Read NQAARIIT NE ROOG 2 Maad we 17 Bible Online

2 Maad we 17 - NQAARIIT NE ROOG bible

2 Maad we 17

¹No hiid xarɓaxay fo hiid o ɗikandeer ole no maat Ahas kam Yudaa, Hoose fee o ƥiy Eela reeƭatu o maad Isra’el. A maadooxa xa kiid ɓetaa nahaq kam Samari.

²A fi’a kaa faaxeerna na kid no Yaal oxe, ndaa koy reftee nen maad we Isra’el adoox’uuna.

³Salmanasaar fee o maad oxe Asuur a gara, a songin, soo Hoose a ɓoxotoox no ten, a rabdatan a bateer.

⁴Kaa koy, o maad oxe Asuur a yega yee Hoose kaa fexeyanoogun boo a lul wiin maa Soo[11] fee o maad Misira, too sax rabdoogatee o maad oxe Asuur a bateer. Maaga, o maad oxe Asuur a jengaan, a ɓekin kaso.

⁵Cinj kaaga, o maad oxe Asuur a janga saax le fop soo a gar a song a Samari, a widin o kurul-keƥ boo xa kiid xa tadaq.

⁶No hiid ɓetuu nahkandeer ole no maat Hoose, o maad oxe Asuur a jaɓa a Samari soo a ɓis Ii-isra’el we ngen’ina teen kam Asuur took o hup doole. A dalna a den no jegel olaa Halah fo paam a ƈufnand alaa Haboor no jegel olaa Gosaan fo kam teeru ke no saax laa Medi.

⁷Taamaala feene a dala Ii-isra’el we, yaam ne da mbakaad’ina no Yaal oxe Roog den. Ke o Yaal oxe a sut’ina a den no saax laa Misira, a wat a den na xa ƥay Firawon fee o maad Misira fop oo, yaqanee da mbaɗooxaa roog lakas.

⁸Ii-isra’el we kaa ndeefoogu fo mbaax ne no qeet ke o Yaal oxe a rax’ina mbaambir den fo fo mbaax ne maad we Isra’el a ndalin’ina.

⁹Ii-isra’el we kaa mbi’’u o Yaal oxe Roog den kaa naagaandeena o fi’aa. Kaa maxan’u a qoox den a ñaang a sadaxand kam teeru ke den fop, a xotit na xa yetooxand axe boo no teeru cegu saŋe ke.

¹⁰Kaa sip’u a ƥil a sexe fo xa taaƴ xa lupe xe Asera took ñaang jiig luu refna fo yoora ndaxar saqtu nuu refna.

¹¹A ndoxooga cuuraay na ñaang a sadaxand ake fop nen qeet ke o Yaal oxe a rax’ina mbaambir den. Neene a mbuuxnoorta o Yaal oxe a pi a paaxeer ake den.

¹²Kaa mbaɗooxoogu pangool ke, o Yaal oxe a lay’ina a den ee: «Nu mbi’kee keene.»

¹³O Yaal oxe a maƭoox’a we Isra’el fo we Yudaa na pexey duleer we ten fop fo ɗeet we ten fop ee: «Mbesyo a cinj a ƭat a paaxeer ake nuun, nanan kebil es fo bargal es, ndeef fop ke hebil’uuma daan nuun, daawnin a nuun na pexey duleer we dag es.»

¹⁴Kaa koy, nan-gilooxee, a saƭik a qoox, ne daan den we ngim’eerna no Yaal oxe Roog den a saƭkit’ina a qoox.

¹⁵Kaa ndeɓ bargal ke no Yaal oxe fo ngiɓoor ne ta dalin’ina fo daan we den fo a maƭax ake ta maƭoox’ina a den, a ndeefaa xa koɓong boo a ndefat xa koɓong. Kaa ngiɓoor’u fo qeet ke mbid’ina a den, ke o Yaal oxe a xañit’ina a den da laal a den fop oo.

¹⁶Kaa nqaƴ kebil ke no Yaal oxe Roog den fop, a njawan a qoox den nitaal fo nqeel fo ƭik, a sip xa taaƴ xa lupe xe Asera, a ngungaa mbaambir xa qoor axe na asamaan soo a mbaɗooxaa a Baal.

¹⁷Kaa ndoxoogu xa ƥiy xa koor axe fo xa tew axe den nen sadax, a ƭeetaa, a ñango’aa soo a njikoox a qoox den, ndax da mbi paaxeer na kid no Yaal oxe, a mbuuxnoorin.

¹⁸Maaga, o Yaal oxe a fuuxana Ii-isra’el we fuux ɗomu soo a deɓ a den maa goƭuuna. A carind ale Yudaa doŋ yoq’atu.

¹⁹Wiin we Yudaa sax ndeefoogee kebil ke no Yaal oxe Roog den. Kaa ndeefoogu fo mbaax fo leng kut ne wiin we Isra’el a ndeefoogna.

²⁰Ten taxu o Yaal oxe a deɓ xa taan axe Isra’el fop ne da mbodeena, a neewand a den soo a ɓoxot a den na xa ƥay no we njangaloogna a den boo a paf o deɓ a den maa goƭuuna.

²¹Ye o Yaal oxe a jaɓitna no mbind Dawid o fiisel ole Isra’el, wiin we Isra’el a ndalin’a a Yerobowam fee o ƥiy Nebat o maad. Yerobowam feene a fesnoora a den a cinj o Yaal oxe soo a bakaadnoor a den tigi.

²²No kaa xotitna maaga, Ii-isra’el we kaa njimboox’atu no pakaad ke Yerobowam a fi’’ina fop. Mbaas’ee a den

²³boo neen o Yaal oxe a deɓu a den maa goƭuuna, ne ta layit’uuna a reefandin no duleer we dag um. Neene, took o hup doole Ii-isra’el we a ƥise Asuur maa goƭna saax den, too maaga a maadu boo no ñaal roog ne xaye.

²⁴O maad oxe Asuur kaa ɓistiid’u wiin Babilon fa Kuta fa Awi fa Hamat fa Sefarwayim, ndax ta dalin a den no teeru ke Samari na seek no Ii-isra’el we. Wiin weene a njanga a Samari, a ngen no teeru ke ten.

²⁵Ye weene a sogna o ngenaa teen, mbaɗooxoogee o Yaal oxe. Maaga, o Yaal oxe a hebliida cogoy, da mbar jaaku na den.

²⁶O maad oxe Asuur a laye yee: «Qeet ke ɓisiidoona soo genniid a den no teeru ke Samari andee ne Roog fee no saax le a wareena o faɗoor. Ten taxu Roog feene a hebliid cogoy da mbaraa a den.»

²⁷Maaga, o maad oxe Asuur a heblita yee: «Ƥisyo maaga o leng no saasadax we nu ƥistiid’ina no saax laaga. Fat a genik maaga soo a jangin a den ne Roog fee no saax le a wareena o faɗoor.»

²⁸O leng no saasadax we ƥistiid’eena Samari a nomtooxa, a genik Betel soo a jangnaa a den ne da mbarna o mbaɗooraa o Yaal oxe.

²⁹Kaa koy, fuu refna no qeet ke kaa mbi’’u roog den, a ƥekin kam pind ke na ñaang a sadaxand ake Saasamari we a max’ina. Qeet ke no teeru ke Samari fop a mbi’a keene.

³⁰Wiin we Babilon a mbi’a nitaal Sukot-Benot fee roog den, wiin we Kuta a mbi a Nergal, we Hamat a mbi a Asima,

³¹we Awi a mbi a Nibaas fa Tartak, soo we Sefarwayim o mat a ndoxaa xa ƥiy den tee kaa ƥoxotaa sadax a Adaramelek fa Anamelek we roog den.

³²Yaqanee koy, a mbaɗooxooga itam o Yaal oxe. Kaa njil’u wiin a ndeer den, da ndef saasadax no pind ke na ñaang a sadaxand ake, a ƥoxotanaa a den teen sadax.

³³Neene, a mbaɗooxooga o Yaal oxe, a ndoon teen a mbaɗooxaa roog ke den, ne fo mbaax ne na saax ake da ƥis’eena took o hup doole a simtituuna.

³⁴Boo no ñaal ne xaye itam xa taan axe den kaa ndeefaa fo mbaax ne yaaga. Mbaɗooxee o Yaal oxe ne waritna, too naangee o ndeefaa bargal ke fo a paɗax ale da ndaawna. Ndeefee itam a cangin ale fo kebil ke o Yaal oxe a daawin’ina xa taan axe Yakoob fee ta ne’’atna Isra’el.

³⁵Yaag oo toox de, o Yaal oxe a dalin’a fa den ngiɓoor soo a hebil a den ee: «Ba nu mbaɗoox roog lakas, ba nu ngung mbaambir den, ba nu ndagoox a den, too ba nu ƥoxot a den sadax.

³⁶Mi o Yaal oxe doŋ nu mbaru o mbaɗoox, mi fee sutitna a nuun no saax laa Misira fa katil maak ne mi fo o ɓay o jegu doole le mi. Mbaambir es nu mbaru ngungaa soo ƥoxotaxam sadax.

³⁷Fat nu ngayaa too ndeefaa bes fuu refna ke simtuuma fo ke dalnuuma fo a cangin es fo kebil ke bindanuuma a nuun, too nu mbaɗooxkee roog lakas ke.

³⁸Ba nu mbeec ngiɓoor ne dalnuuma fa nuun, too ba nu mbaɗoox roog lakas ke.

³⁹Mi o Yaal oxe Roog nuun doŋ nu mbaru mbaɗoox, yaaga xam mucil a nuun na xa ƥay no fañ nuun fop.»

⁴⁰Wiin weene koy a mbañaan o nanan soo a ndeefaa fo mbaax fo eetaand ne den.

⁴¹Qeet keene kaa mbaɗooxoogu o Yaal oxe, a ndoon teen a mbaɗooxaa nitaal roog sexe ke den. Xa ƥiy den fo xa taan den kaa mbi’aa nen daan den boo no ñaal roog ne xaye.