Read NQAARIIT NE ROOG 2 Maad we 2 Bible Online

2 Maad we 2 - NQAARIIT NE ROOG bible

2 Maad we 2

¹Ye o Yaal oxe a yoɗaa a Eliya na asamaan kam a saaqul, kaa soƥ’u ta inoor Gilgal, a yoon fa Eliise.

²Eliya a laya a Eliise yee: «Yoqi mene, yaam o Yaal oxe kaa lulaam taa Betel.» Eliise a doonaan ee: «Ne ta wooritna yee o Yaal oxe xe ñoowaa too woxey ñoowaa, neene a woortu yee xaƴkiroong.» Maaga, den ɗik fop a yoona Betel.

³Duleer Roog we ndeeƭna Betel a nqetooxiida a Eliise soo a layin ee: «Ndax andaa yee xaye o Yaal oxe a yoɗ o yaal mbind of na asamaan?» Eliise a doona a den ee: «Ii, andaanum, ndaa tiimyo rek!»

⁴Eliya a layahina a Eliise yee: «Yoqi mene, yaam o Yaal oxe kaa lulaam Yeriko.» A doonaan ee: «Ne ta wooritna yee o Yaal oxe xe ñoowaa too woxey ñoowaa, neene a woortu yee xaƴkiroong.» Maaga, den ɗik fop a yoona Yeriko.

⁵Duleer we ndeeƭna Yeriko a ngara me Eliise a layin ee: «Ndax andaa yee xaye o Yaal oxe a yoɗ o yaal mbind of na asamaan?» Eliise a doona a den ee: «Ii, andaanum, ndaa tiimyo rek!»

⁶Eliya a layahina a Eliise yee: «Yoqi mene, yaam o Yaal oxe kaa lulaam no xuluɓ olaa Yordaan.» Eliise a doonaan ee: «Ne ta wooritna yee o Yaal oxe xe ñoowaa too woxey ñoowaa, neene a woortu yee xaƴkiroong.» Maaga, den ɗik fop a nqotahina a ƭat.

⁷Goor qarɓeen ƥetik ndeer no duleer we a ngara boo a mbaambnooxiid a den soo a ngeenoox, ye Eliya fa Eliise a ngeenooxna na ƥeeraamb alaa Yordaan.

⁸Maaga, Eliya a janga sabadoor ne ten, a monjin, a xawin no foofi le, soo foofi le a xaajoor. Den ɗik fop a nqaañaan, a ndak no beeru.

⁹Ye da nqaañna o maag olaa boo a ƈut, Eliya a laya a Eliise yee: «Xeɗaam ke bugoona um fi’anong boo o Yaal oxe a helko fo yoɗtaxam a paam of!» Eliise a doonaan ee: «Kaam xeɗang a las taaw[1] no yiif no tuleer le refna na wo.»

¹⁰Eliya a layaan ee: «Xeɗaa kaa ɗomeena o jeg. Kaa koy, boo ga’axamoona, yaa um yoɗteel a paam of, xan o jegin, ndaa o ga’angiraam, jegkino.»

¹¹Ye da maadna o ñaaƴaa, a layaa, a sareet fiɗel alaa humneena pis fiɗel a dalfooxa o gar, a xaaj a den. Maaga, Eliya a ŋaaya na asamaan kam a saaqul.

¹²Ye Eliise a ga’na keene, a refa no falalooxaa yee: «Faap es! Faap es! Wo hup’u a sareet-xire ke fo pis ke Isra’el fop.» Ye ta ga’ateeruuna, a dalfooxa o faar tikoorik ke ten ƭik.

¹³A gisa sabadoor ne Eliya a xaƴ’ina ta sam. Cinj kaaga, a nomtooxa na ƥeeraamb alaa Yordaan soo a geenoox maaga.

¹⁴A xawta foofi le sabadoor ne Eliya a xaƴ’ina ta sam, soo a lay ee: «Taa o Yaal oxe Roog fee Eliya, ten oo?» Ten itam a xawa foofi le, ta xaajoox, soo ta xaañ.

¹⁵Duleer we inoortiid’ina Yeriko a nga’aan soo a lay ee: «Yiif no tuleer le reeƭna na Eliya a fudooxa took Eliise.» A nqetiida fo ten, a ngung a lanq mbaambir um.

¹⁶A layaan ee: «Ga’angi, a jega mene a ndeer no dag of goor qarɓeen ƥetik waa ndefna cambaar. Fat i lul a den, da mbaaƭik o yaal mbind of. Xeƈa Yiif le no Yaal oxe kaa gifin, a deɓkin no joong o leng mbaat na yulanq.» Eliise a doona a den ee: «Ba nu lul a den.»

¹⁷Weene koy a saya boo Eliise a jaɓat. Maaga, a lula goor qarɓeen ƥetik, da mbaaƭaa a Eliya boo ñaal tadik, ndaa nga’iran.

¹⁸A ndalfooxa o nomtooxiid me Eliise fee maad’ina Yeriko, soo ta lay a den ee: «Lay’aam a nuun ee ba nu ndet!»

¹⁹Wiin we na teeru fee a laya a Eliise yee: «O yaal in, ne ga’tanoona teeru fee a fela lool, ndaa foofi le kaa feƭar, lanq ke a maas.»

²⁰A laya a den ee: «Ƥisiidaamoo o ndoon o nqas, nu yip teen fo jem.» A ƥisiidaan o ten.

²¹Maaga, Eliise a reta na cur alaa, a ɓax fo jem ole kam foofi laa soo a lay ee: «O Yaal oxe kaa tee: ‹Ɓogdaam foofi leeke boo garitkatee fa nqon too taxkatee lanq ke a maas.› »

²²Maaga, foofi laa a felata, ne Eliise a layit’uuna, too kaa maad o felaa boo no ñaal ne xaye.

²³Eliise a inoora Yeriko, a retaa Betel. Ye ta refna na ƭat, xa koor xa teɓ axaa na teeru faa a nqaadnooxoogaan ee: «Aca de, o meelu xe! Aca de, o meelu xe!»

²⁴A wiƈaqilooxa, a ga a den soo a saloox a den no gon no Yaal oxe. Maaga, ursu tew ƭik a sutoorta no suungaan le, a lisit xa koor qarɓeen nahik fo xa koor xa ƭaq na xa koor axaaga.

²⁵Eliise a inoora maaga, a ret no joong olaa Karmel, cinj kaaga ta nomtoox Samari.