Read NQAARIIT NE ROOG 2 Maad we 18 Bible Online

2 Maad we 18 - NQAARIIT NE ROOG bible

2 Maad we 18

¹No hiid o dadkandeer ole no maat Hoose fee o ƥiy Eela kam Isra’el, Hiskiya fee o ƥiy Ahas reeƭatu o maad Yudaa.

²Xa kiid qarɓeen ƭik fo xa kiid xa ƥetaq a jeg’u, ye ta sogna refaa o maad. A maadooxa xa kiid qarɓeen ƭik fo xa kiid ɓetaa nahaq kam Yeerusaleem. Ya um Abi a ne’’e, a ref o ƥiy Sakari.

³A fi’a kaa faaxna na kid no Yaal oxe, ne Dawid fee o taan um a fi’it’uuna.

⁴O ten o mat moocand’u a ñaang a sadaxand ake, a gef a ƥil a sexe ke soo a seɓ xa taaƴ xa lupe xe Asera. A duguña itam fangool fa nqanjar fee Moyiis a xawin’ina, yaam boo na jamaane faaga Ii-isra’el we kaa maad’u o ndoxanaa sadax cuuraay a fangool fa nqanjar feene da nqoyoogna Nehustan.

⁵A hooloox’a o Yaal oxe Roog fee Isra’el, too no maad we Yudaa fop ngarna a cinj um mbaat we adooxuuna, jeg’ee oxaa nandna fo ten.

⁶A damooxa no Yaal oxe, a fañ o waas, soo a gayaa kebil ke o Yaal oxe a coox’ina a Moyiis.

⁷O Yaal oxe a reeƭa fa Hiskiya, too fop um a ñaaƴooga. A siiknoor’a fo o maad oxe Asuur, a fañat o ɓoxotoox no ten.

⁸Ten xawu Fiifilista we, a jaɓ o fiisel ole den boo Gaasa, a xotit na xa yetooxand axe boo no teeru cegu saŋe ke.

⁹No hiid o nahkandeer ole no maat Hiskiya, fodirna fodir fo hiid o ɓetuu ɗikandeer ole no maat Hoose fee o ƥiy Eela kam Isra’el, Salmanasaar fee o maad oxe Asuur kaa song’u a Samari, a widin o kurul-keƥ.

¹⁰Teeru fee a jaɓ’e a cinj xa kiid xa tadaq, ta fodir fo hiid o ɓetuu fa lengandeer ole no maat Hiskiya fo hiid o ɓetuu nahkandeer ole no maat Hoose fee o maad Isra’el.

¹¹O maad oxe Asuur kaa ɓis’u Ii-isra’el we kam Asuur took o hup doole soo a dalin a den no jegel olaa Halah fo paam a ƈufnand alaa Haboor no jegel olaa Gosaan fo kam teeru ke no saax laa Medi.

¹²Keene fop a xew’a, yaam Ii-isra’el we nan-giloox’ee o ñuxur no Yaal oxe Roog den soo a ƭeg ngiɓoor ne ten. Nan-giloox’ee too ngay’ee ke Moyiis fee o tag no Yaal oxe a hebil’ina a den fop.

¹³No hiid xarɓaxay fo hiid o nahkandeer ole no maat Hiskiya, Sanxerib fee o maad oxe Asuur a songa teeru cegu saŋe ke Yudaa fop soo a jaɓ a den.

¹⁴Maaga, Hiskiya fee o maad Yudaa a lulta o layanel o maad oxe Asuur reeƭna na teeru faa Lakiis ee: «Mi tooñu! O xaƴangaa song ne, jaɓaam o rabid kuu sepaxamoona.» O maad oxe Asuur a sepa a Hiskiya fee o maad Yudaa ngap parig teemeed xaaliis fa nqoolu fo ngap parig xarɓaxay wurus.

¹⁵Hiskiya a cooxaan xaaliis fee fop reeƭna kam Mbind ne no Yaal oxe fo na kamba le no mbind no maad ne.

¹⁶Na jamaane faaga, Hiskiya a ɗapta wurus fee ta laar’ina no begax ke fo na tayil ake no Mbind ne no Yaal oxe, a ɓoxotin o maad oxe Asuur.

¹⁷O maad oxe Asuur a foda na teeru fee Lakiis, a lul Yeerusaleem maa no maad Hiskiya a buumi um fa farɓa fa maak fee ten fa jawdiin um, da yoon fo a yaj no xiixire maak. Ye da mbadiidna na teeru fee, a ndala paam a ƥaaxaand ale no mbalka-took ne na ƭat ale no qol ole no qaaxaaɗ oxe.

¹⁸A laamta, ndax da lay fo o maad oxe, ndaa Eliyakim fee o ƥiy Hilkiya too a ref o aa-adax oxe no mbind no maad ne a sutoora na teeru faa, a xetik fa den, a yoon fa Sebna fee o piibind oxe fa Yo’ax fee o keegeek cosaan oxe too a ref o ƥiy Asaf.

¹⁹Jawdiin fee a laya a den ee: «Ndetyo ndaawin a Hiskiya nduleer nene no maad o maak oxe refna o maad oxe Asuur na laamtan ee: ‹Xar refu a koolax aleene damlooxoona?

²⁰Foogaa moos ee fa lay fa ƥor a waaga o ref o as fa doole fa nqire’ir. Ndiiki koy, an hoolooxo boo saɗ o siiknoor fa mi?

²¹Andaam ee yaakaariro dara a refangeerna Misira, jaj ɓolooxu leene na dibaa boo a yul o ɓay no xuu damlooxna teen. Neene mat Firawon fee o maad Misira a nandu no fop we ngoolooxuuna.

²²Xeƈa xan nu ndoonaam ee: O Yaal oxe Roog in i ngoolooxu. Kaa koy, andum refee yee wo Hiskiya ñufu a ñaang a sadaxand ake ten fo xa sadaxand axe ten, ye hebloona wiin we Yudaa fo we Yeerusaleem da ngungaa mbaambir o sadaxand ole Yeerusaleem soom.›

²³Ndiiki koy, o yaal mbind of a jaɓangaa, fat a doon fo o yaal mbind es refna o maad oxe Asuur. Kaa ta layin ee: ‹Xam cooxong pis cuni ƭik, a soƥangaa yee waagaa o jeg ŋaaŋaay den.›

²⁴Nam a waagkoogu o raxit o aa-adax o leng no we moƴna o ngees no dag we no yaal mbind es? Andaam ee kaa doon a koolax um na Misira, ndax ta jeg a sareet-xire fo ŋaaŋaay pis.

²⁵Too sax, ndax kaa o yaal mbind es a fool-a-fool a song o mbiñ onqene, ndax ta gefin, too o Yaal oxe yoonee teen? O Yaal oxe fa xoox um layun ee: ‹Songi saax lene too gefin tuƈ.› »

²⁶Eliyakim fee o ƥiy Hilkiya fa Sebna fa Yo’ax a laya a jawdiin fee yee: «Ko ndeeg, layi fa in, in we dag of no ɗelem araam, yaam i nanaan, too fañ o lay fa in no ɗelem hebre no nof xeet fene ŋaayna no saŋe ne.»

²⁷Jawdiin fee a doona yee: «Ndax me no yaal mbind of fo me wo soom o yaal mbind es a luliidaxam, um lay xa ƭelem axeene? Ndax refee me no wiin wene moofna took saŋe ne itam na ñaamkaa ndiiki ñaaƈlax den soo a yer a seed den fa nuun took o ñak pexey?»

²⁸Cinj kaaga, jawdiin fee a leta soo a falaloox fa doole um fop no ɗelem hebre yee: «Nan-gilooxyo fa lay fee no maad o maak oxe refna o maad oxe Asuur.

²⁹Keeke o maad oxe a layu: ‹Baa Hiskiya a nax a nuun, yaam waagkee o mucil a nuun na xa ƥay es.

³⁰Baa ɓisloox a nuun bo nu njeg a koolax no Yaal oxe, yaa ta layna a nuun ee: A woora yee xan o Yaal oxe a mucil a in, too teeru fene ɓoxotkaand na xa ƥay no maad oxe Asuur.›

³¹Ba nu nan-giloox a Hiskiya, yaam keeke o maad oxe Asuur a layu: ‹Njamsa’ooryo fa mi, ƥoxotoox na mi, too yaaga oxuu refna na nuun xan a ñaamaa o rim ole na ƭing taxar biiñ um fo o rim ole no ndun um, a yeraa foofi mband um itam,

³²boo yaa um garkaa soo ɓis a nuun no saax laa nandna fo le nuun, no saax laa mayna bele fa biiñ, saax mayu ñaamel fo a ƭing taxar biiñ, saax mayu diwliin fo suum. Yaaga boog ke na taxkaa nu nqonaa mene, a taxa nu ñoowik maaga. Ba nu nan-giloox boog a Hiskiya, yaam kaa naxtaa a nuun ee: O Yaal oxe xan a mucil a in.

³³Ndax no roog ke na saax a lakas ake a jega teen faa mucilna saax um no ɓay no maad oxe Asuur?

³⁴Taa roog ke no teeru ke Hamat fa Arpad? Taa roog ke Sefarwayim, ke Hena fo ke Iwa? Ndax a mucla a Samari na xa ƥay es?

³⁵A ndeer roog ke na saax akeene fop, fum na den muclu saax um no ɓay es? Nam o Yaal oxe a waagkaa o muclit a Yeerusaleem no ɓay es boog?› »

³⁶Fop we ndeeƭna maaga a naanga cel too ndooniran o ɗelem o leng sax, yaam o maad oxe kaa heblit’u yee: «Ba nu ndoonin dara.»

³⁷Eliyakim fee o ƥiy Hilkiya too a ref o aa-adax oxe no mbind no maad ne fa Sebna fee o piibind oxe fa Yo’ax fee o keegeek cosaan oxe too a ref o ƥiy Asaf a mbaara toki den, a ngar me Hiskiya soo a ndaawnin xa ƭelem axe na jawdiin fee no maad oxe Asuur.