Read NQAARIIT NE ROOG 2 Maad we 4 Bible Online

2 Maad we 4 - NQAARIIT NE ROOG bible

2 Maad we 4

¹Na bes fa leng, o tew oxaa o kor um a fog’ina no duleer we a soƥiida a Eliise, a ƴufginooxin ee: «Andaa yee, o kor es oxe tag of a saɗar’a o Yaal oxe, too ndiiki a xona, soo oxe rawin’ina a in xaaliis kaa laaciid xa ƥiy xa ƭaq axe mi, ndax ta fi’ik a den faɗ.»

²Eliise a doonaan ee: «Ndi xar waagoong o dimle’it? Layangaam ke jegoona no mbind of.» O tew oxaa a doonaan ee: «O ceefeer of de jegee dara no mbind naa, a refangee o ndiwliin onqaa ta yoqiɗna no guta.»

³Eliise a layaan ee: «Ndiiki koy, reti no ngentand ne fop, luɓ yipir too fat o luɓ mayu.

⁴Boo xaadoona, fat o wegoox, wo fo xa ƥeef, soɗaa diwliin faaga no yipir ke fop, soo kesaa yipir ke na maykaa.»

⁵O tew oxaa a reta, a fi naaga. A wegooxa na ndok um, ten fo xa ƥeem, da ndaalandan yipir ke, ta soɗaa a den.

⁶Ye yipir ke fop a mayna, a laya o leng na xa ƥiy axe yee: «Daalandahinaam yipir.» Kaa koy, o ƥiy onqaa a doonaan ee: «Yipir jegatee de.» Maaga, diwliin fee yuuroogna a ɗega.

⁷O tew oxaa a reta a layik o kiin Roog oxaa ke xew’ina, soo oxeene a layin ee: «Ndiiki koy, reti jikoox taaga, rabid o lad ole wo, ke na yoqkaa teen, o ñoowtikin fo xa ƥeef.»

⁸Bes, Eliise a reefa kam Suuneem. A jeg’a maaga koy o tew o qenooxu. A yongnoora a Eliise no mbind um. No kaa xotitna maaga, a mbanuu Eliise a reefiidna no jegel olaaga, maa no tew oxaaga a ñaamtikoogu.

⁹O tew oxaa a laya o kor um ee: «Andaam ee o koor oxe na reefiidaa me in kili, o kiin Roog o tedu yoo.

¹⁰Fat i mbi o ndok-took o saƭku, sipanin maaga njong, a taabul, moofir fo o lampa, ndax a garatangaa me in, a waag o moof maaga.»

¹¹Bes, Eliise a gara maa den, a ret no ndok-took onqaa, a wondoox maaga.

¹²Eliise a laya a Gehasi fee surga um ee: «Xoyanaam o tew o Suusuuneem oxeene!» Gehasi a xoyaan, ta gar a geenoox mbaambir o tag oxe.

¹³Eliise a laya a Gehasi yee: «Layeen ee: ‹Kaa o xij ƭomu yaam in! Ndiiki koy, xar i mbaagong o mbi’an? Ndax bugaa i nqeɗanong tig maa no maad oxaa mbaat maa no aa-adax oxaa no xiixire we.› » A doona a den ee: «A faaxa, ñakiim dara a ndeer no fog es.»

¹⁴Maaga, Eliise a laamta yee: «Xar i mbi’ankan boog?» Gehasi a doonaan ee: «Me ndax jegee o ƥiy, too o kor um a nogoya.»

¹⁵Eliise a laya a Gehasi yee: «Xoyanaam o ten.» Gehasi a xoya o tew oxe, ta gar a geenoox no don-maax ole.

¹⁶Eliise a laya o tew oxe yee: «Neeke mbaan, xan a soƥ o waxooxaa o ƥiy o ngoor.» O tew oxe a doonaan ee: «Ha’aa, o yaal es, wo fee o kiin Roog, ba o pirtaam a liim, mi fee o ceefeer of.»

¹⁷Kaa koy, o tew oxaa a roka o fud soo na mbaan faa na waxtu fa leng kut fee ta ñoot o ƥiy o ngoor, ne Eliise a layit’uuna o ten.

¹⁸O goor ole a maak’a. Bes, a daba a faap um maa no saasaxad waa.

¹⁹Ɓaatnee dara, o goor ole a lay a faap um ee: «Xoox es kaa ɗomaa!» Faap fee a laya o leng no surga ke ten ee: «Ɓiseen a ya um.»

²⁰Surga faa a ɓisiida o goor ole me ya um. O tew oxe a ɓopaan boo waxtu njeeƈ ndeer xoox, soo o goor ole a xon.

²¹O tew oxe a ŋaaya no ndok-took onqaa, a wondin o goor ole no njong ne no kiin Roog oxe, a wegin maaga soo a sutooxiid.

²²A xoya o kor um, a layin ee: «Ngela lultiidaam o leng no surga ke fo o faam o rew, bo um ñof o ret maa no kiin Roog oxaa, gar ndiiki.»

²³O kor um a laamtaan ee: «Xar taxu o retaa maa ten xaye? Xaye refee xew fee na bat ale no nqool onqe mbaat bes fee na ñootnax ale.» O tew oxaa a doonaan ee: «Jam oo.»

²⁴Cinj kaaga, a simta o humnanel o faam o rew olaa soo a lay a surga um ee: «Raxi i ndet, too ba o geenoox na ƭat ale koy, a refangee kaa um heblong o ten.»

²⁵O tew oxaa a xota a ƭat, a soƥik o kiin Roog oxaa no joong olaa Karmel. Ye Eliise a ƴookuuna, a laya a Gehasi fee surga um ee: «Ga’angi, kaana de o tew o Suusuuneem oxe yoo.

²⁶Ƴufi xetookin boog, o laamtin ee: ‹Mbaar jam soom jego? O kor of fo o ƥeef jam rek a njegu?› » O tew oxaa a doona a Gehasi yee: «Jam rek kañ.»

²⁷Kaa koy, ye ta fadiidna took o joong olaa me no kiin Roog oxe, a farakooxa na caf um. Gehasi a matiida, ndax ta riƈatin, ndaa Eliise a layaan ee: «Xaƴeen, yaam kam um kaa feƭar, too o Yaal oxe kaa ɗasnaam o ten, a fañaam o yegin teen dara.»

²⁸Maaga, o tew oxe a layaan ee: «O yaal es, ndax kaam xeɗ’ong o ƥiy? Ndax lay’iroong ee: ‹Ba o pirtaam a liim?› »

²⁹Eliise a laya a Gehasi yee: «Kufooxi, xot o loq ole mi soo ret. O xetangaa fo o kiin, ba o simnin, too o kiin a simnangaang, ba o jaaɓin. O fadangaa, fat o doon o loq ole mi took mukit fee no goor ole.»

³⁰Ya fee no goor ole a laya a Eliise yee: «Ne ta wooritna yee o Yaal oxe xe ñoowaa, too woxey ñoowaa, neene a woortu yee xaƴkiroong!» Maaga, Eliise a inooxa, a reefin.

³¹Gehasi koy adooxiid’u a den. A doona o loq ole took mukit fee no goor ole, ndaa o goor ole fangoox’ee mbaat ta disoox. Gehasi a nomtooxiida, a xet fa Eliise, a yegnin ee o goor ole jokoox’ee.

³²Ye Eliise a rokiidna no mbind naa, a ga’a yee o goor ole kaa xon soo a wondnel no njong ne.

³³Eliise a roka no ndok onqaa soo a wegoox kam faa fo o goor ole, ndax ta xeɗ o Yaal oxe.

³⁴Cinj kaaga, a wondooxa took o goor ole, a fi o don ole ten no don ole no goor ole, a kid ake ten na kid ake no goor ole, xa ƥay axe ten na xa ƥay axe no goor ole. Ye ta ɗaasoorna neene took um, cer ke no goor ole a sumatina.

³⁵Eliise a inooxa no njong ne, a wiliirooxaa kam a ndok ale, cinj kaaga ta wondooxatin took o goor ole. Maaga, o goor ole a disooxa boo a caf ɓetaa ƭaq soo a ɗeet.

³⁶Eliise a xoya a Gehasi, a layin ee: «Xoyanaam o tew o Suusuuneem oxe.» Gehasi a xoyaan, ta gar me Eliise. Eliise a layaan ee: «Jangi o ƥeef!»

³⁷O tew oxe a yena na caf ake Eliise, a gung a lanq, cinj kaaga ta xot o ƥeem, a ret.

³⁸Eliise a nomtooxiida Gilgal. A jeg’a koy biim kam saax le. Ne duleer we a ndeeƭna fo ten, a laya surga fee ten ee: «Deeni a kaleera maak ale, jawan duleer we laalaap.»

³⁹O leng na den a sutooxa, a ret kam a koƥ alaa, a ɓoorik. A ga’a seegel-ngoy soo a gis na xa tim axaa, a fofin no ndikoorik um bo ta may. Ye ta gatna, a seleƴa a den, a yip a den kam a kaleera le no laalaap ke, yaam and’ee ke ta reeƭna.

⁴⁰Goor weene a ndoxane, ndaa ndak fo ndak, ye da ñimna laalaap ke, a mbaɗooxa yee: «O kiin Roog oxe, ñaamel ke kaa nquut!» Mbaag’atee o ñaam dara koy.

⁴¹Eliise a hebla o ɓisiidel mbiɗel. A yipa mbiɗel ke kam a kaleera le soo a lay ee: «Fat wiin we a ndoxanel, a ñaam.» Laalaap ke koy a mbaag’ate o ñaam.

⁴²O koor a inoortiida Baal-Saliisa, a ɓisiid o kiin Roog oxe puuru qarɓeen ƭik lorso kaa mbi’teena mbiɗel qas fo o saaku bele faa ta sog’ina o saxadaa. Eliise a laya surga fee ten ee: «Lasi wiin wene fop da ñaam.»

⁴³Surga faa a doonaan ee: «Nam waagum o xaajrandit kene wiin teemeed?» Eliise a ɓaataan o lay ee: «Laseen wiin we da ñaam, yaam keeke o Yaal oxe a layu: ‹Oxuu refna xan a ñaam, too xan a jeg sax kaa yoqna.› »

⁴⁴Surga faa a lasa a den puuru kaa, da ñaam boo a yoqiɗ, ne o Yaal oxe a layit’uuna.