Read NQAARIIT NE ROOG 2 Maad we 5 Bible Online

2 Maad we 5 - NQAARIIT NE ROOG bible

2 Maad we 5

¹Naaman, farɓa fa maak fee no maad oxe Araam kaa reeƭu o kiin o maak oxaa o yaal um a wootoox’ina, yaam na pexey oxeene kiin o Yaal oxe a ci’it’u Aa-araam we o ndam. Kaa koy, a salma-koor aleene kaa jeg’u a tik a maak.

²A yaj no Aa-araam we a mbi’’a o njangal kam Isra’el boo a ndamtiid maaga o njaaƈ o ndew. O njaaƈ onqaa a jalanooga o tew oxe Naaman.

³Na bes fa leng, o njaaƈ onqaa a laya o yaal mbind um o tew ee: «Giimee rek o yaal mbind es a fad’angaa Samari maa no tuleer Roog oxaa refna maaga, a wodandkoogaan na tik-a-maak ale ten.»

⁴Naaman a reta a layik o maad oxaa ke o njaaƈ o ndew onqe inoor’ina Isra’el a lay’ina.

⁵Maaga, o maad oxaa a layaan ee: «Reti Samari, xam bindanong o leetar olaa o cooxkaa o maad oxe Isra’el, yaa fadoona.» Maaga, Naaman a reta soo a ɓisloox ngap parig tadik fo kilo qarɓeen nahik xaaliis fa nqoolu fo ngap kilo qarɓeen ɓetuu fa leng fo kilo ɓetuu fa leng wurus fo toki poƭtir xarɓaxay.

⁶Naaman a cooxa o maad oxe Isra’el o leetar ole bind’eena yee: «Na waxtu fuu daawoona o leetar olene, fat o and ee kaam lultiidong a Naaman fee o tag es, ndax o wodandin na tik-a-maak ale ten.»

⁷Yaa o maad oxe Isra’el a jangna o leetar ole boo a ƴut, a faara toki um, a lay ee: «Ndax kaam ref Roog, boo waag o war o kiin mbaat um ñoownin, boo a tax ta lultiidaxam o kiin ee ndax um wodandin na tik-a-maak um. Refee xire rek a bugu, a waaƭaa maa ta jegitna a ƭat na mi.»

⁸Ye Eliise fee o kiin Roog a yegna yee o maad oxe Isra’el kaa faar’u toki um, a lulta, ndax ta layanel o ten ee: «Xar o faaranaa toki of? Xaƴi o kiin oxeene ta gar me mi, too xan a and ee o tuleer Roog oxey kam Isra’el.»

⁹Maaga, Naaman a gara fo pis ke ten fo a sareet-xire le ten, a geenoox na carind ale no mbind Eliise.

¹⁰Eliise a lulta o layanel a Naaman ee: «Reti ɓogook no xuluɓ olaa Yordaan boo a caf ɓetaa ƭaq, too xan cer of a mbod, soo o xool.»

¹¹Naaman a fuuxa ƭomu, a xot a ƭat, a nomtooxaa, a lay ee: «Mi de kaam foog’u yee o tuleer Roog oxe kaa sutooxiidkaa, ndax ta ga’aam, a ƴufginoox o Yaal oxe Roog um, a moos me na ɗomaa soo a wodandaam no jir le mi!

¹²Mee ndax xa maag xa maas axe Damaas ndefna Abana fa Parpar moƴu poofi ke Isra’el fop, too um ɓogoox’angaa maaga, um xool qac.» Maaga, Naaman a nomtooxa, ndax ta xaad, a fuux boo a buɓaa.

¹³Kaa koy, surga ke ten a matiidaan soo a layin ee: «Yaal mbind, ndax o tuleer oxe a sim’angaang kaa ɗomna, fi’koogino? Xar yaqanu o fi boog ke ta layoonga yee o ɓogoox soo xool!»

¹⁴Maaga, Naaman a fudooxa no xuluɓ olaa Yordaan, a mudnoox taaga boo a caf ɓetaa ƭaq, ne o kiin Roog oxaa a heblit’uuna o ten, soo cer um a suptoox, a nandat nen cer no njaaƈ, ta xool.

¹⁵Cinj kaaga, a nomtooxa maa no kiin Roog oxaa, ten fo a ƭat um fop. Ye ta fadiidna, a geenooxa mbaambir um, a layin ee: «Andaam ee no lanq ke fop jegee roog fa lakas, a refangee Roog fee Isra’el. Ndiiki koy, kaam xeɗang o jaɓ ci’it ne o tag of a yentiidna na caf of.»

¹⁶Eliise a doonaan ee: «Ne ta wooritna yee o Yaal oxe xe ñoowaa, ten fee refuuma o tag um, neene a woortu yee jangkiim teen dara.» Naaman a saya, ndaa Eliise a faña faƥit.

¹⁷Maaga, Naaman a laya yee: «Feek fañaa ci’it ne mi, kaam xeɗang o ci’aam, mi fee o tag of, suf perkele ƭik no lanq, yaam bugatiim o ɓoxot a roog fa lakas sadax toxel mbaat sadax kuu ta waagna waag o ref, a refangee o Yaal oxe soom.

¹⁸Kaa koy, yaasam o Yaal oxe a waasanaam kene: Mbanuu o yaal mbind es a rokaa no mbind a qeƭ ne Rimon, ndax ta gung teen, kaam gungandooraa fo ten maaga, yaam mi refu jawdiin um. Yaasam boog o Yaal oxe a waasanaam, yaa um gungaa no mbind a qeƭ ne Rimon fee roog um.»

¹⁹Eliise a doonaan ee: «Reti na jam.» Cinj ye Naaman a retna boo a goƭkaa a Eliise,

²⁰Gehasi fee surga Eliise fee o kiin Roog a laya taa no yiif um ee: «O yaal mbind es a xaña a Naaman, o Aa-araam oxe, boo jangee dara no ke ta ɓisiid’uuna. Ndiiki koy, ne ta wooritna yee o Yaal oxe xe ñoowaa, neene a woortu yee xaye um daabin, jegit no ten tig.»

²¹Maaga, Gehasi a dalfooxa o ref no daabaa a Naaman. Ye Naaman a ƴookuuna a cinj um ta ƴufiidaa, a ñofa o foolit na sareet-xire le ten, a xetiid fo ten soo a laamtin ee: «Mbaar jam soom oo?»

²²Gehasi a doonaan ee: «Jam fa ƥor oo! O yaal mbind es luliidaxam, ndax um layong ee kaa jeg genar duleer ɗik waa sogna o mbadiidaa no mbind um, a inoor na xa coong axaa Efrayim. Kaa xeɗang, ndax o ci a den ngap kilo qarɓeen tadik xaaliis fo toki poƭtir ƭik.»

²³Naaman a doonaan ee: «Xaƴi um cooxong kilo qarɓeen ɓetuu fa leng.» Maaga, a saya soo a soɗ xaaliis fee na xa saaku xa ƭaq, a jang itam toki poƭtir ƭik ke, a coox keene fop ɗik no surga ke ten, da ngadooxanin a Gehasi.

²⁴Ye da mbadiidna no ñaang laa, Gehasi a jangta a den na xa ƥay den, a ɗasin a den kam mbind um soo a nomit surga kaa da ndet.

²⁵Cinj kaaga, Gehasi a nomtooxiida me Eliise fee o yaal mbind um, soo oxeene a laamtin ee: «Gehasi, mam inooro?» A doonaan ee: «Surga of ret’ee sen de!»

²⁶Eliise a layahinaan ee: «Kaa o foog ee a yiif es nga’ee o koor oxaaga foolitna na sareet um soo a xetiid fa wo? Ndax waxtu o jang xaaliis mbaat toki kaa fad, waxtu o jik taxar oliiw mbaat taxar biiñ, xa siir mbaat a ked, dag mbaat jeefeer?

²⁷A tik-a-maak ale Naaman xan a feelong, wo fo xa taan of boo kili.» Yaa Gehasi a inooraa maa Eliise rek, a tik-a-maak alaa a feelaan boo ta ranig taw nen fa liit.