Read NQAARIIT NE ROOG 1 Caloori ke 23 Bible Online

1 Caloori ke 23 - NQAARIIT NE ROOG bible

1 Caloori ke 23

¹Ye Dawid a nogoyna tigi, a dalna o ƥeem Salomo o maad kam Isra’el.

²Cinj kaaga, a xoyna kelfa ke kam Isra’el fop fo saasadax we fo Leelewi we.

³Leelewi maak we njegna xa kiid qarɓeen tadik a jof took a lime o leng o leng, soo a ndef cuni qarɓeen tadik fo cuni ɓetuu tadik.

⁴Dawid a jila na den goor cuni qarɓeen ƭik fo goor cuni nahik waa na yetooxaa calel ke no maq ne no Mbind ne no Yaal oxe fo goor cuni ɓetuu fa leng waa ndefna aa-adax fo haahate

⁵fo goor cuni nahik waa na yetooxaa xa ton-maax axe fo cuni nahik lakas waa na simataa o Yaal oxe fo xa qos pakir kaa ta fi’in’ina yaam keene.

⁶Dawid a xaaja a den a yaj a yaj a reefandin na qaw ake na xa ƥiy axe Lewi ndefna: Geerson, Kehat fa Merari.

⁷Geerson rimu a Ladan fa Simey.

⁸Ladan a jeg’a xa ƥiy xa koor xa tadaq da ndef: Yehi’el refna taaw fee, soo Setam fa Yowel a ndeef.

⁹Simey a jeg’a xa ƥiy xa koor xa tadaq da ndef: Selomit, Hasi’el fa Haran ndefna yaal ƥasil ke mbaqaqoorna na Ladan.

¹⁰Simey a jeg’ahina xa ƥiy xa koor xa nahaq da ndef: Yahat fa Sina fa Yewus fa Beriya.

¹¹Yahat refu taaw fee, Siisa a reef ndaa Yewus fa Beriya mat may’ee xa ƥiy, ten taxu da mbindtel nen ƥasil leng kut, a ngadneel a toq a leng.

¹²Kehat a jeg’a xa ƥiy xa nahaq da ndef: Amram fa Yisxar fa Hebron fa Usi’el.

¹³Xa ƥiy xa koor axe Amram ndefu Aaroon fa Moyiis. Aaroon kaa kes’el ten fo xa ƥeem boo kili, ndax da tedlandaa tig oo tig tedu ke, a ndoxaa cuuraay fee mbaambir no Yaal oxe, a mbadnaa o far den soo a salaa barke no gon no Yaal oxe boo faw.

¹⁴Moyiis o mat refu o kiin Roog oxe soo xa ƥeem a ƭeetel nen waa mbogna na carind ale Lewi.

¹⁵Xa ƥiy xa koor axe Moyiis ndefu: Geersom fa Eliyeseer.

¹⁶Geersom rimu a Sebu’el fee taaw um.

¹⁷Eliyeseer o ƥiy o ngoor o leng a jeg’u ta ref Rehabiya, jeg’ee o lakas, kaa koy Rehabiya a jeg’a xa ƥiy xa mayu.

¹⁸Taaw fa ngoor fee Yisxar refu Selomit.

¹⁹Xa ƥiy xa koor axe Hebron ndefu: Yeriya fee taaw, o ƭikandeer oxe a ref Amariya, o tadkandeer oxe a ref Yahasi’el soo o nahkandeer oxe a ref Yekamam.

²⁰Xa ƥiy axe Usi’el ndefu Mika fee taaw, o ƭikandeer oxe a ref Isiya.

²¹Xa ƥiy axe Merari ndefu: Maxli fa Muusi. Maxli a jeg’a xa ƥiy xa ƭaq da ndef Eleyasaar fa Kiis.

²²Eleyasaar a xona too jegee o ƥiy o ngoor. Xa ƥiy xa tew soom a jeg’u soo xa ƥiy axe Kiis a ngilig a den.

²³Muusi a jeg’a xa ƥiy xa tadaq da ndef: Maxli fa Edeer fa Yeremot.

²⁴Weene ndefu xa taan axe Lewi, ndefna yaal ƥasil a qoox den too a mbindel o leng o leng. A ngadin’e a toq ye da njegna xa kiid qarɓeen ƭik a jof took, a mbadnaa o far den kam Mbind ne no Yaal oxe.

²⁵Dawid koy kaa lay’u yee: «O Yaal oxe Roog fee Isra’el a ci’a xeet um a ñootnax. Ten fa xoox um koy, Yeerusaleem a genoogu boo kili.

²⁶Neene, Leelewi we soxla’katee o meeɓaa Ngenand ne no Yaal oxe fo tikoorik ke na njiriiñooreel teen fop.»

²⁷No ke Dawid a falakna o hebooxaa, Leelewi we a mbindooge no ke xotitna xa kiid qarɓeen ƭik a jof took.

²⁸Kaa ndeefaa ke xa taan axe Aaroon a ngeblaa a den ndax da mbadin o far den kam Mbind ne no Yaal oxe, na xa maax axe fo kam fo ndok ne. Kaa ƥogdaa tig oo tig tedu ke, a mbadnaa calel den kam Mbind Roog ne ta ref:

²⁹Fi’aa xa kaf puuru xe na ƥoxoteel a Roog, mbiɗel ke no sadax tuufe-duufe ke, puuru canja’e ke fo xa kaf axaa njuɗeena fo lakas mayu kaa saafeena, soo a yetooxaa eedir ke fo liiƥir ke.

³⁰A mbara o ndefaa meen nqes fo kirand ndax da simataa, a niwaa o Yaal oxe

³¹fo itam a mbanuu o Yaal oxe a ɓoxoteel sadax toxel no pes a ñootnax mbaat no nqool o ndeɓ mbaat no qew lakas ke. A mbadnooga o far den mbaambir no Yaal oxe, a ndeefandin no mayel den ne da ndalnanit’eena o ten no bargal ke.

³²Den yetooxoogu Ƭiif ne o Yaal oxe a xetteel, a yetooxaa o mbiñ o tedu nqe soo a ndeefaa kebil ke na xa taan axe Aaroon ndefna fog den no calel ke no Mbind ne no Yaal oxe.