Read NQAARIIT NE ROOG 1 Caloori ke 16 Bible Online

1 Caloori ke 16 - NQAARIIT NE ROOG bible

1 Caloori ke 16

¹A cinj ye arka ne Roog a ɓisiideena boo a ɓekel kam ƭiif ne Dawid a sipan’uuna, a ƥoxota a Roog sadax toxel fo sadax camsa’oor.

²Ye Dawid a ƴutna a ƥoxot ale no sadax ke, a barke’a xeet faa no gon le no Yaal oxe.

³A lasa Ii-isra’el we fop, goor fo rew, oxuu refna o ɗeg mbuuru fo o ɗeg a tegeƴ o juɗe fo o gaf olaa fi’teena xa tim biiñ.

⁴Dawid a fi’a Leelewi leng-leng mbaambir arka ne no Yaal oxe ndax da mbadnaa o far den, a mbetandooxaa, a tagasaa soo a simataa o Yaal oxe Roog fee Isra’el.

⁵Asaf ɗoxoogu a den soo Sakari a dimle’an. Yasi’el, Semiramot, Yehi’el, Matitiya, Eliyab, Benaya, Obed-Edoom fa Ye’iyel nqilmboogu, a ndiiti’aa, Asaf o mat a fakaa a qiin ake.

⁶Benaya fa Yahasi’el ndefna saasadax njibnoogu a luuƥ ake a taar o marin mbaambir arka ne no ngiɓoor ne Roog.

⁷A koom refu jaf eetaand le Dawid a gadinna a Asaf fo fog um da tagas o Yaal oxe.

⁸Ngidimyo o Yaal oxe, ƈufginoox gon um. Andnooryo a pi a maak ake ten a ndeer qeet ke.

⁹Ngimaneenoo, nqaanin, layit com’andtu ke ta fi’na fop.

¹⁰Mbakooryo gon tedu le ten. Yaasam a qeeñ no we na mbaaƭaa o Yaal oxe a mbelakinoox!

¹¹Mbaaƭyo o Yaal oxe fa doole um, ngen no mbaaƭaa mukit um.

¹²Mbetandooxyo com’andtu ke ta fi’na, mbetandoox comlaand ke ten fo kate ke ten,

¹³nuun we mbaqaqoorna na Isra’el fee o tag um, xa taan Yakoob axe ta jilna.

¹⁴Ten refu o Yaal oxe Roog in, kate um a langaamoox lanq ke fop.

¹⁵Mbetandooxyo kili ngiɓoor um, fa lay um fee ta cooxna suk cuni-cuni.

¹⁶Ten refu ngiɓoor ne ten fa Abraham, soo a woornitin a Isaak fo a taaƥ.

¹⁷Kaa dalnanin a Yakoob nen bargal, ngiɓoor naa na refkaa boo faw na Isra’el,

¹⁸ye ta layna yee: «Xam cooxong lanq ke Kanaan, o jegkin, wo fo xa taan of.»

¹⁹Weene may’ee dara, ndax a ndef xa kataakoon no saax le.

²⁰Kaa njoqooyooxoogu a ndeer saax fo saax, a ndeer maat fo ngend um.

²¹Ci’ee o leng ta ñagadil a den, too a xawa maad yaam den, a lay ee:

²²«Ba nu nduq we ɗuumuuma, duleer es weene, ba nu mbi a den paaxeer!»

²³Nuun adna fa muum, ngimanyo o Yaal oxe! Naangyo yegnitaa ñaal oo ñaal yegil mbaax ne na muc ale ten.

²⁴Lambinyo o ndam um a ndeer a saax ake, com’andtu ke ten a ndeer qeet ke fop,

²⁵yaam o Yaal oxe a magna too a simat jombiran. Ten moƴu o saɗarnoox roog lakas ke fop,

²⁶yaam roog ke no qeet ke fop roog tefee ndigil a ndefu, ndaa o Yaal oxe saku asamaan fee.

²⁷A qooland fo o niwel mbodun mbaambir, katil fo o ɗaay a ndef no Ngenand um.

²⁸Nuun qeet ke na saax ake fop, ƥoxotyo o Yaal oxe o ndam um fa katil um.

²⁹ƥoxotyo gon le no Yaal oxe o ndam, ngariid mbaambir um, ƥislooxiid ci’it nuun. Ngungyo mbaambir no Yaal oxe, yaa ta feeñkaa kam o tedel um.[36]

³⁰Sendyo mbaambir um, nuun adna fa muum. Lanq ke kaa saƭik koŋ, too sendkee muk.

³¹Fat asamaan a felakinoox, lanq ke a ndef no ɗaay! Yegnityo a ndeer qeet ke yee: «O Yaal oxe refu o maad!»

³²Fat o maag ole a fangoox, ten fo ke refna teen fop, a koƥ ale a felakinoox fo fop ke ta saqna.

³³Fat taxar ke na suungaan ake a njibin xa ƈeel mbaambir no Yaal oxe, yaam oxe garaa, ndax ta hate adna fee.

³⁴Ngidimyo o Yaal oxe, yaam a faaxa, too o mbeq um xan a maadaa boo faw.

³⁵Layyo yee: «Roog o Muumucil in, mucli a in. Fokati a in, muclit a in a ndeer qeet ke, ndax i ƥoxot gon tedu of o ngidim, too nqaaƴoortaa a simat of.»

³⁶O Yaal oxe Roog fee Isra’el a hela gidmeel bo na moos boo moos! Maaga, xeet faa fop a laya yee: «Amiini!», soo a simat o Yaal oxe.

³⁷Dawid a doona a Asaf fo fog um mbaambir arka ne no ngiɓoor ne no Yaal oxe, ndax da mbadnaa o far den kili mbaambir arka ne, ne ta dalniteena bes fuu refna,

³⁸fa Obed-Edoom itam fo wiin qarɓeen ɓetuu fa leng fo wiin ɓetuu daduk no fog um. Obed-Edoom fee o ƥiy Yedutun fa Hoosa ndeeƭu yeeyetax we na xa ton-maax axe.

³⁹Dawid a doona a Saadok fee o saasadax oxe fo saasadax we fog Saadok no Ngenand ne no Yaal oxe reeƭna no ñaang sadaxand laa Gibe’on,

⁴⁰ndax da ƥoxotaa kili o Yaal oxe sadax toxel ke took o sadaxand ole, nqes fo kirand, soo a mbadnaa o far den ne ta bindteena no kebil ke o Yaal oxe a cooxna a Isra’el.

⁴¹A yoon’a fa Hemaan fa Yedutun fo goor lakas waa njileena, ndax da simataa o Yaal oxe, yaam o mbeq um xan a maadaa boo faw.

⁴²Hemaan fa Yedutun topatooxoogu a luuƥ ake fo a qiin ake no faafak we fo itam pakir lakas ke yoonandtoogeena a kim Roog ake. Xa ƥiy axe Yedutun o mat yeeyetax a ndeeƭu na xa ton-maax axe.

⁴³Cinj kaaga, xeet faa fop a nqaada, oxuu refna no mbind um. Dawid itam a xaada, a simnik wiin mbind um.