Read NQAARIIT NE ROOG 1 Caloori ke 11 Bible Online

1 Caloori ke 11 - NQAARIIT NE ROOG bible

1 Caloori ke 11

¹Xeet fee Isra’el fop a ngara a soƥiid a Dawid Hebron, a layin ee: «Fo’oy fo leng kut ole na ƴufaa ƴuf no cer of na ƴufaa no cer in itam.

²Yaaga Sawul a refaa o maad in, wo adooxanoogu xiixire we Isra’el, too o Yaal oxe Roog of a lay’aang ee: ‹Wo na gaykaa a Isra’el fee xeet es, kelfa’in.› »

³Neene maak we Isra’el fop a ngartu Hebron maa no maad oxaa, soo Dawid a hiɓoor fa den maaga mbaambir no Yaal oxe. Cinj kaaga, a ndoda a Dawid o maad Isra’el, ne o Yaal oxe a yegnitit’uuna a reefandin na Sami’el.

⁴Dawid fo xiixire we Isra’el fop a inooxana a Yeerusaleem, teeru feene ne’’ahineena Yebus yaam Yeeyebus we ngen’ina no jegel olaaga fop a ndal’a teen.

⁵Yeeyebus we a laya a Dawid ee: «Rokiidkiro mene muk!» Yaqanee koy Dawid a jaɓa saŋe naa Siyoŋ ne’’ateena a ƥak ale Dawid.

⁶Dawid kaa lay’u yee: «Oxe na eetkaa o xaw o leng no Yeeyebus we na refkaa farɓa fa maak fee mi.» Yowab fee o ƥiy no tew o ne’e Seruya a eeta o song, soo a refat o aa-adax.

⁷Dawid a dala no saŋe naa. Ten taxu ta ne’el a ƥak ale Dawid.

⁸Cinj kaaga, a maxa me widna teeru faa fop, a xotit Milo fo me widuuna, soo Yowab a maxatin ke yoqna na teeru faa.

⁹Neene boog, Dawid kaa moƴ’u o jegaa doole, yaam o Yaal oxe Hupna fop kaa reeƭu fo ten.

¹⁰Keeke ndefu a kon ake no xir say we Dawid, den fo Ii-isra’el we fop ndamit’uuna ye ta refaa o maad ne o Yaal oxe a heblit’uuna na Isra’el.

¹¹Xir say weene ndeeƭu: A jeg’a a Yasobe’am fee o ƥiy Hakmoni moƴ’ina o jambaar no cambaar tadik ke. O ten warit’u goor teemeed tadik a salma um na ñoq a leng.

¹²A cinj oxeene, a jeg’a a Eleyasaar fee o ƥiy Dodo, a ref itam o ndaan Ahowa, a fog no cambaar tadik ke.

¹³A yoon’a fa Dawid Pas-Damim ye Fiifilista we a mbokatoorna ndax da ñoxor fa den. Xiixire we Isra’el kaa ƈuf’u mbaambir den. A jeg’a maaga koy o qol lorso.

¹⁴Eleyasaar fo goor we ten a naanga jiŋ ndeer o qol olaa, a nqoxtin soo a nqaw Fiifilista we. Neene, o Yaal oxe a muclita a Isra’el o ndam o maak.

¹⁵Bes, goor daduk waa mbog’ina no aa-adax qarɓeen tadik we a soƥiida a Dawid no luf naa Adulaam, a soƥ faan no Fiifilista a ndal na yulanq alaa no Reerefa we.

¹⁶Ye Dawid a refna kam saŋe naa, yaaga a qaaj a leng no xiixire we no Fiifilista we owaa ndala Betleheem.

¹⁷Dawid a diilooxa soo a lay ee: «Ey, um waag’ange o ci kaa yeruuma no foofi laa na ngas alaa refna no ndokand naa Betleheem.»

¹⁸Maaga, cambaar tadik[30] kaa a nqota a ƭat, a nqaañ maa Fiifilista waa a ndal’ina, a ƈeew no foofi laa na ngas alaa refna no ndokand naa Betleheem rek, a ƥisiidin a Dawid. Kaa koy, oxeene bug’iran o yer, ndaa a ɓaxanaan o Yaal oxe a lanq,

¹⁹a lay ee: «O Yaal oxe, yaa boo muk um yer foofi lene! Ndax kaa nandee sax fo fo’oy le no goor wene njikooxna xa ñis den ye da mbaaƭkan?» Naaga, a fañaan o yer. Keene cambaar tadik keene a mbi’u.

²⁰Abisay fee o maag Yowab adooxan’u a yaj ale no xir say qarɓeen tadik we. Ten dib’u goor teemeed tadik a sakoor ale ten, a war a den. Naaga, gon um a joot’a ndaa daawee ake no cambaar tadik ke.

²¹Ten moƴ’u o jeg gon a ndeer a yaj ale no xir say qarɓeen tadik we boo a adooxanat a den sax, ndaa koy tax’ee ta fodir fo daduk we.

²²Benaya fee o ƥiy Yehoyada fee gen’ina Qabse’el, o qiixire maak oxaa fi’’ina caloori mayu a reeƭu. O ten o mat war’u a salma-koor a ƭak akaa ngen’ina Mowaab, soo a rok kam a ngas a warik njogoy, a jopir a teƥ nees.

²³O ten war’u itam o Miimisira xaa geel um a fi’na xa noonoong xa ƥetaq. O Miimisira xeene kaa saq’u a salma laa fodna fo mbiic no yaal a tiwand, soo ta xetik fo ten fo o loq, a jaɓit a salma le na xa ƥay um, a wartin o ten.

²⁴Keene ndefu caloori ke Benaya fee o ƥiy Yehoyada a fi’’ina, too gon um a joot’a nen cambaar tadik ke.

²⁵A fog’a no we moƴ’ina o njeg gon a ndeer xir say qarɓeen tadik we, ndaa koy tax’ee ta fodir fo daduk we. O maad Dawid a doxnaan ta adooxan we na yetooxan.

²⁶Xir say lakas we mat a ndeeƭa: Asa’el fee o ndeɓ Yowab, Elxanan fee o ƥiy Dodo fee gen’ina Betleheem,

²⁷Samot fee gen’ina Harod, Heles fee gen’ina Pelon,

²⁸Ira fee o ƥiy Iqees gen’ina Tekowa, Abiyeseer fee gen’ina Anatot,

²⁹Sibkay fee gen’ina Husa, Ilay fee gen’ina Ahowa,

³⁰Mahray fee gen’ina Netofa, Heled fee o ƥiy Baana gen’ina Netofa,

³¹Itay fee o ƥiy Ribay gen’ina Gibe’a kam o fiisel ole Bensame, Benaya fee gen’ina Piraton,

³²Xuray fee gen’ina na xur faa Gaas, Abi’el fee gen’ina Bet-Araba,

³³Asmawet fee gen’ina Baharum, Elyahba fee gen’ina Saalbon,

³⁴Hasem fee gen’ina Gison, Yoonatan fee o ƥiy Sage gen’ina Harar,

³⁵Ahiyam fee o ƥiy Sakar gen’ina Harar, Elifaal fee o ƥiy Uur,

³⁶Hefeer fee gen’ina Mekera, Ahiya fee gen’ina Pelon,

³⁷Hesray fee gen’ina Karmel, Naaray fee o ƥiy Esbay,

³⁸Yowel fee o ndeɓ Natan, Mibhar fee o ƥiy Hagri,

³⁹Selek o Aa-amon oxe, Nahray fee gen’ina Beerot o saasaq oxe no ƥonax ke Yowab fee o ƥiy no tew o ne’e Seruya,

⁴⁰Ira fa Gareb we ngen’ina Yeter,

⁴¹Uriya o Heeheet oxe, Sabad fee o ƥiy Ahlay,

⁴²Adina fee o ƥiy Sisa, o leng no aa-adax we na carind ale Ruben, a yoon fo xiixire qarɓeen tadik,

⁴³Hanan fee o ƥiy Maaka, Yosafat fee gen’ina Meten,

⁴⁴Usiya fee gen’ina Asetarot, Sama fa Ye’iyel we xa ƥiy Hotam ngen’ina Aroweer,

⁴⁵Yeja’el fee o ƥiy Simri fa Yoha fee o ndeɓ um ngen’ina Tis,

⁴⁶Eli’el fee gen’ina Mahawa, Yeribay fa Yosawiya we xa ƥiy Elnaam, Yitma fee gen’ina no saax laa Mowaab,

⁴⁷Eli’el, Obed fa Yaasi’el fee gen’ina Mesoba.