Read NQAARIIT NE ROOG 1 Caloori ke 18 Bible Online

1 Caloori ke 18 - NQAARIIT NE ROOG bible

1 Caloori ke 18

¹Cinj kaaga, Dawid a xawa Fiifilista we, a fudin a den, soo a jaɓit na den teeru fee Gaat fo caate ke ta waxooxna.

²A xawa itam Moomowaab we, soo da ƥoxotoox no ten, a ndabdatan a bateer.

³Dawid a xawta a Hadadeseer fee o maad Cooba farna fa Hamat, ye oxeene a bugna o jangatin o jegel ole no xuluɓ ole Ofrat.

⁴Dawid a janganaan a sareet-xire juni fo ŋaaŋaay pis cuni ɓetuu ƭik fo xiixire ñaañaaƴ cuni qarɓeen ƭik. A ɗega xa tod axe no pis ke fop, a cinj ye ta kesna teen teemeed.

⁵Aa-araam we Damaas a ƈufgiida a Hadadeseer fee o maad Cooba, soo Dawid a war na den goor cuni qarɓeen ƭik fo goor cuni ƭik.

⁶Cinj kaaga, Dawid a dalna xiixire kam Araam fee Damaas, soo Aa-araam we a ƥoxotoox na Dawid, a ndabdatan a bateer. Neene, muu Dawid a ret’ina, o Yaal oxe a ci’oogaan o ndam.

⁷Dawid a janga pegoor wurus ke xiixire we Hadadeseer a saq’ina, a ɓis a den Yeerusaleem.

⁸Dawid a jangtahina xanjar fa mayu Tibhat fa Kuun mbogna no teeru ke Hadadeseer. Salomo a jiriiñoora xanjar fa mayu feene ndax ta jal o waaŋaan o maak ole fo a toodook ake fo xa ƥaxañ xanjar axe no Mbind Roog ne.

⁹To’u fee o maad Hamat a yega yee Dawid kaa xaw’u xiixire we Hadadeseer fee o maad Cooba fop.

¹⁰A lula o ƥeem Hadoram maa no maad Dawid, ndax ta daawnin simin um soo a kañin, yaam ne ta songna a Hadadeseer, a xawin. Ke garitna keene koy refu yee To’u kaa fañroogu fa Hadadeseer. A lulta a Dawid itam kaa jalteena xaaliis fo kaa jalteena wurus fo kaa jalteena xanjar.

¹¹O maad Dawid a kesanaan o Yaal oxe ne ta fi’it’uuna na xaaliis fee fa wurus fee ta jaɓit’ina no qeet lakas keeke: Ee-edoom we, Moomowaab we, Aa-amon we, Fiifilista we fo Aa-amalek we.

¹²Abisay fee o ƥiy no tew o ne’e Seruya a xawta Ee-edoom we na yulanq alaa no fo jem olaa, a war na den cuni xarɓaxay fo cuni ɓetuu tadik.

¹³Dawid a dalna xiixire kam Edoom, soo Ee-edoom we fop a ƥoxotoox no ten. Neene, muu Dawid a ret’ina, o Yaal oxe a ci’oogaan o ndam.

¹⁴Dawid a maadooxanooga a Isra’el fop. A ƭat fo o cofel rek a ɗoxtoogu xeet um.

¹⁵Yowab fee o ƥiy no tew o ne’e Seruya reeƭu farɓa fa maak fee ten, Yosafat fee o ƥiy Ahilud a ref o keegeek cosaan oxe,

¹⁶Saadok fee o ƥiy Ahituub fa Ahimelek fee o ƥiy Abiyataar a ndef saasadax we, Sawsa a ref o piibind oxe,

¹⁷Benaya fee o ƥiy Yehoyada a adooxan Keekeret we fo Peepelet we yetooxoogna o maad oxe, soo xa ƥiy axe Dawid a kelfa weene fop.