Read NQAARIIT NE ROOG 1 Caloori ke 13 Bible Online

1 Caloori ke 13 - NQAARIIT NE ROOG bible

1 Caloori ke 13

¹Dawid a gar’a fo aa-adax no xiixire juni we fo aa-adax no xiixire teemeed we fo aa-adax lakas we fop.

²Cinj kaaga, a lay’a Ii-isra’el we mbokatoorna fop ee: «A soƥangaa yee nu nga’taan naa faaxna too ta jofoox o Yaal oxe Roog in, fat i ñof o lul wiin me no fog in we yoqna kam Isra’el boo Isra’el a xet, moƴtaa sax me no saasadax we fo Leelewi we kam teeru ke fo xa cegel axe mbidna mene too da ngen maaga. Fat i nqur a den da soƥiid a in.

³Maaga, xan i ƥisiid arka ne no ngiɓoor ne Roog me in, yaam topatoox’aand na jamaane Sawul.»

⁴Mbokatax naa fop a laya yee fat naaga a fi’el, yaam kaaga a jofoox’a xeet faa fop.

⁵Maaga, Dawid a xoya Ii-isra’el we kam saax le fop, ke xotitna no ŋat olaa Misira no ɓemb-roog o ñamaak boo no ndokand naa Hamat no ɓemb-roog o janoon, ndax da nqotik arka ne Roog reeƭna Kiryat-Ye’arim.

⁶A yoona fo ten da ndet Baala, refna ref Kiryat-Ye’arim kam Yudaa, ndax da ƥisiid arka ne Roog. No arka neene koy a jeg’a gon le no Yaal oxe, too pindel yeeyetax a ndeegoox uum-maamaad le ten.

⁷A ndoona arka ne Roog took a sareet a qas, a nqottin no mbind Abinadab, soo Uusa fa Ahyo a ƭoxaa a sareet ale.

⁸Dawid fo Ii-isra’el lakas we fop kaa mbakoogu, a mbecaa mbaambir Roog fa doole, a ngimaa a yoonandtin a tiiti fo fo nqilimb fo a ñal fo a qiin fo a luuƥ.

⁹Ye da mbadiidna no cukand naa Kidon[31], Uusa a letna o ɓay um, a dam arka ne, yaam qoox ke kaa tolof’u.

¹⁰Maaga, fuux le no Yaal oxe a biltooxana a Uusa, soo ta xawin yaam ne ta duqna arka ne. Uusa a xona maaga mbaambir Roog.

¹¹Dawid a fuux’a no ke o Yaal oxe a duguñ’ina a Uusa. A ne’a o mbiñ onqaaga Peres-Uusa[32], too gon leene a maadu o xoyeel boo xaye.

¹²No ñaal naaga, Dawid a saɗar’a a Roog lool, a lay ee: «Nam um ɓekitkaa arka ne Roog no mbind es?»

¹³Dawid ɓek’ee arka ne no mbind um ne refna na ƥak ale Dawid, ndaa a ɓisaan no mbind Obed-Edoom fee inoor’ina Gaat.

¹⁴Arka ne Roog a jeg’a a qool a tadak no mbind Obed-Edoom, soo o Yaal oxe a barke a Obed-Edoom fo ƥasil um fo o jeg um fop.