Read NQAARIIT NE ROOG 2 Maad we 20 Bible Online

2 Maad we 20 - NQAARIIT NE ROOG bible

2 Maad we 20

¹Na jamaane faaga, o maad Hiskiya a jira boo a ref ndeer xon fo ñoow. O tuleer Esayi fee o ƥiy Amoc a gara me ten, a layin ee: «O Yaal oxe kaa tee: ‹Regdinooxi mbind of, yaam wodkatiro, ndaa xan o xon.› »

²Hiskiya a geleerooxa farna fo tabax ne soo a xeɗ o Yaal oxe. Kaa layoogu yee:

³«Ey, o Yaal oxe, wetandooxi yee ñaaƴaam mbaambir of fo ngor fo kam fa letu, too ke feloonga rek fi’oogum.» Cinj kaaga, xa kooniit um a yuura, ta naag ɓusiid a lool.

⁴Esayi a sutooxa, ndaa fadiid’afulee no maax-a-ndeer ole no mbind no maad ne. Maaga, o Yaal oxe a heblaan ee:

⁵Nomtooxi lay a Hiskiya fee adooxanna xeet es ee: «Keeke o Yaal oxe refna Roog fee no taan of Dawid a layu: ‹Nanaam a qeƭ of too ga’aam xa kooniit of. Ndiiki koy, xam wodandong. No ñaal ndadkandeer ne xan o ret no Mbind naa no Yaal oxe.

⁶Xam ɓaat no ñoow of xa kiid xarɓaxay fo xa kiid xa ƥetaq. Xam muclong, wo fo we ngenna Yeerusaleem na xa ƥay axe no maad oxe Asuur, too xam saytoox teeru fee yaam mi fo o tag es Dawid.› »

⁷Esayi a laya yee: «Fat o ɗok xa tun a ɓisiidel.» A ɓisiide, a ɗuumel no ɗoy le, soo Hiskiya a wod.

⁸Hiskiya a laamta a Esayi yee: «O anddiloor olum na woorinkaxam ee xan o Yaal oxe a wodandaam bo um waag o retahin a lakra no Mbind naa no Yaal oxe?»

⁹Esayi a ɓaata o lay ee: «Keeke refu o anddiloor ole o Yaal oxe a cooxkang, ndax ta woornong ee xan a fadin ke ta regitna: Ndax bugaa yook ne a jof mbaambir mbaat ta nomtoox boo a taaraand xarɓaxay took o toŋ-toŋ ole?»

¹⁰Hiskiya a doonaan ee: «O xotin yook ne mbaambir boo a taaraand xarɓaxay a yooɓa, ndaa fat a nomtoox boo a taaraand xarɓaxay.»

¹¹Maaga, o tuleer Esayi a xeɗa o Yaal oxe, soo ta nomit yook ne boo a taaraand xarɓaxay no toŋ-toŋ ole Ahas ta muur’atna.

¹²Na jamaane faaga, Merodak-Baladan fee o maad oxe Babilon, a ref o ƥiy Baladan, a lulta a Hiskiya xa leetar fo a ƭeeteer, yaam a yeg ee kaa jir’u.

¹³Hiskiya a dalna waa luliid’eena, soo a lal a den o mbiñ onqe tikoorik cegu njiriiñ ke ndefna xaaliis fee fa wurus fee fo pelu tuñ ke fa diwliin fa njafeñu fee a ngeek’eena. A lala a den itam ngeekand ne no ƥonax ke ten fo ke reeƭna no tap ke ten fop. Ɗasin’ee a den dara, ta ref no mbind um mbaat no maat um bo ta xet.

¹⁴Cinj kaaga, o tuleer Esayi a soƥiida o maad Hiskiya, a laamtin ee: «Xar refu o jaf no goor weene, too sax mam a inooru?» Hiskiya a doonaan ee: «Taa Babilon a inooru.»

¹⁵Esayi a doona teen ee: «Xar a nga’u kam mbind of koy?» Hiskiya a doonaan ee: «A nga’a fop ke refna teen, ɗasniim a den dara na halal es.»

¹⁶Maaga, Esayi a laya a Hiskiya yee: «Nan-gilooxi ke o Yaal oxe a layna:

¹⁷‹Ga’angi, ñaal key a ngaraa kaa ke refna no mbind of fop fo ke daan of a ngeerna teen fop, a ɓiskeel Babilon. Dara yoqkee teen. Keene o Yaal oxe a layu.

¹⁸Xan leng-leng na xa taan of ŋaƈit sax a ƥisel, a njalanaa o maad oxe Babilon kam mbind no maad ne ten.› »

¹⁹Hiskiya a doona a Esayi yee: «Fa lay fee no Yaal oxe yegnaxamoona a faaxa lool», took a xalaataa yee: «Feek mexe ñoowaa, xan i ndef na jam fo no yaadax.»

²⁰Ke yoqna na pi ake Hiskiya fo njambaar ne ten, fo ne ta maxitna mband fo a ƥaaxaand um, ndax ta ɓisiid foofi kam Yeerusaleem, kaa mbindel no «Safe le no caloori ke no maad we Yudaa».

²¹Hiskiya a daba daan um, soo Manaase fee o ƥeem a rondandin.