Read NQAARIIT NE ROOG 1 Caloori ke 22 Bible Online

1 Caloori ke 22 - NQAARIIT NE ROOG bible

1 Caloori ke 22

¹Ten taxu Dawid a layoogu yee: «Ngenand ne no Yaal oxe Roog fo o sadaxand ole no sadax toxel ke no Ii-isra’el we, mene a ndefkaa.»

²Dawid a hebla o fokatanel xa kataakoon axe ngenna kam saax le Isra’el. A sera a den da ƭeg a ƥil akaa na maxitkeel Mbind Roog ne.

³Dawid a waaƭa celem mayu kaa na mbi’itkeel xa teng axe no begax ke na xa ton-maax axe fo sarñel ke itam. A fokata xanjar faa o leng a andeerna ne ta fodna

⁴fo a teex ndaxar seedar akaa mbaagaandeena o lim, yaam Siisidoŋ we fo Tiitiir we kaa ƥisiid’u a Dawid a teex ndaxar seedar a mayu.

⁵Dawid koy kaa layoogu yee: «Salomo fee o ƥees o ndeɓandoong a maadu o refaa too jegee doole. Kaa koy, Mbind ne na maxankeel o Yaal oxe xan gon um a joot kam a saax ake fop, yaam o magnel um fo o mosel um. Ten taxu um bug o waajanafulin.» Neene, Dawid a jagandan’aan mayu soo a xonkaa.

⁶Dawid a xoya o ƥeem Salomo soo a heblin ta maxan o Yaal oxe Roog fee Isra’el Mbind.

⁷A layaan ee: «O ƥees, mi fa xoox es kaam heboox’u o max Mbind naa kesaneena o Yaal oxe Roog es.

⁸Kaa koy, o Yaal oxe a layaxam ee: ‹Kaa o ɓax fo’oy fo mayu ye fo qire ke fi’oogoona. Yaam fo’oy leene fop ɓaxooxna a lanq mbaambir es, refkee yee wo na maxkaa Mbind naa um faɗooreel.

⁹Xan o rim o ƥiy o ngoor onqaa na refkaa o kiin jam, too xam ci’in a ñootnax, watin no fañ we ten fop mbiduuna. Salomo a ne’keel, too xam ci a Isra’el jam fo o yaadax no ñoow o ñis um fop.

¹⁰Ten na maxankaa gon es Mbind. Xan a ref o ƥees soo um ref faap um. Xam saƭkand uum-maamaad le ten boo kili kam Isra’el.›

¹¹Ndiiki koy, o ƥees, yaasam o Yaal oxe a ref fa wo ndax o jeg o ndam too max Mbind ne no Yaal oxe Roog of ne ta laytuuna na wo!

¹²Kaa rek, yaasam o Yaal oxe a ci’ong o and fo o jeg-yiif ndax o gay kebil ke no Yaal oxe Roog of yaa ta dalinkang took Isra’el.

¹³Maaga, xan fop of a ñaaƴ, yaa gayoona too reef bargal ke fo kebil ke o Yaal oxe a cooxna a Moyiis ndax ta daawnin a Isra’el. Saƭakinooxi boog too saq njambaar, ba o saɗar dara too ba o diid.

¹⁴Goorgoorlooxaam boo waajan Mbind ne no Yaal oxe ngap parig cuni qarɓeen tadik fo parig cuni ƥetik wurus fo ngap parig cuni teemeed tadik fo parig cuni qarɓeen ƥetik xaaliis fa nqoolu. Xanjar fee fo celem ƥaal ke koy mbaagaand o lim. Jagandaam itam a teex fo a ƥil, ndaa waagaa o ɓaat.

¹⁵Jegaa paam of jaajal boo ta dey sik: Ɗeeɗeg a ƥil fo seesex a ƥil fo seesex a teex fo wiin waane’u no calel kuu ta waagna waag o ref.

¹⁶Wurus fee fa xaaliis fee fa xanjar fee fo celem ƥaal ke o leng andee ne da mbodna. Inooxi boog too jal! Yaasam o Yaal oxe a ref fa wo!»

¹⁷Cinj kaaga, Dawid a hebla kelfa ke kam Isra’el fop da ndimle a Salomo fee o ƥeem.

¹⁸Dawid a laya a den ee: «Ndax o Yaal oxe Roog nuun refee fa nuun? Ndax ci’ee a nuun a ñootnax na xa saax axe fop? A ɓoxota na xa ƥay es we ngen’ina no saax le fop soo da ƥoxotoox mbaambir no Yaal oxe fa xeet um.

¹⁹Ndiiki koy, aqatooxyo o mbaaƭ o Yaal oxe Roog nuun na qeeñ nuun fop fo na xa laaw nuun fop. Inooxyo maxan o Yaal oxe Roog Mbind, ndax arka ne no ngiɓoor ne no Yaal oxe fo tig oo tig tedu ke Roog a ƥekel no Mbind ne na maxkeel no gon le no Yaal oxe.»