Read NQAARIIT NE ROOG 2 Maad we 23 Bible Online

2 Maad we 23 - NQAARIIT NE ROOG bible

2 Maad we 23

¹O maad oxe a xoyna maak we Yudaa fo we Yeerusaleem fop, da njaaɓiidin.

²Cinj kaaga, o maad oxe a reta no Mbind ne no Yaal oxe, a yoon fo we ngenna Yeerusaleem fop fo goor we no ke yoqna na Yudaa fop fo saasadax we fo duleer we, xeet fee fop daal, a xotit no fo mboƭomsogor ne boo no wiin maak we. A jangana a den fop ke layeena no safe le no ngiɓoor ne da soƥ’ina kam Mbind ne no Yaal oxe.

³O maad oxe kaa geenoox’u took ndaalaand ne soo a dalin mbaambir no Yaal oxe ngiɓoor, ndax da ndeef o Yaal oxe, a ngay kebil um fo fa lay um fo ke ta dalinna na qeeñ den fop fo na xa laaw den fop soo a ngay fa lay fee no ngiɓoor neene bindeena no safe lene. Xeet faa fop a yoona no ngiɓoor naaga.

⁴O maad oxe a hebla a Hilkiya fee o saasadax o maak oxe fo saasadax we ndeefna took um fo we yetooxoogna ndokand ne no Mbind ne no Yaal oxe, da sut teen tig oo tig ke mbi’an’eena a Baal fa Asera fo xa qoor axe na asamaan. A ndoxte tafil Yeerusaleem no lanq peenjeenju kaa Kederon, soo ndaw ke a ƥisel Betel.

⁵Yosiya a raxa saasadax we maad we Yudaa a ndalin’ina, ndax da ndoxaa cuuraay took a ñaang a sadaxand ake kam teeru ke Yudaa fo me widna a Yeerusaleem. A raxa itam we ndoxanoogna cuuraay a Baal fo njeeƈ ne fo o nqool onqe fo xa qoor xa ƭeetir axe fo xa qoor axe na asamaan fop.

⁶A sutta no Mbind ne no Yaal oxe nitaal sexe ne Asera, a ɓisin tafil Yeerusaleem farna fo a yulanq ale Kederon, a doxtin maaga bo ta fi ndaw. A pasara ndaw kaa kam a semb alaa xon we na xeet fee a ngeekoogeena.

⁷A bayta kam Mbind ne no Yaal oxe tok ke no goor we sooboox’ina no njaga ne ɗeetoogeena nen tedu, too rew we a ndiwtoogu teen singir ke no nitaal sexe ne Asera.

⁸Yosiya a ɓisiida Yeerusaleem saasadax we no teeru ke Yudaa fop soo a xoolaƭarand a ñaang a sadaxand ake me saasadax we a ndoxtoogna cuuraay kam saax le fop, a xotit Geba boo Beer-Seeba. A bayta a ñaang a sadaxand ake na xa ton-maax axe ndeeƭna no ndokand ne no don-maax ole Yosuwe fee o yaal teeru fee, too boo o rokaa na teeru fee, ta gartong na janoon.

⁹Saasadax we inoortiidna na ñaang a sadaxand ake koy ci’’aand o ƥoxotaa sadax took o sadaxand ole no Yaal oxe kam Yeerusaleem. Kaa koy, a ci’’e o ñaam no puuru canja’e ke nen saasadax lakas we gend den.

¹⁰O maad oxe a maasanda a Tofet reeƭna na yulanq alaa Ben-Hinom, ndax o leng doxankatee a Molok o ƥeem o ngoor mbaat o ndew.

¹¹A watna no ndokand ne no Mbind ne no Yaal oxe pis ke, maad we Yudaa a kesan’ina njeeƈ ne, too a ndeeƭu paam a ndok ale Netan-Melek fee o caajal no maad oxe. A sareet ake no njeeƈ ne koy, Yosiya a doxa a den.

¹²O maad oxe a gefa xa sadaxand axe ndeeƭna took bomb le na ndok-took ale Ahas, too maad we Yudaa a mbi’’u a den. A gefa itam xa sadaxand axe Manaase a fi’in’ina kam xa maax xa ƭaq axe no Mbind ne no Yaal oxe. Cinj ye ta duguñna a den, a bufa kefatin ke fop, a ɓaxik a den na yulanq alaa Kederon.

¹³O maad oxe a maasanda a ñaang a sadaxand ake njasnoor’ina fa Yeerusaleem, a ngarit o joong ole na Yaq fee no ɓemb-roog o ñamaak, too Salomo fee reeƭna o maad Isra’el a maxan’un a Astarte, roog fa njakalaaru fee no Siisidoŋ we fa Kemos, roog fa njakalaaru fee no Moomowaab we fa Milkom, roog fa sednooxu fee no Aa-amon we.

¹⁴Yosiya a gefa a ƥil a sexe ke, a seɓ xa taaƴ xa lupe xe Asera, soo fo mbiñ neene fop, ta mayƭand a den fo xa kiiƈ no wiin.

¹⁵Yosiya a yaqa o sadaxand ole Betel reeƭna took ñaang sadaxand le, Yerobowam fee o ƥiy Nebat a maxin’ina, a bakaadnoortin xeet fee Isra’el. A doxa ñaang sadaxand le, a duguñ fop bo ta mok nem, soo a dox o daaƴ o lupe le Asera.

¹⁶Yosiya a wiƈaqilooxa soo a ga poy ke ndeeƭna took o joong ole. A lula wiin, da ƥisiid xa kiiƈ axe ndeeƭna kam poy ke, soo ta doxit a den took o sadaxand ole, ndax ta maasandin, ne o Yaal oxe a layit’uuna, a reefandin no kiin Roog oxe. Yosiya a ɗeeta me widuuna soo a ga a mboy ale no kiin Roog oxe yegnit’ina keene.[12]

¹⁷A laamta a den ee: «Kaana um ga’aa, refee a mboy?» Goor we na teeru faa a ndoonaan ee: «A mboy ale no kiin Roog oxe inoor’ina Yudaa too a yegnit’u fop ke fi’oona o sadaxand olene yoo.»

¹⁸Maaga, a laya yee: «Yaaga de, nqaƴeenoo! Ba o leng a duq xa kiiƈ um!» A nqaƴa xa kiiƈ axaaga fo xa kiiƈ axe no tuleer oxe inoor’ina Samari itam.

¹⁹Yosiya a moocandahina pind ke na ñaang a sadaxand ake fop ndeeƭna kam teeru ke Samari, too maad we Isra’el a mbi’’u a den, a mbuuxnoorit a den o Yaal oxe. A fi’a a den ne ta fi’na le Betel.

²⁰Yosiya a xirsita took xa sadaxand axe saasadax we na ñaang a sadaxand ake ndeeƭna maaga fop soo a doxit taaga xa kiiƈ den. Cinj kaaga, a nomtooxa Yeerusaleem.

²¹O maad Yosiya a hebla xeet faa fop ee: «Ndoofandanyo o Yaal oxe Roog nuun Xew fee na colandax ale, ne ta bindteena no safe lene no ngiɓoor ne.»

²²No kaa xotitna no camaane kaa haahate we a ƭoxaa a Isra’el boo no camaane ke no maad we Isra’el fo maad we Yudaa, xew a Colandax a leng mos’aand o roofandit nen feene.

²³No hiid xarɓaxay fo hiid o ɓetuu dadkandeer ole no maat Yosiya soom xew feene na Colandax ale a roofandan’e o Yaal oxe kam Yeerusaleem.

²⁴Yosiya a moocanda we ƈufginooxoogna xon we fo maɗag we ndeeƭna kam Yeerusaleem fo kam saax le Yudaa, a yaq nitaal roog ke fo pangool cakalaaru ke fo roog cednooxu ke fop nga’oogeena maaga. Neene, a fadna fa lay fee no kebil ke mbind’eena no safe le Hilkiya fee o saasadax a soƥ’ina kam Mbind ne no Yaal oxe.

²⁵Jeg’ee o maad o leng no we eet’ina a Yosiya mbaat no we mbalakan’uuna, oxaa nomtooxiid’ina no Yaal oxe no xeeñ um fop fo no laaw um fop fo na doole um fop nen o ten, ne kebil ke Moyiis a simtituuna.

²⁶Yaqanee koy, fuux maak le o Yaal oxe a fuuxan’ina a Yudaa ɓoos’ee yaam fop ke Manaase a fuuxnoorit’uuna.

²⁷Ten taxu o Yaal oxe a lay ee: «Xam riƈat a Yudaa maa goƭaxama, ne fi’tanuuma na Isra’el, too xam deɓ a Yeerusaleem refna teeru fee jil’uuma fo Mbind ne lay’uuma yee: ‹Xam gen teen.› »

²⁸Ke yoqna na pi ake Yosiya fop kaa mbindel no «Safe le no caloori ke no maad we Yudaa».

²⁹No maat Yosiya, Neko, a ref Firawon fee o maad Misira a adooxana xiixire we ten, da njagin no xuluɓ olaa Ofrat, ndax da ƈufgik o maad oxe Asuur. O maad Yosiya a jeema o xañit Miimisira we da suur, ndaa ye Firawon fee a ga’uuna rek, a waraan. Keene xe xewit’a Megido.

³⁰Dag we ten a ƥistiida o dal ole ten Megido boo Yeerusaleem na sareet-xire soo a ngasin maaga na mboy um. Cinj kaaga, wiin we Yudaa a nqota a Yowahas fee o ƥiy Yosiya, a ƭuumin soo a ndodin o maad, ta rondand a faap um.

³¹Yowahas a jeg’a xa kiid qarɓeen ƭik fo xa kiid xa tadaq, ye ta sogna refaa o maad. A maadooxa a qool a tadak kam Yeerusaleem. Ya um Hamutal a ne’’e, a ref o ƥiy Yeremi fee gen’ina Libna.

³²Yowahas a fi’a kaa faaxeerna na kid no Yaal oxe nen daan um.

³³Maat um a faga, ye Neko fee refna Firawon fee a jenguuna kam Ribla no saax laa Hamat. Neko a sepa saax le Yudaa a bateer ngap parig qarɓeen tadik fo parig nahik xaaliis fa nqoolu fo ngap kilo qarɓeen tadik fo kilo nahik wurus.

³⁴Cinj kaaga, Neko a dalna a Eliyakim fee o ƥiy Yosiya o maad, ta rondand a faap um no maat naa, soo a supit gon le Eliyakim, ta refat Yoyakim. Yowahas koy, a ɓisaan Misira, soo ta xonit maaga.

³⁵Yoyakim a ɓoxota xaaliis fee fa wurus fee a Neko fee refna Firawon fee. Ndax ta coox a Firawon fee ke ta sep’ina, a sera we ngenna no saax le a bateer xaaliis fa wurus, a reefandin no ne o jeg no xuu refna a fodna.

³⁶Yoyakim a jeg’a xa kiid qarɓeen ƭik fo xa kiid xa ƥetaq, ye ta sogna refaa o maad. A maadooxa xa kiid xarɓaxay fo o hiid o leng kam Yeerusaleem. Ya um Sebida a ne’’e, a ref o ƥiy Pedaya fee gen’ina Ruma.

³⁷Yoyakim a fi’a kaa faaxeerna na kid no Yaal oxe nen daan um.