Read NQAARIIT NE ROOG 2 Maad we 9 Bible Online

2 Maad we 9 - NQAARIIT NE ROOG bible

2 Maad we 9

¹Bes, o tuleer Eliise a xoya o leng no duleer Roog we, a layin ee: «Kufooxi, xot o difooƭ diwliin olene soo ret Ramot kam Galaad.

²O fadangaa, fat o ret maa Yehu fee o ƥiy Yosafat too a ref o ndaan Nimsi. Fat o xoyin boo nu ngoƭ fog um, nu ndok na ndok alaa kesooxna.

³Fat o juurin o difooƭ diwliin ole took xoox, layin ee: O Yaal oxe kaa tee: ‹Kaam ɗuumong, ndax o ref o maad Isra’el!› Cinj kaaga, fat o wet begax ne soo ƴufiid no ñofu.»

⁴Maaga, o tuleer Roog oxe reeƭna o fes a dalfooxa o ret Ramot kam Galaad.

⁵Ye ta fadiidna koy, kaa soƥ aa-adax we no xiixire we Isra’el a njeg mbokatax. O tuleer oxaa a laya a Yehu yee: «Yaal mbind, jegaam ƥisnit of!» Yehu a laamtaan ee: «Me na an na in ɓisnee?» O tuleer oxaa a doonaan ee: «Me na wo fa xoox of sax, yaal mbind!»

⁶Yehu a inooxa, da ndok kam mbind naa, a nga’rik. O fes o duleer olaa a juuraan diwliin faa took xoox, a layin ee: «O Yaal oxe Roog fee Isra’el kaa tee: ‹Kaam ɗuumong, ndax o ref o maad Isra’el fee xeet es.

⁷Wo na saŋikkaa mbind Ahab fee o yaal mbind of. Neene, xam rabdinooxan duleer we dag es fo dag es lakas we fop Isebel a warnoorna.

⁸Xam saŋik mbind Ahab fop, xuuf o ñis no goor we no ƥasil um bo ta xet.

⁹Xam fi ƥasil ne Ahab ne fi’uuma ƥasil ne Yerobowam fee o ƥiy Nebat fo ne fi’uuma ƥasil ne Baasa fee o ƥiy Ahiya.

¹⁰Xan xa ƥox axe a ƈaxit a Isebel na xa saawit axe Yisre’el, too jegkee o leng oxaa gasuuna.› » Cinj ye ta layna keene, a dalfooxa o wet begax ne soo a ƴuf.

¹¹Ye Yehu a nomtooxiidna me no dag lakas we no yaal mbind um, weene a laamtaan ee: «Mbaar jam soom oo? Xar o ƭof oxaana a xoytoogong?» Yehu a doona a den ee: «Co! refee dara. Nu anda duleer wene rek, kuu yoqeerna a mbaagaan o lay.»

¹²A layahinaan ee: «Kaaga xa koɓong oo! Layi rek ke xewna!» Yehu a laya a den ee: «Kaa layaam ee: ‹O Yaal oxe kaa tee: Kaam ɗuumong, ndax o ref o maad Isra’el.› »

¹³Ndak fo ndak, aa-adax waa a mbola sabadoor den, a ƭaapanin a Yehu no toŋ-toŋ olaa, a ndef no luuƥaa soo a mbalalooxaa yee: «Yehu a refata o maad!»

¹⁴Neene, Yehu fee o ƥiy Yosafat, too a ref o ndaan Nimsi, a hiɓana a Yoraam o ngir. Kaa soƥ’u koy Yoraam fo Ii-isra’el we fop a nqoxtaa a Ramot kam Galaad no song ne Hasa’el fee o maad Araam.

¹⁵O maad Yoraam koy kaa nomtooxiid’u Yisre’el, ndax ta waadin kaañ ke Aa-araam we a ngaañ’uuna, ye ta xire’aa fa Hasa’el fee o maad Araam. Maaga, Yehu a laya yee: «A soƥangaa yee um ref o maad nu mbugu, mbi’yo fop boo ba o leng a sutoox teeru fee, a ret Yisre’el, a yegnitik ke xewna.»

¹⁶Cinj kaaga, Yehu a ŋaaya a sareet-xire le ten soo a ret Yisre’el, yaam maaga Yoraam a waadnooroogu, too Ahasiya fee o maad Yudaa a ɗeetik’un.

¹⁷O ƈooƴooklax oxe fod’ina no taax-took ne Yisre’el, a ƴooka faan le yoon’ina fa Yehu soo a lay ee: «Faan no wiin um ƴookaa.» Yoraam a layaan ee: «Luli o kiin, ta ŋaay pis, a xetik fa den, a laamit a den ee: ‹Mbaar jam soom oo?› »

¹⁸O ŋaaŋaay pis oxaa a dalfooxa o xetik fa Yehu a layin ee: «O maad oxe kaa tee mbaar jam soom oo.» Yehu a doonaan ee: «Xar a ƭat of a yongu teen? Laqtooxi fod a cinj es!» O ƈooƴooklax oxe a laya yee: «Oxe luleena a fada maa den, ndaa nomtooxiidee.»

¹⁹Yoraam a lula o ŋaaŋaay o lakas, ta fad a lay ee: «O maad oxe kaa tee mbaar jam soom oo.» Yehu a doonaan ee: «Xar a ƭat of a yongu teen? Laqtooxi fod a cinj es!»

²⁰O ƈooƴooklax oxe a ɓaata o lay ee: «O ƭikandeer oxe luleena a fada maa den, ndaa nomtooxiidahinee, too a ƈufnooƭ ale kaa nandtaam ale Yehu fee o ndaan Nimsi, yaam nen o ƭof a ƴufnitaa.»

²¹Maaga, Yoraam a laya yee: «Ngumnanaamoo a sareet-xire le mi», soo da ngumnanin o ten. Yoraam fee o maad Isra’el fa Ahasiya fee o maad Yudaa, oxuu refna na den a ŋaaya na sareet-xire um, a nqetik fa Yehu. A soƥaan no saawit ole Naboot fee gen’ina Yisre’el.

²²Ye Yoraam a fadiidna me Yehu, a laamtaan ee: «Yehu, mbaar jam soom oo?» Yehu a doonaan ee: «Jam mam! Mee ndax wo moƴu o and ee Isebel fee ya of kaa moƴ o jootnaa a paɗax ale no roog tefee ndigil ke fo pan ne.»

²³Yoraam a pula fo a laxaaɓ ale, a ƴuf soo a falaloox a Ahasiya yee: «Hey, hodeem de!»

²⁴Yehu a kafa a qali le ten, a dalfoox o xaƴ a kas. A diba a Yoraam ndeer a kand ake boo ta daaw xeeñ le, soo ta lup xoox kam a sareet-xire le ten.

²⁵Maaga, Yehu a laya a Bidkar fee jawdiin um ee: «Ɗooqi o dal ole, o deɓin kam o saawit ole Naboot fee gen’ina Yisre’el. Ndax wetandooxiro ke o Yaal oxe a lay’ina no maad Ahab fee faap um, ye i ndefna na sareet-xire leng, mi fa wo, ndeefan?

²⁶Kaa lay’u yee: ‹Ga’aam faak fo’oy le Naboot fo le na xa taan um ɓaxeena. Xam fi’ong leng kut ke no saawit olene sax. Mi o Yaal oxe layun.› » Yehu a ɓaata teen ee: «Ndiiki koy, ɗooqi o dal ole, o deɓin kam o saawit ole, ne o Yaal oxe a layit’uuna.»

²⁷Ye Ahasiya fee o maad Yudaa a ga’na keene, a dalfooxa o ƴuf, a jagin Bet-Gaan. Yehu a daabaan soo a lay yoon um da mbarin. Maaga, a ngaañtaan na sareet-xire le ten no ŋaayand naa Guur fee refna paam Ible’aam. Yaqanee koy, Ahasiya a ɗofta boo a fad Megido soo a xonit maaga.

²⁸Dag we Ahasiya a ndoona o dal ole na sareet-xire, a ƥisin Yeerusaleem, a ngasin me no daan um na ƥak ale Dawid.

²⁹Ahasiya reeƭatu o maad Yudaa no hiid xarɓaxay fo hiid o lengandeer ole no maat Yoraam fee o ƥiy Ahab.

³⁰Isebel a yega fop ke xew’ina. Maaga, a tusngulooxa, a heloox. Ye Yehu a rokiidaa Yisre’el, Isebel a foda no falangteer olaa, a wootnooxaa.

³¹Ye Yehu a roktiidaa no don-maax ole na teeru faa, Isebel a falalooxaan ee: «Mbaar jegataa jam, wo o baawar no yaal mbind of nen a Simri?»

³²Yehu a daxaƴooxa farna fo falangteer olaa, a falaloox ee: «An faru fa mi meene?» Maaga, dag ɗik mbaat daduk waa mbod’ina took, a mbootnoortiida no falangteer olaa.

³³Yehu a laya a den ee: «Njolniideenoo!» Maaga, a njolnitiida a Isebel no falangteer olaa, fo’oy le ten a sil no saŋe ne fo no pis ke, da nduutin.

³⁴Yehu a roka no mbind no maad ne, a ñaam, a yer soo a lay ee: «Topatooxyo koy maa nu ngasitna o dal ole no tew o kalakooxu xaana, yaam o ƥiy no maad oo.»

³⁵A ndeta, ndax da ngasin, ndaa xoox le fo a caf ake fo a tang ake na xa ƥay axe soom a nga’atu no ten.

³⁶A nomtooxiida, a yegnin a Yehu, soo oxeene a lay ee: «Keeke mat o Yaal oxe a lay’u a reefandin no tag um Eliya fee Tisbi yee: ‹Xan xa ƥox axe a ƈaxit cer ke Isebel no saawit ole Yisre’el,

³⁷too o dal um xan a ref nen a tos kam xa qol axe no saawit ole Yisre’el boo waagkataand o andid.› »