Read NQAARIIT NE ROOG 2 Maad we 21 Bible Online

2 Maad we 21 - NQAARIIT NE ROOG bible

2 Maad we 21

¹Manaase a jeg’a xa kiid xarɓaxay fo xa kiid xa ƭaq ye ta sogna refaa o maad. A maadooxa xa kiid qarɓeen ƥetik fo xa kiid xa ƥetaq kam Yeerusaleem. Ya um Hefsiba a ne’’e.

²Manaase a fi’a kaa faaxeerna na kid no Yaal oxe, a sooboox na pi a cednooxu ke no qeet ke o Yaal oxe a rax’ina mbaambir Ii-isra’el we.

³A maxatina a ñaang a sadaxand ake faap um Hiskiya a moocand’ina. A geennana a Baal xa sadaxand, a lupan a Asera o daaƴ, ne Ahab fee reeƭna o maad Isra’el a fi’it’uuna, soo a gungaa mbaambir xa qoor axe na asamaan.

⁴A maxa xa sadaxand xa andand no Mbind ne no Yaal oxe, me o Yaal oxe a lay’ina yee: «Yeerusaleem gon es a genkaa.»

⁵A maxana xa qoor axe na asamaan xa sadaxand kam xa maax xa ƭaq axe no Mbind ne no Yaal oxe.

⁶A reta sax boo a dox o ƥeem o ngoor nen sadax, a ɗeetaa, a ñango’aa soo a dalin waa na ƈufginooxaa xon we fo maɗag. Kaa moƴ’u moƴ o fi’aa kaa faaxeerna na kid no Yaal oxe, a fuuxnooran.

⁷A ɓeka nitaal sexe ne Asera ta fi’in’ina kam Mbind ne o Yaal oxe a layit’ina a Dawid fa Salomo fee o ƥeem ee: «No Mbind neeke fo na teeru feeke refna Yeerusaleem fee jilooduuma a ndeer a carind ake Isra’el fop bugum gon es a gen boo kili.

⁸Boo xeet fee Isra’el a ngayna kebil es fop, a ndeef a cangin ale o tag es Moyiis a daawinna a den, joqooynoorkiim a den maa goƭna saax le ci’uuma daan den.»

⁹Kaa koy, xeet fee Yudaa nananee o Yaal oxe, too Manaase a mo’noora a den bo da mbi kaa moƴna o faaxaƭar ke qeet ke o Yaal oxe a raadin’ina mbaambir Ii-isra’el we a mbi’’ina.

¹⁰Maaga, o Yaal oxe a laya, a reefandin no duleer we dag um ee:

¹¹«Feek Manaase fee o maad Yudaa a fi’a cednooxu keene, a fi kaa moƴna o faaxaƭar ke Aa-amori we a mbi’’ina yaaga fop soo a bakaadnoorit itam wiin we Yudaa pangool ke ten,

¹²ten taxu mi o Yaal oxe Roog fee Isra’el xam ɓisiid took Yeerusaleem fo took Yudaa taamaala faa na bugko xiinaa no nof no we na nankan fop.

¹³Xam xawit a Yeerusaleem, ne xawtuuma a Samari fo mbind Ahab. Kaam ee xam laxad a Yeerusaleem ne o ƥaxañ a laxadteel soo a sagel.

¹⁴Xam fod we na yoqkaa na xeet es, ɓoxot a den na xa ƥay no fañ den, da njangal a den, a mbalit o jeg den fop,

¹⁵yaam kaa mbi kaa faaxeerna na kid es, a mbuuxnooraam no kaa xotitna a koom alaa suttuuma daan den Misira boo xaye.»

¹⁶Manaase a ɓaxa itam fo’oy no caambuur mayu boo Yeerusaleem a may fo fo’oy, fogreerna fo pakaad ke ta bakaadnoor’ina wiin we Yudaa, ye ta fi’na kaa faaxeerna na kid no Yaal oxe.

¹⁷Ke yoqna na pi ake Manaase fop fo ne ta bakaaditna kaa mbindel no «Safe le no caloori ke no maad we Yudaa».

¹⁸Manaase a daba daan um, a gasel kam a ƭing ale no mbind um xoyoogeena a ƭing ale Uusa, soo Amon fee o ƥeem a rondandin.

¹⁹Amon a jeg’a xa kiid qarɓeen ƭik fo xa kiid xa ƭaq, ye ta sogna refaa o maad. A maadooxa xa kiid xa ƭaq kam Yeerusaleem. Ya um Mesulemet a ne’’e, a ref o ƥiy Harus fee gen’ina Yotba.

²⁰Amon a fi’a kaa faaxeerna na kid no Yaal oxe nen a Manaase fee faap um.

²¹A reefa o jaf faap um deŋ, a faɗooxaa pangool ke faap um a faɗooxoogna, a gungaa mbaambir den.

²²Kaa xaƴ o Yaal oxe, Roog fee no daan um, a fañ o reef a ƭat um.

²³Parɓa ke Amon a ngiɓanaan o ngir soo a mbartin no mbind no maad ne ten.

²⁴Kaa koy, wiin we no saax le a mbara fop we ngiɓan’ina o maad Amon o ngir soo a ndalin a Yosiya fee o ƥeem, ta rondand a faap um.

²⁵Ke yoqna na pi ake Amon fop kaa mbindel no «Safe le no caloori ke no maad we Yudaa».

²⁶A gase kam a mboy um na ƭing ale Uusa, soo Yosiya fee o ƥeem a rondandin.