Read NQAARIIT NE ROOG 1 Caloori ke 14 Bible Online

1 Caloori ke 14 - NQAARIIT NE ROOG bible

1 Caloori ke 14

¹Hiiram[33] fee o maad oxe Tiir a lula wiin maa Dawid, da ƥisin a teex ndaxar seedar, a lultin itam waa na sexaa a ƥil fo daadaaƴ ndax da njalanin mbind no maad.

²Dawid a and’a yee o Yaal oxe fa xoox um sax dalin’un o maad Isra’el soo a fi ta maadooxaa fo o ndam yaam Isra’el fee xeet um.

³Dawid a waaƭit’ahina rew Yeerusaleem, a jeg fa den xa ƥiy[34] xa koor fo xa tew.

⁴Keeke ndefu a kon ake na xa ƥiy xa koor axe Dawid ndimteena Yeerusaleem: Samuwa, Sobab, Natan, Salomo,

⁵Ibhar, Elisuwa, Elpelet,

⁶Nooga, Nefeg, Yafiya,

⁷Elisama, Be’eliyada fa Elifelet.

⁸Ye Fiifilista we a yegna yee Dawid a dode o maad Isra’el, den fop a ndalfooxa o ndet, a songkin. Dawid a yega kaaga soo a xetik fa den.

⁹Fiifilista we a ngara boo na yulanq alaa no Reerefa we soo a njaɓin.

¹⁰Dawid a laamta a Roog ee: «Ndax waraam o songik Fiifilista we? Ndax xan o ɓoxot a den na xa ƥay es?» O Yaal oxe a doonaan ee: «Reti, yaam xam ɓoxot a den na xa ƥay of.»

¹¹Dawid a gara Baal-Perasiim[35], a xawit maaga Fiifilista we, cinj kaaga ta lay ee: «Roog a wetanaxam o gom a ndeer no fañ we mi ndefna mbaambir es nen o quuy olaa foofi a fi’na.» Ten taxu o mbiñ onqaaga a ne’el Baal-Perasiim.

¹²Fiifilista we a nqaƴa maaga nitaal roog ke den, soo Dawid a simit da ndoxel.

¹³Fiifilista we a songiidahina soo a pictoor na yulanq alaa.

¹⁴Dawid a laamtahina a Roog, soo ta layin ee: «Ba o xetik fa den, ndaa laqtooxi den a cinj, garit me jasnoorna fo kaan ke.

¹⁵Boo nanoona fangax a caf na xa cul axe no kaan ke, fat o ñof o song a den, yaam na waxtu faaga, mi Roog, xam ñaaƴ mbaambir of, ndax um xaw saŋe ne no Fiifilista we.»

¹⁶Dawid a fi’a ke Roog a hebil’uuna. Neene, a nqawa Fiifilista we soo a ndaabit a den Gibe’on boo no ndokand naa Geseer.

¹⁷No kaa xotitna maaga, gon le Dawid a joota kam a saax ake fop, soo o Yaal oxe a fi boo qeet ke fop a saɗarin.