Read NQAARIIT NE ROOG 2 Maad we 25 Bible Online

2 Maad we 25 - NQAARIIT NE ROOG bible

2 Maad we 25

¹Maaga, no hiid o ɓetuu nahkandeer olaa no maat Sedekiya, no ñaal xarɓaxayandeer ne no nqool xarɓaxayandeer onqe, Nebukadnesaar fee o maad oxe Babilon a garana a Yeerusaleem, ten fo xiixire um fop. A sipa saŋe um mbaambir teeru fee, soo da mbi a uum lanq a songir me widuuna fop.

²Teeru fee a wid’e o kurul-keƥ boo no hiid xarɓaxay fo hiid o lengandeer ole no maat Sedekiya.

³No ñaal ɓetuu nahkandeer naa no nqool o nahkandeer onqe[13], ye nqeex ne a ɗomna na teeru fee boo wiin we njegatee kaa da ñaamna,

⁴o gur a sexe no saŋe ne na teeru fee. O maad oxe fo xiixire we fop a ƈufa no yeng ole, a ndeef na ƭat ale no ndokand ne refna ndeer saŋe ƭik ke paam a ƭing ale no maad oxe, a soƥ Baababilon we a mbid teeru fee o kurul-keƥ. Ƴuuƴuf we a nqota a ƭat ale jaginna no xuluɓ olaa Yordaan.

⁵Kaa koy, xiixire we no Baababilon we a ndaaba o maad oxe, a ndaawtin na xa saawit axaa Yeriko, soo xiixire we ten fop a pasaroox maa goƭuuna.

⁶Baababilon we a ndama o maad Sedekiya, a ƥisin maa no maad oxe Babilon reeƭna Ribla, soo oxeene a hate’in.

⁷Xa ƥiy axe Sedekiya a nqirse na kid faap den. Cinj kaaga, Nebukadnesaar a yulna a kid ake Sedekiya, a feñtin ceen xanjar, soo ta ɓisel Babilon.

⁸No hiid xarɓaxay fo hiid o ɓetuu nahkandeer ole no maat Nebukadnesaar fee o maad oxe Babilon, no ñaal ɓetuu ƭikandeer ne no nqool o ƥetkandeer onqe, Nebusaradan fee adooxan’ina yeeyetax we no maad oxe Babilon a gara Yeerusaleem.

⁹A doxa Mbind ne no Yaal oxe fo mbind no maad ne fo pind ke Yeerusaleem fop boo no pind ke no wiin maak we fop.

¹⁰Xiixire we no Baababilon we yoon’ina fo o aa-adax oxe no yeeyetax we a maafa saŋe ke mbid’ina a Yeerusaleem.

¹¹Cinj kaaga, Nebusaradan fee adooxan’ina yeeyetax we a ɓisa gilaa saax took o hup doole we yoq’ina na xeet fee maad’ina o ngenaa na teeru fee fo we ƥoxotoox’ina no maad oxe Babilon fo faan falakaand le.

¹²Kaa koy, a xaƴ’a leng-leng no we moƴ’ina o ndool no saax le nen ɗiiɗing taxar biiñ fo xooxoox.

¹³Baababilon we a nduguña a toodook xanjar ake no Mbind ne no Yaal oxe fo tiƈir ke fo o waaŋaan xanjar o maak ole reeƭna kam Mbind ne no Yaal oxe, soo a ƥis xanjar faa fop Babilon.

¹⁴A njanga fo ngaleera ne, xa lang xanjar axe, capil ke, a tokol ake fo ƥaxañ xanjar ke fop njiriiñooroogeena na paɗax ale.

¹⁵O aa-adax oxe no yeeyetax we a janga itam fo njaq ne, xa toon xa biisir axe fo fop ke fi’it’eena wurus mbaat xaaliis.

¹⁶A toodook a ƭak ake fo o waaŋaan o maak ole fo tiƈir ke Salomo a fi’an’ina Mbind ne no Yaal oxe, ƥaxañ xanjar keene fop o meɗel den and’aand.

¹⁷Geel le na toodook a leng ale a reeƭa xa noonoong xarɓaxay fo xa noonoong ɓetaa tadaq, too a jeg’a took fee xoox xanjar laa geel um a reeƭna xa noonoong xa tadaq. Me widna xoox le a jeg’a mbiic fo xa goronaad, fop a ref xanjar. Neene a refit’u itam na toodook a ƭikandeer ale fo mbiic ne.

¹⁸O aa-adax oxe no yeeyetax we a dama a Seraya fee o saasadax o maak oxe fa Sefaniya fee o saasadax oxe reefanuuna fo yeeyetax daduk we no ndokand ne no Mbind ne no Yaal oxe.

¹⁹A damta kam teeru fee itam jawdiin faa adooxan’ina xiixire we, goor ɓetuk waa mbog’ina no andir ne no maad oxe too a soƥ’el kam teeru fee, o piibind oxe no xe kelfa’’ina xiixire we, gadin’eena a pindax ale na xeet fee no saax le fo goor qarɓeen ɓetuu fa leng na xeet fee no saax le ndeeƭna kam teeru fee.

²⁰Nebusaradan fee adooxan’ina yeeyetax we a xota a den, a ɓis a den Ribla maa no maad oxe Babilon.

²¹O maad oxe Babilon a xawnoora a den soo a warnoorit a den Ribla no saax laa Hamat. Neene, xeet fee Yudaa a ƥise gilaa saax took o hup doole maa goƭna mbaafaap den.

²²Nebukadnesaar fee o maad oxe Babilon a dalna a Gedaliya fee o ƥiy Ahikam, too a ref o ndaan Safan, ta ref gofornoor no wiin we ta xaƴ’ina kam saax laa Yudaa.

²³Ye aa-adax we no xiixire we Yudaa fop a yegna, den fo goor den ee o maad oxe Babilon a dalin’a a Gedaliya, a soƥka a Gedaliya Mispa. Den ndeeƭu Isma’el fee o ƥiy Netaniya, Yohanan fee o ƥiy Kare’a, Seraya fee o ƥiy Tanhumet fee gen’ina Netofa, fa Yaasaniya fee gen’ina Maaka, den fo goor den.

²⁴Gedaliya a daaɓooxa fa den, den fo goor den ee: «Ba nu saɗar dag we no Baababilon we. Moofyo no saax le, ndagoox o maad oxe Babilon, too yaaga xan a mal a nuun.»

²⁵Kaa koy, no nqool o ɓetuu ƭikandeer onqe, Isma’el fee o ƥiy Netaniya, too a ref o ndaan Elisama, fog’ina no ƥasil no maad, a gara, a yoon fo goor xarɓaxay, soo da mbar a Gedaliya fo Yuuyudaa we fo Baababilon we ndeeƭna fo ten Mispa.

²⁶Maaga, xeet faa fop, a xotit no xe moƴna neew boo no xe moƴna maak fo aa-adax we no xiixire we a inooxa, a ƈuf Misira, yaam a saɗaraa Baababilon we.

²⁷No hiid qarɓeen tadik fo hiid o ɓetuu ɗikandeer ole no mbaƭ ne Yoyakin fee o maad Yudaa, no ñaal qarɓeen ƭik fo ñaal ɓetuu ƭikandeer naa no nqool xarɓaxay fo nqool o ƭikandeer onqaa, Ewil-Merodak fee o maad oxe Babilon, no hiid o feraand ole no maat um, a yirma a Yoyakin fee o maad Yudaa soo a sutnin na kaso faa.

²⁸A laya fo ten fo o paaxel soo a cooxin a seek alaa hupna a seek ake no maad lakas we ndeeƭna fo ten Babilon.

²⁹A suptanaan toki kaso ke ten, soo Yoyakin a fogataa fo ten o roon kili no ñoow o ñis um fop.

³⁰Mbeet oo mbeet, Yoyakin a daawtooga no maad oxe Babilon ñoowir um no ñoow o ñis um fop.