Read NQAARIIT NE ROOG 2 Maad we 3 Bible Online

2 Maad we 3 - NQAARIIT NE ROOG bible

2 Maad we 3

¹Yoraam fee o ƥiy Ahab reeƭatu o maad Isra’el kam Samari no hiid xarɓaxay fo hiid o ɓetuu dadkandeer ole no maat Yosafat fee o maad Yudaa. A maadoox’a xa kiid xarɓaxay fo xa kiid xa ƭaq.

²Yoraam a fi’a kaa faaxeerna na kid no Yaal oxe, refee koy ne faap um fa ya um a mbi’it’uuna, yaam ten fa xoox um kaa jiƭit’u o daaƴ ole Baal, faap um a sip’ina.

³Kaa koy, a damooxa, a fañ o waas, no pakaad ke Yerobowam fee o ƥiy Nebat a bakaadnoortoogna xeet fee.

⁴Meesa fee o maad Mowaab kaa reeƭu o siide. O hiid oluu refna a war’a o coox o maad oxe Isra’el fo mbaal cuni teemeed fo a suk paal cuni teemeed fo wiil den.

⁵Kaa koy, ye o maad Ahab a xonna, Meesa a siiknoora fa Yoraam fee rondand’uuna.

⁶O maad Yoraam a dalfooxa o inoor Samari, a fokat xiixire we Isra’el fop.

⁷Cinj kaaga, a lula wiin da layanin a Yosafat fee o maad Yudaa yee: «O maad oxe Mowaab kaa siiknoor fa mi. Ndax bugaa o gar yoon fa mi, i songkin?» Yosafat a doonaan ee: «Xam ret, yaam mi fa wo leng kut i ndefu, xeet es a ref xeet of, pis es a ndef pis of.»

⁸A laamtaan ee: «A ƭat alum i ndeefkaa?» Yoraam a doonaan ee: «A ƭat ale na koƥ-a-ƥor alaa Edoom.»

⁹O maad oxe Isra’el fo xe Yudaa fo xe Edoom a nqota a ƭat. Cinj ye da ñaaƴna ñaal ɓetuu ƭik, njeg’atee foofi laa a yaj ake a yerna ne’katiim cegel suusuf ke da yoonit’ina.

¹⁰Maaga, o maad oxe Isra’el a laya yee: «Cey! O Yaal oxe kaa xoy maad daduk weeke, ndax ta ɓoxot a den na xa ƥay no Moomowaab we.»

¹¹Kaa koy, Yosafat a layaan ee: «Ndax jegee meeke o tuleer no Yaal oxe, oxaa i mbaagna o laamtit o Yaal oxe?» O leng no dag we no maad oxe Isra’el a doonaan ee: «A jega mene a Eliise fee surga Eliya too a ref o ƥiy Safat.»

¹²Yosafat a layaan ee: «O tuleer no Yaal oxe tigi yoo.» O maad oxe Isra’el fa Yosafat fo o maad oxe Edoom a ndeta maa Eliise.

¹³Eliise a laya o maad oxe Isra’el ee: «Xar ɓisiidong me mi? Reti kañ maa no duleer we faap of mbaat no we ya of!» O maad oxe a doonaan ee: «Ha’aa, yaam o Yaal oxe kaa ɓisiid a in, in maad daduk wene, ndax ta ɓoxot a in na xa ƥay no Moomowaab we.»

¹⁴Eliise a laya yee: «Ne ta wooritna yee o Yaal oxe Hupna fop oxe ñoowaa, ten fee refuuma o tag um, um sed’angee a Yosafat fee o maad Yudaa, a ƭat es yongkoogee na wo too sax ɗeetkoogiroong.

¹⁵Ndiiki koy, ƥisiidaamoo o qiixilimb.» Ye oxeene a refna no xilmbaa, katil fee no Yaal oxe a roka a Eliise

¹⁶soo ta lay ee: «O Yaal oxe kaa tee: ‹Ngasyo a kamb a mayu na xur fene ŋiisna.›

¹⁷Yaam o Yaal oxe kaa tee: ‹Nu nga’kee nqeñ too nu nga’kee a teƥ, ndaa xur fene xan a may fa foofi boo nu mbaag o yer, nuun fo a yaj ake nuun fo cegel nuun.

¹⁸Keene sax refee dara paam o Yaal oxe, yaam kaa jolna keene xan a ɓoxot Moomowaab we na xa ƥay nuun.

¹⁹Xan nu yaq teeru cegu saŋe ke fop, yaq teeru ke moƴna o njeg o njiriiñ, ngod taxar paax ke fop. Xan nu sux a cur foofi ke, soo lanq ñoowu ke fop, nu njuum a den a kac.› »

²⁰No feet nqes olaa, na waxtu fee sadax tuufe-duufe ke a ɓoxoteel, a nga’a foofi le a fudoortiidaa farna fa Edoom boo lanq ke a may muut fo foofi.

²¹Ye Moomowaab we a yegna yee maad weene kaa nqire’iidaa fa den, a mbokata fop we mbad’ina o saq ƥonax boo no we mbaaf’atuuna sax, soo da ngeenoox no ŋat ole.

²²A inooxa ƥiiɓ teel, too ye njeeƈ ne sog’ina o wataa a ɗeetooxna no poofi ke, Moomowaab we a ƈooka poofi ke yaxgit’ina a den nen fo’oy.

²³A ndalfooxa o lay ee: «Fo’oy oo! Maad we kaa mboosanir laƥ soo a mbarir. Ndiiki koy, Moomowaab we, acayo na balit ale!»

²⁴Kaa koy, ye Moomowaab we a ngarna no saŋe ne no Ii-isra’el we, weene a inooxa, a nqaw a den boo da ƈut. Ii-isra’el we a ndaaba a den boo kam saax den, a nqaw a den a qaw a ƭomu.

²⁵A mbayta teeru ke, oxuu refna na den a deɓ gac no lanq ñoowu ke boo a mayƭand a den fo a kac. A suxa a cur foofi ke, a ngod taxar paax ke fop. Teeru fee Kiir-Hareset soom bayit’aande, too xiixire we saq’ina xa suusaand a mbidaan o kurul-keƥ soo a songin.

²⁶Ye o maad oxe Mowaab a ga’na yee jegatee doole na ñoq ale, a xota goor teemeed ɓetuu ƭik waa oxuu refna na den a saqna laƥ, ndax ta xaañit farna fo o maad oxe Edoom, ndaa waag’iran.

²⁷Maaga, a janga a taaw um fa ngoor fee war’uuna o rondand no maat ne, a ɓoxotin nen sadax fa ndoxel took saŋe naa. Ii-isra’el we a ndiida ƭomu, a ndalfoox o ndiƈatoox, a nqaad no saax den.