Read NQAARIIT NE ROOG 1 Caloori ke 19 Bible Online

1 Caloori ke 19 - NQAARIIT NE ROOG bible

1 Caloori ke 19

¹Cinj kaaga, o maad oxe no Aa-amon we refna Naahas a xona, soo Hanuun fee o ƥeem a rondandin.

²Dawid a laya yee: «Xam lal a Hanuun fee o ƥiy Naahas o paaxel es, ne faap um a fi’anit’axama o ten.» Naaga, Dawid a lula kelfa leng-leng, ndax da njaapik a Hanuun na mboy ale faap um. Ye kelfa keene a mbadiidna me Hanuun no saax le no Aa-amon we ndax da njaapin,

³gelwaar we no Aa-amon we a ngara, a lay a Hanuun ee: «Kaa o foog ee ndax ta niw a faap of doŋ taxu Dawid a lultiidong wiin da njaapiidong? Mee ndax o ngoroox teeru fee boo a mbaagin o ngef taxu ta luliid kelfa kene paam of!»

⁴Maaga, Hanuun a dalfooxa o damnoor kelfa kaaga Dawid a luliid’ina, a ruusnoor a den, a ɗegnoor itam tikoorik ke den boo na puƭ ake, soo cinj kaaga ta rax a den,

⁵da ndet. Ye Dawid a yegneena ke dal’ina kelfa keene, a lula wiin da nqetik fo weene ngac’and’eena tigi, ndax da ndaawnel fa lay feeke no maad oxe yee: «Fat nu yoq Yeriko boo yaa xa taatam axe nuun a saxatinna, soo nu sog o mbaag o nomtooxiid mene.»

⁶Aa-amon we a and’ata koy ee a mbuuxnoora a Dawid. Ten taxu Hanuun fo Aa-amon we a njaɓ o ndabid Aa-araam we Mesopotami fo we Maaka fo we Cooba parig teemeed tadik fo parig qarɓeen nahik xaaliis fa nqoolu ndax da njeg a sareet-xire fo xiixire ŋaaŋaay pis.

⁷A ndaawa a sareet-xire cuni qarɓeen tadik fo cuni ƭik, a nqot o maad oxe Maaka fo xiixire um, soo da ngar a ndal me widna a Medeba. Aa-amon we mat, a sutoora no teeru ke den, a mbokatooran a ñoq ale.

⁸Yaa Dawid a yeguuna, a dalfooxa o hebil a Yowab fo xiixire we fop da ñof o nqetik fa den.

⁹Aa-amon we a sutooxa, a njagandooxan a ñoq ale mbaambir ndokand ne na teeru fee. Maad we ngar’ina koy, kaa kesoox’u na xa saawit axe.

¹⁰Ye Yowab a ga’na yee kaa narel o songit mbaambir oo, a cinj oo, a jila we moƴna ndef goor a ndeer a yaj ale no Ii-isra’el we, da njasnoor fo Aa-araam we,

¹¹soo we yoqna no xiixire we, ta doxin a den a Abisay fee o maag um, da njasnoor fo Aa-amon we.

¹²Yowab a layaan ee: «Aa-araam we a ngupangaam doole, fat o ƴufgiidaam, soo wo itam oo, Aa-amon we a ngupangaang doole, xam ƴufgiidong.

¹³Saqi njambaar boog, too i saƭakinoox yaam xeet in fo teeru ke Roog in. Fat o Yaal oxe a fi ke jofooxuuna!»

¹⁴Maaga, Yowab fo a yaj um a ƥeriida ndax da song Aa-araam we, soo weene a ƈuf mbaambir den.

¹⁵Ye Aa-amon we a nga’na Aa-araam we a ƈufaa, den oo a ƈufa mbaambir Abisay fee o maag Yowab, a nqaad na teeru den. Maaga, Yowab a xaada Yeerusaleem.

¹⁶Ye Aa-araam we a nga’na yee Ii-isra’el we kaa nqaw’u a den, a lulta a nqoyankel Aa-araam we ngenna no saax o lakas ole no o xuluɓ ole Ofrat. Sobak[38] fee o aa-adax oxe no xiixire we Hadadeseer adooxan’u a den.

¹⁷Ye Dawid a yegna kaaga, a fokata Ii-isra’el we fop, a xaañ a Yordaan, a gar boo paam den, soo a waajan a den. Dawid a jagandooxana a ñoq, soo Aa-araam we a ndef no ñoxoraa fa den.

¹⁸Kaa koy, a ƈufa mbaambir Ii-isra’el we, soo Dawid a waran a den ƴuuƴufin a sareet-xire cuni ɓetuu ƭik fo xiixire cuni qarɓeen nahik waa na ñaaƴaa fo xa caf den. A wara itam a Sobak fee o aa-adax oxe no xiixire we Hadadeseer.

¹⁹Ye maad we ƥoxotoox’ina na Hadadeseer fop a nga’na yee Ii-isra’el we kaa nqaw’u a den, a njamoora fa Dawid, a ƥoxotoox no ten. No kaa xotitna maaga, Aa-araam we saɗ’atee muk o ƈufgiid Aa-amon we.