Read NQAARIIT NE ROOG 2 Maad we 8 Bible Online

2 Maad we 8 - NQAARIIT NE ROOG bible

2 Maad we 8

¹Eliise kaa lay’u o tew oxe ta xontooxnoor’ina o ƥeem ee: «Inooxi mene, wo fo ƥasil of, nu ndet muu nu andna, yaam o Yaal oxe xe gartaa kam saax le biim laa na refkaa meen boo xa kiid ɓetaa ƭaq.»

²O tew oxaa a fi’a ke o kiin Roog oxe a lay’uuna, a inoox fo ƥasil um, a genik no saax laa no Fiifilista waa boo a jeg maaga xa kiid ɓetaa ƭaq.

³A cinj xa kiid ɓetaa ƭaq axe, o tew oxaa a nomtoortiida no saax laa no Fiifilista waa, soo a xeɗook o maad oxaa, ndax ta daawatin mbind um fo o qol um.

⁴Kaa soƥ’u koy o maad oxe a joktooraa fa Gehasi fee surga no kiin Roog oxe, a layan ee: «Layangaam a pi a maak ake Eliise a fi’na fop.»

⁵Ye Gehasi a wetandooxaa o maad oxe, ne Eliise a xontooxnooritna o goor olaa xon’ina, ya no goor ole xontooxnoor’eena a fadiidaa, ndax ta xeɗoox o maad oxe mbind um fo o qol um. Maaga, Gehasi a foola a lay ee: «Daali maad, o tew oxe xey fo o ƥeem onqe Eliise a xontooxnoor’ina.»

⁶O maad oxe a laamta o tew oxe, soo ta wetandooxin fop. Cinj kaaga, o maad oxe a fokataan fo o leng no jaajal we ten, a lay oxeene yee: «Fat o tew oxene a ɓoxotel ke ta jeg’ina fop fo ke o qol um a watna fop, no kaa xotitna no ñaal naa ta sutooxna saax le a gar fa xaye.»

⁷Eliise a reta Damaas, a soƥ Ben-Hadad fee o maad Araam a jir. O maad oxe a yegne yee o kiin Roog oxe a gara meen.

⁸O maad oxe a laya a Hasa’el ee: «Xoti ci’it, ret maa no kiin Roog oxaa, o layin ta laamtanaam o Yaal oxe boo um and, ndax xam wod no jir lene.»

⁹Hasa’el a reta maa Eliise, a ɓislooxin ci’it no ke moƴna o faax kam Damaas, a sufin took keeleemb qarɓeen nahik. Ye ta fadiidna me Eliise, a layaan ee: «O tag of Ben-Hadad fee o maad Araam luliidaxam ee um laamtong, ndax xan a wod no jir le ten.»

¹⁰Eliise a doonaan ee: «Reti o layin ee xan a wod! Kaa koy, o Yaal oxe a feeñlaxam ee xan a xon faq.»

¹¹O kiin Roog oxe a xora, a ɗeetaa o mbiñ o leng soo a naag ciic a lool.

¹²Hasa’el a laamtaan ee: «O yaal es, xar taxu o loolaa?» Eliise a doonaan ee: «Yaam kaam and paaxeer ke o fi’kaa Ii-isra’el we. Xan o raaɓ teeru cegu saŋe ke den, xa pes axe den, o warit a den laƥ, duguñ xa teɓandoong axe den, soo rew we den na mbudkaa, o xiir a den.»

¹³Hasa’el a doonaan ee: «Xar refum, mi fee o ɓox ole tag of boo fadnaa a pi a maak aleene?» Eliise a layaan ee: «O Yaal oxe kaa feeñlaam ee wo na maadooxkaa kam Araam.»

¹⁴Hasa’el a inoora maa Eliise, a nomtooxiid me no yaal mbind um, soo oxeene a laamtin ee: «Xar Eliise a layong koy?» Hasa’el a doonaan ee: «Kaa layaam ee xan o wod!»

¹⁵No feet olaa, Hasa’el a janga kulooxel, a suupin na foofi, a hulin na mukit fee no maad oxe, soo ta xon. Hasa’el a rondandaan no maat naa.

¹⁶No hiid o ɓetkandeer ole no maat Yoraam fee o ƥiy Ahab too a ref o maad Isra’el, Yehoram fee o ƥiy Yosafat reeƭatu o maad Yudaa.[3]

¹⁷Xa kiid qarɓeen tadik fo xa kiid xa ƭaq a jeg’u, ye ta sogna refaa o maad. A maadooxa xa kiid ɓetaa tadaq kam Yeerusaleem.

¹⁸A reefa o jaf no maad we Isra’el, ne mbind Ahab a mbi’it’uuna. Kaa gilig’u o ƥiy o ndew Ahab, soo a fi kaa faaxeerna na kid no Yaal oxe.

¹⁹Kaa koy, o Yaal oxe bug’ee o moocand maat ne Yudaa, yaam kaa reg’u o tag um Dawid ee xan a jegaa kili o leng na xa taan um oxaa na maadooxaa.

²⁰No maat Yehoram, Ee-edoom we a siiknoora fo maat ne Yudaa soo a ndalnan a qoox den o maad.

²¹Maaga, Yehoram a reta Sa’iir fo a sareet-xire ke ten fop, soo Ee-edoom we a mbid a den o kurul-keƥ, ten fo aa-adax we na sareet-xire ke ten. Ndeer o yeng o njeek, o maad oxe a songa Ee-edoom we, ndaa a xawe[4], soo xiixire we ten a ƈuf no ƭiif kaa den.

²²No kaa xotitna na waxtu faaga, Ee-edoom we a njeg’ata a qoox den na Yudaa boo xaye. No camaane leng kut kaaga teeru fee Libna a jeg’ata a xoox um itam na Yudaa.

²³Ke yoqna na pi ake Yehoram fop, kaa mbindel no «Safe le no caloori ke no maad we Yudaa».

²⁴Yehoram a daba daan um, a gasel na ƥak ale Dawid, soo o ƥeem Ahasiya a rondandin.

²⁵No hiid xarɓaxay fo hiid o ɗikandeer ole no maat Yoraam fee o ƥiy Ahab kam Isra’el, Ahasiya fee o ƥiy Yehoram reeƭatu o maad Yudaa.

²⁶Xa kiid qarɓeen ƭik fo xa kiid xa ƭaq a jeg’u, ye ta sogna refaa o maad. A maadooxa o hiid o leng kam Yeerusaleem. Ya um Ataliya a ne’’e, a ref o ndaan Omri fee reeƭna o maad Isra’el.

²⁷Ahasiya a reefa o jaf ƥasil ne Ahab, a fi kaa faaxeerna na kid no Yaal oxe nen ƥasil ne Ahab ta fogit’ina.

²⁸Ahasiya a yoona fa Yoraam fee o ƥiy Ahab da ñoxorik fa Hasa’el fee o maad Araam na teeru faa Ramot kam Galaad. Kam a ñoq ale, Aa-araam we a ngaaña o maad Yoraam.

²⁹Maaga, o maad Yoraam a nomtooxa Yisre’el, ndax ta waadnoox kaañ ke Aa-araam we a ngaañit’uuna Rama, ye ta xire’aa fa Hasa’el fee o maad Araam. Ahasiya fee o ƥiy Yehoram too a ref o maad Yudaa a gara Yisre’el, a ɗeetiid a Yoraam fee o ƥiy Ahab, yaam oxeene kaa xij’u lool.