Read NQAARIIT NE ROOG 2 Maad we 22 Bible Online

2 Maad we 22 - NQAARIIT NE ROOG bible

2 Maad we 22

¹Yosiya xa kiid ɓetaa tadaq a jeg’u, ye ta sogna refaa o maad. A maadooxa xa kiid qarɓeen tadik fo o hiid o leng kam Yeerusaleem. Ya um Yedida a ne’’e, a ref o ƥiy Adaya fee gen’ina Boskat.

²Yosiya a fi’a kaa faaxna na kid no Yaal oxe, a reef deŋ o jaf Dawid fee o taan um, too ɗapee na ñamaak mbaat na janoon.

³No hiid xarɓaxay fo hiid o ɓetuu dadkandeer ole no maat Yosiya, a lula no Mbind naa no Yaal oxe a Safan fee o piibind oxe refna o ƥiy Asaliya fo o ndaan Mesulam, a layin ee:

⁴«Reti maa Hilkiya fee o saasadax o maak oxe, o layin ta eed xaaliis fee ci’tiidoogeena no Mbind ne no Yaal oxe, too yeeyetax we no ndokand ne a ndaawtoogun na xeet fee.

⁵Fat a cooxel we adooxanna calel ke no Mbind ne no Yaal oxe, soo weene a coox teen jaajal we na nqendandaa xa kef axe no Mbind ne,

⁶a coox teen itam seesex we fo maamax we fo jaajal lakas we, ndax da njik a qanq fo a ƥil a maak a mosu ke soxla’eena na qendand ale no mbind ne.

⁷Baa da laamtel koy me xaaliis fee da ndaawna a rokna, yaam wiin wooru a ndefu.»

⁸Ye Safan a ɓisiidna nduleer ne no maad oxe me Hilkiya fee o saasadax o maak oxe, oxeene a layaan ee a ga’ta no Mbind ne no Yaal oxe safe le no kebil ke, soo a cooxin o ten. Safan a jangaan bo ta xet.

⁹Cinj kaaga, a nomtooxa maa no maad oxaa, a jangtooxin ee: «Dag we wo a yiƥadooxa xaaliis fee reeƭna no Mbind ne no Yaal oxe, a ƥoxotin we adooxanna calel ke na qendand ale.»

¹⁰Safan fee o piibind oxe a ɓaata taaga yee: «Hilkiya fee o saasadax oxe cooxaxam safe lene.» Cinj kaaga, a jangana o maad oxe safe le.

¹¹Ye o maad oxe a nanna fa lay fee no safe le no kebil ke, a faara toki um.

¹²A xoyna a Hilkiya fee o saasadax oxe fa Ahikam fee o ƥiy Safan fa Akboor fee o ƥiy Mikaya fa Safan fee o piibind oxe fa Asaya fee o leng no dag we ten, a lay a den ee:

¹³«Ndetyo laamtankaam o Yaal oxe, mi fa xeet fee Yudaa fop, no kaa farna no ke layeena no safe lene sogna o ga’eel, yaam fuux le no Yaal oxe a magna lool. Ne daan in a nananeerna fa lay fee no safe lene too ndeefee fop ke i mbindaneena teen taxu fuux le no Yaal oxe a ɓiltooxan a in.»

¹⁴Hilkiya fee o saasadax oxe fa Ahikam fa Akboor fa Safan fa Asaya a ndeta maa Hulda fee o tuleer o tew oxe gen’ina no sinjaan qas ke Yeerusaleem. O kor um Saalum a ne’’e, a ref o ƥiy Tikwa fo o ndaan Harhas too a topatooxoogu toki tedu ke no Mbind Roog ne. A njangtooxa o tew oxe ke xew’ina.

¹⁵Maaga, Hulda a laya a den ee: «Keeke o Yaal oxe Roog fee Isra’el a layu: ‹Layyo o koor oxe lulna a nuun me mi yee:

¹⁶O Yaal oxe kaa tee: Xam ɓisiid taamaala no mbiñ onqene fo took we ngenna teen, ne ta bindteena deŋ no safe le o maad oxe Yudaa a janganeena.

¹⁷Feek kaa mbaasaam pelek, a ƥoxotaa cuuraay roog lakas ke, a mbuuxnoortaam a pi den fop, ten taxu fuux le mi a biltooxan o mbiñ onqene too ɓooskee.›

¹⁸O maad oxe Yudaa koy, luliidna a nuun, ndax ta laamit o Yaal oxe, keeke refu ke nu laykan: ‹O Yaal oxe Roog fee Isra’el kaa tee: Nanaa fa lay fee no safe lene

¹⁹boo ta duq xeeñ of. Neewandooxaa mbaambir o Yaal oxe, ye nanoona ke fosooxan’uuma o mbiñ onqene fo we ngenna teen. Faaraa toki of, lool ciic mbaambir es, ye nanoona yee o mbiñ onqene xan a refat juum kefatin, we ngenna teen a ndefat saloor. Ten taxu mi o Yaal oxe, mexe yegnang ee nanaaxoong.

²⁰Xam dabnoorong daan of, o gasel na yelem na mboy of, too ga’kiro taamaala fee um ɓisiidkaa no mbiñ onqene.› » We lul’eena a ndeta, a njangtoox o maad oxe o doonanqol oleene.