Read NQAARIIT NE ROOG 2 Maad we 6 Bible Online

2 Maad we 6 - NQAARIIT NE ROOG bible

2 Maad we 6

¹We mbogna na yaj ale no duleer we a laya a Eliise yee: «Ga’aa yee o mbiñ onqe i mbokatooraa fa wo kaa fiiq na in.

²Xaƴi a in boog i ndet no xuluɓ olaa Yordaan, oxuu refna na in a god maaga a teex, soo i mbi’an a qoox in o moofand.» Eliise a doona a den ee: «Ndetyo.»

³O leng no duleer we a layaan ee: «Yaal mbind, gari yoon fa in!» Eliise a doonaan ee: «Iyo, aca i ndet!»

⁴Eliise a yoona fa den Yordaan, da ngodik maaga taxar.

⁵Ye o leng na den a godaa a teex um, ɓaax le a paloorta na kongos ale, a yen kam foofi le. O koor oxaaga a dalfooxa o saƥoox ee: «Sabab a jega de, yaal mbind, yaam kaam luɓ ɓaax le.»

⁶O kiin Roog oxe a laamtaan ee: «Mam a yenu yee?» A lalaan me ta yenna. Maaga, Eliise a ɓola o saangaan, a deɓin maaga. Ndak fo ndak, njelem naa a humbiida.

⁷Eliise a layaan ee: «Xoteen.» O koor oxaa a letna o ɓay um, a xot ɓaax laa.

⁸Ye o maad oxe Araam a xire’aa fo Ii-isra’el we, a laamtira fo aa-adax no xiixire we ten soo a lay a den me saŋe um a refkaa.

⁹Kaa koy, o kiin Roog oxe a lulta maa no maad oxe Isra’el, ndax ta layanel o ten me ta wareerna o reef, yaam ne Aa-araam we a ndalna maaga.

¹⁰Maaga, o maad oxe Isra’el a lula goor da ngorook o mbiñ onqaaga, o kiin Roog oxe a lay’uuna. Kene a mer’a o xewaa: Eliise a maƭooxooga o maad oxe Isra’el, too oxeene a wootooxooga a paax.

¹¹O maad oxe Araam a jaaxiɗ’a lool no kaaga. A xoya aa-adax we, a lay a den ee: «Layangaamoo a karaɓaane fee kam in farna fo o maad oxe Isra’el!»

¹²O leng no aa-adax we a doonaan ee: «Daali maad, karaɓaane fa leng refee kam in! Kaa koy, o tuleer Eliise fee refna kam Isra’el na layaa o maad oxe Isra’el ke o layaa na ndok ale o fe’aa sax.»

¹³O maad oxe a laya a den ee: «Ndetyo ƭeetik me ta refna, cinj kaaga, xam lul wiin, da ndamkin.» Ye ta yegneena yee oxaay Dotan,

¹⁴a hebla maaga pis fo a sareet-xire fo a yaj no xiixire a cegu doole. Weene a mbadiid’a o yeng soo a mbid teeru fee o kurul-keƥ.

¹⁵Ye surga fee Eliise inoox’ina ƥiiɓ teel, a sutoox teeru faa, a ga’na xiixire we fo pis ke fo a sareet-xire ke mbid’ina teeru fee, a laya a Eliise yee: «Yaal mbind, sabab a jega de! Xar i mbi’kaa koy?»

¹⁶Eliise a doonaan ee: «Ba o diid, yaam we ndefna fa in moƴu o may we ndefna fa den.»

¹⁷Eliise a xeɗa, a lay ee: «O Yaal oxe, kaam xeɗang o wet a kid um, ndax ta ga.» O Yaal oxe a weta a kid ake na surga fee Eliise, soo ta ga ee o joong ole me widna a Eliise kaa may fo pis fo a sareet fiɗel.

¹⁸Aa-araam we a ngara me Eliise, soo ta xeɗ o Yaal oxe, a lay ee: «Kaam xeɗang o fuulin a yaj aleeke!» Maaga, o Yaal oxe a fuulna a den, ne Eliise a xeɗit’uuna.

¹⁹Eliise a laya a den ee: «A ƭat ale refee meene de, too teeru fee refee meene itam. Ndeefaamoo, um ɓis a nuun maa no koor oxe nu mbaaƭaa!» Maaga, a ɓisa a den na teeru faa Samari.

²⁰Ye da ndokna kam Samari, Eliise a xeɗa yee: «O Yaal oxe, weti a kid den ndiiki, ndax da nga!» O Yaal oxe a weta a kid den, soo da nga ee a ndeer teeru fee Samari a ndeeƭatu.

²¹Ndak fo ndak, ye o maad oxe Isra’el a ga’na a den, a laya a Eliise yee: «Faapa, ndax kaam warnoorkaa a den?»

²²Eliise a doonaan ee: «Ha’aa! Ba o warnoor a den. Ndax naagaa warnooraa we o damtaa na xire? Diƈani a den da ñaam, a yer, cinj kaaga o nomit a den maa no maad den.»

²³O maad oxe Isra’el a roxana a den ñaamel teyu, da ñaam, a yer, cinj kaaga ta xaƴ a den da nomtoox maa no maad den. No kaa xotitna maaga a yaj ake no Aa-araam we songiidoogatee saax le Isra’el.

²⁴Taa mbaambir naa, Ben-Hadad fee o maad Araam a fokata xiixire we ten fop soo a gar, a wid teeru fee Samari o kurul-keƥ.

²⁵Maaga, biim maak a jeg’a kam teeru faa. Xiixire we kaa miñ’u o mbid teeru fee o kurul-keƥ boo sax xoox o faam a jarataa maaga xa qanjar qarɓeen ɓetuu tadik xaaliis fa nqoolu, soo liibar ndeep a nuukuur a jaraa xa qanjar xa ƥetaq.

²⁶Bes, a jopir o maad oxe Isra’el a reefaa took saŋe ne, o tew a falalooxaan ee: «Daali maad o yaal es, ƴufgaam!»

²⁷O maad oxe a doonaan ee: «O Yaal oxe a ƴufgangirang, xar um ƴufgitkang! Jegatiim o mbep, biiñ ne’aand.»

²⁸Yaqanee koy, o maad oxe a laamtaan ee: «Xar bugo?» O tew oxe a doonaan ee: «O tew oxeeke kaa lay’aam ee: ‹Ɓisiidi o ƥeef i ƈaxin xaye, o feet i ƈax oxe na mi.›

²⁹Maaga, i njawa o ƥees soo ñaamin. No feet olaa koy, ye layanuuma yee: ‹Ɓisiidi o ƥeef, ndax i ñaamin›, a ɗasnaan.»

³⁰Ye o maad oxe a nanna a ƭelem akaaga no tew oxe, a faara toki um. Took faa a reeƭu, too we na teeru fee fop ndeeƭna a lanq a nga’’a yee o saaku a adin’u no cer um.

³¹O maad oxe kaa falalooxoogu yee: «Yaasam Roog a halakaam, yaa andoona yee xoox le Eliise fee o ƥiy Safat sambree fo o cok ole ten, ndeer mene fo o yaar.»

³²Eliise koy, kaa moof’u no mbind um, maak we na teeru fee a moof paam um. O maad oxe a lula o kiin maa ten, ndaa ye o tuleer oxe a helkaa fo fadiid, Eliise a laya maak waa yee: «Ndax nu nga’a yee o ƥiy o mbaawar onqene a luliida o kiin, ndax ta ɗeg xoox le mi. Mbootooxyo boog. Yaa o kiin oxeene a fadiidkaa, fat nu mbeg xa ton-maax axe boo waagkee o rok. Ndaa sax de kaa nand ee xa caf axe no yaal mbind um na naneel a cinj um!»

³³Ye Eliise a maadna o layaa, o maad[2] oxe a fadiida soo a lay ee: «Sabab fene fop o Yaal oxe ɓisiidun a in! Xar waagatum o yaakaar no ten boog?»