Read NQAARIIT NE ROOG 2 Maad we 24 Bible Online

2 Maad we 24 - NQAARIIT NE ROOG bible

2 Maad we 24

¹Na jamaane Yoyakim, Nebukadnesaar fee o maad oxe Babilon a inooxana saax le Yudaa, soo Yoyakim a ɓoxotoox no ten. Kaa koy, cinj xa kiid xa tadaq, Yoyakim a siiknoora fo ten.

²Maaga, o Yaal oxe a hebliida a yaj no yaayaq, da njangal a Yoyakim. A ndeeƭa Baababilon fo Aa-araam fo Moomowaab fo Aa-amon. A ngara, a song maat ne Yudaa, ndax da moocandin, ne o Yaal oxe a layit’uuna, a reefandin no duleer we dag um.

³O Yaal oxe o mat heblit’u keene fop a xew kam Yudaa, ndax ta deɓin maa goƭuuna. Pakaad ke Manaase a fi’’ina fop

⁴fo itam fo’oy no caambuur ke ta ɓaxna boo Yeerusaleem fop a may fo fo’oy no caambuur taxu o Yaal oxe bug’ee o waasanit.

⁵Ke yoqna na pi ake Yoyakim fop kaa mbindel no «Safe le no caloori ke no maad we Yudaa».

⁶Yoyakim a daba daan um, soo Yoyakin fee o ƥeem a rondandin.

⁷O maad oxe Misira xire’oogatee, yaam o maad oxe Babilon kaa jang’u xa piisel axe ten fop, ke xotitna na ƈufnand alaa Misira boo no xuluɓ olaa Ofrat.

⁸Yoyakin a jeg’a xa kiid xarɓaxay fo xa kiid ɓetaa tadaq, ye ta sogna refaa o maad. A maadooxa a qool a tadak kam Yeerusaleem. Ya um Nehusta a ne’’e, a ref o ƥiy Elnatan fee gen’ina Yeerusaleem.

⁹Yoyakin a fi’a kaa faaxeerna na kid no Yaal oxe, ne faap um a fi’it’uuna deŋ.

¹⁰Na jamaane faaga, dag we Nebukadnesaar fee o maad oxe Babilon a ngarana teeru fee Yeerusaleem, a mbidin o kurul-keƥ.

¹¹Ye dag weene a mbidaa teeru fee Yeerusaleem o kurul-keƥ, o maad Nebukadnesaar a garana a xoox um, a song teeru fee.

¹²Maaga, Yoyakin fee o maad Yudaa fa ya um fo dag we ten fo jaajal we ten fo cawdiin ke ten a sutoora na teeru fee, a ƥoxotoox no maad oxe Babilon, soo ta fi a den faɗ. Keene oxe jopir’a no hiid ɓetuu dadkandeer ole no maat Nebukadnesaar.

¹³Nebukadnesaar a janga halal fee no Mbind ne no Yaal oxe fa fee no mbind no maad ne. A gefa xa ƥaxañ wurus axe o maad Salomo a fi’in’ina kam Mbind ne no Yaal oxe. Neene, ke o Yaal oxe a lay’ina a fadnooxa.

¹⁴A ɓista kam Yeerusaleem kelfa ke fop fo xir say we fop, baane ke fo faal tafax we ndeeƭna fop oo fop wiin cuni xarɓaxay. Fo ndool ne soom yoq’u kam saax le.

¹⁵A damta o maad Yoyakin Yeerusaleem, a ɓisin took o hup doole kam Babilon, ten fa ya um fo rew we ten fo cawdiin ke ten fo wiin maak we Yudaa fop

¹⁶fo yaal toole ke fop ndeeƭna wiin cuni ɓetuu ƭik fo baane ke fo faal tafax we ndeeƭna wiin juni. Den fop cambaar kaa mbaagna ndet na xire a ndeeƭu, too o maad oxe Babilon a ɓisa a den took o hup doole kam Babilon.

¹⁷Cinj kaaga, Nebukadnesaar a dalna a Mataniya fee faap o ndeɓ Yoyakin, ta ref o maad Yudaa, soo a supit gon um, a ne’in Sedekiya.

¹⁸Sedekiya a jeg’a xa kiid qarɓeen ƭik fo o hiid o leng, ye ta sogna refaa o maad. A maadooxa xa kiid xarɓaxay fo o hiid o leng kam Yeerusaleem. Ya um Hamutal a ne’’e, a ref o ƥiy Yeremi fee gen’ina Libna.

¹⁹Sedekiya a fi’a deŋ kaa faaxeerna na kid no Yaal oxe nen a Yoyakim.

²⁰Keene a xewa, yaam ne o Yaal oxe a fuuxanna a Yeerusaleem fa Yudaa boo a deɓ a den maa goƭuuna. Sedekiya a siiknoora fo o maad oxe Babilon.