo samandaal naa yoqteerna dara no sadaxand ole.

¹¹Ye o maad Ahas a helkaa fo gat na tet ale ten Damaas, Uriya fee o saasadax oxe a jal’a o sadaxand olaa nandna fo ole ta lultiid’uuna.

¹²Ye o maad Ahas a inoorna Damaas a gat, a ga’a o sadaxand ole, a matiidin soo a ŋaay took faa.

¹³A ɓoxota teen sadax fa ndoxel um, sadax tuufe-duufe um fa sadax biiñ um soo a ɓax took o sadaxand ole fo’oy le no sadax camsa’oor ke ten.

¹⁴O sadaxand xanjar ole reeƭna mbaambir no Yaal oxe koy, a watnitaan na seek um ndeer o sadaxand o xas ole fo Mbind ne no Yaal oxe soo a ɓisin paam o sadaxand o xas ole, farna fo ɓemb-roog o janoon.

¹⁵O maad Ahas a hebla a Uriya fee o saasadax ee: «Fat o doxaa took o sadaxand o maak ole sadax fa ndoxel fee no nqes ne fo sadax tuufe-duufe ke no kirand ne fa sadax fa ndoxel fee fo sadax tuufe-duufe ke no maad oxe fo itam sadax fa ndoxel fee fo sadax tuufe-duufe ke fa sadax biiñ fee na xeet fee kam saax le fop. Fat o wiis teen fo’oy le no sadax toxel ke fo le no sadax lakas ke. O sadaxand xanjar ole koy, xam ɗeettaa teen.»

¹⁶Uriya fee o saasadax oxe a reefa fop ke o maad Ahas a hebil’uuna.

¹⁷O maad Ahas a daƈta a kiiƈ ake no tiƈir ke njiriiñooroogeena kam Mbind Roog ne soo a watin xa baaŋaan axe ndeeƭna took tiƈir keene. A watnita itam o waaŋaan o maak ole took qoox xanjar ke soo a diƈin took gas a ƥil.

¹⁸O maad oxe Asuur a tax’a ta watin kam Mbind ne no Yaal oxe ndaalaand ne no uum-maamaad le[10] max’eena teen fo ndokand tafil ne no maad oxe.

¹⁹Ke yoqna na pi ake Ahas fop kaa mbindel no «Safe le no caloori ke no maad we Yudaa».

²⁰Ahas a daba daan um, a gasel na ƥak ale Dawid, soo Hiskiya fee o ƥeem a rondandin.