Read NQAARIIT NE ROOG 1 Caloori ke 21 Bible Online

1 Caloori ke 21 - NQAARIIT NE ROOG bible

1 Caloori ke 21

¹Bes, Saytaane[39] a hebooxaa o fi a Isra’el paaxeer, soo a riñ a Dawid ta lim Ii-isra’el we.

²Dawid a laya a Yowab fo aa-adax we no xiixire we ndeeƭna fo ten ee: «Ndetyo lim Ii-isra’el we fop, ke xottoonga Beer-Seeba no ɓemb-roog o ñamaak boo a damik Dan no ɓemb-roog o janoon too mbind a den ndax um and ne da mbodna.»

³Yowab a doonaan ee: «Daali maad, yaasam o Yaal oxe a mayƭand xeet fee boo a caf teemeed! Kaa koy, wo o maad oxe o yaal es, andum ndefee dag of den fop? Xar taxu o bug o and keene, soo gadnaa a Isra’el tooñ?»

⁴Kaa koy, o maad oxe supit’ee ke ta hebil’ina. Yowab a sutooxa a wid a Isra’el fop soo a nomtooxiid Yeerusaleem.

⁵A yegna a Dawid ke ta jeg’ina na lim ale: Isra’el a jeg’a goor cuni juni fo goor cuni teemeed waa mbaagna o ndet na xire, soo Yudaa a jeg goor cuni teemeed nahik fo goor cuni qarɓeen ɓetuu ƭik.

⁶Yowab koy lim’ee a carind ale Lewi fo ale Bensame nen a lakas ake, yaam kebil ne no maad oxe kaa janoonoox’un lool.

⁷A lim aleene koy fel’ee a Roog tus, soo ta xaw a Isra’el.

⁸Dawid a laya a Roog ee: «Fi’aam bakaad fa maak ye xalaatuuma keene! Ndiiki koy, waasanaam tooñ[40] neene, mi fee o tag of, yaam kaam fesoor nen o ƭof.»

⁹O Yaal oxe a laya a Gaad fee o ƭeet oxe Dawid ee:

¹⁰«Reti lay a Dawid ee: O Yaal oxe kaa tee o jil leng no tadik ke ta laykang, too xan a doonong o ten.»

¹¹Gaad a reta maa Dawid, a layin ee: «O Yaal oxe kaa tee: ‹Xar moƴanong,

¹²xa kiid xa tadaq biim, ndi fañ of a nqawang boo a qool a tadak akaa laƥ ne den a bugko saŋkaa, ndi laƥ ne no Yaal oxe fa piste fo malaaka fee no Yaal oxe a saŋkaa kam saax le Isra’el fop boo ñaal tadik?› Ndiiki koy, layaam ke um doonkaa oxe luliidaxama.»

¹³Dawid a doonaan ee: «Mi koy de jaaxɗaam lool, ndaa koy, o yen na xa ƥay no Yaal oxe moƴanaxam o yen no axe no wiin we, yaam o Yaal oxe a naaga o yirmaa.»

¹⁴O Yaal oxe a ɓisiida piste kam Isra’el, soo wiin cuni qarɓeen ɓetuu ƭik a nqon na xeet faa.

¹⁵O Yaal oxe a ɓisiida malaaka fee kam Yeerusaleem ndax ta fadin a qaw ale, ndaa ye ta ga’na malaaka fee na saŋkaa a fadnaa o far um, o Yaal oxe a ricooxa ɗom leene soo a lay a malaaka fee saŋkoogna xeet fee yee: «A deya! Ndiiki, fudni o ɓay of.» Kaaga oxaa soƥ’a malaaka fee no Yaal oxe paam cukand naa Arawna[41] o Yeeyebus oxe.

¹⁶Dawid a yoɗa a kid um, soo a ga malaaka fee reeƭna ndeer took fa lanq a woos laƥ um, a jagin Yeerusaleem. Maaga, Dawid fo maak we nderoox’ina xa saaku a ndalfooxa o ngung a lanq.

¹⁷Dawid a laya a Roog ee: «Mee ndax mi heblitu xeet fee a limel! Yaaga boog mi bakaadu, mi o mat tooñu! Wiin weeke mbi’ee paaxeer leng. O Yaal oxe Roog es, ba o xaw xeet fee, ndaa mi fo ƥasil es o mat mbare o nqaw.»

¹⁸Malaaka fee no Yaal oxe a laya a Gaad ee: «Hebli a Dawid ta ret no cukand naa Arawna o Yeeyebus oxe, a maxan maaga o Yaal oxe o sadaxand.»

¹⁹Dawid a reta maaga ne Gaad a layit’uuna o ten no gon le no Yaal oxe.

²⁰Arawna kaa sugoogu bele. A geleerooxa soo a ƴook malaaka fee. Xa ƥiy xa nahaq axe ten ndeeƭna maaga a ƈufa a ƭasik.

²¹Dawid a saga farna fa Arawna. Yaa Arawna a ƴookuuna rek a inoora no cukand naa, a xetik fo ten, a gung a lanq mbaambir um.

²²Dawid a layaan ee: «Cooxaam cukand ne wo, kaam bug o maxan teen o Yaal oxe o sadaxand, ndax taamaala fene dalna xeet fee a waag o finqoox. Cooxaam o ten boog, xam rabdong ke ta jarkaa.»

²³Arawna a doonaan ee: «Daali maad o yaal es, jangeen um ci’ong o ten, o fi teen ke bugoona. Qoox ke mi a mbaage o ƥoxot nen sadax toxel, kaaƈir ke a ndefik xa cuuƭ, bele fee a ref sadax tuufe-duufe. Ci’aaxoong keene fop.»

²⁴Kaa koy o maad Dawid a doonaan ee: «Ha’aa, ba o ci’aam dara! Kaam bug o jik keene rabdong ke da mbarna o njar. Jangkiim ke jegoona ci’in o Yaal oxe. Bugiim o ɓoxot sadax faa ñakeeruuma dara!»

²⁵Dawid a rabda a Arawna xa monjong teemeed ɓetuu fa leng wurus, a jiktin cukand ne.

²⁶A maxana maaga o Yaal oxe o sadaxand, soo a ɓoxot sadax toxel fo sadax camsa’oor. Cinj kaaga, a xeɗa o Yaal oxe, soo ta jaɓ a qeƭ ale ten, a heblitiid fiɗel na asamaan, ta dox sadax fee took o sadaxand ole.

²⁷Maaga, o Yaal oxe a hebla a malaaka fee ta nomit laƥ ne no xool um.

²⁸Dawid a ga’a yee o Yaal oxe a jaɓa a qeƭ ale ten no cukand naa Arawna o Yeeyebus oxe. No kaa xotitna maaga, kaa ɓoxottoogatu maaga sadax kili.

²⁹No camaane kaaga, Ngenand ne no Yaal oxe Moyiis a fi’ina fo o sadaxand ole no sadax toxel ke no ñaang sadaxand laa Gibe’on a ndeeƭu.

³⁰Dawid koy waag’ee o ret maaga a laamtik o Yaal oxe, yaam kaa saɗar’u laƥ ne na malaaka fee no Yaal oxe.