Read NQAARIIT NE ROOG 1 Caloori ke 26 Bible Online

1 Caloori ke 26 - NQAARIIT NE ROOG bible

1 Caloori ke 26

¹Yeeyetax we na xa ton-maax axe itam a mbi’a a yaj. Meselemiya fee o ƥiy Koore too a ref o ndaan Asaf na qaw ale Koore,

²a jeg’a xa ƥiy ɓetaa ƭaq, da ndeepatirit neeke: Sakari fee taaw, Yeja’el, Sebadiya, Yatni’el,

³Elam, Yohanan fa Eliyohenay.

⁴Obed-Edoom a jeg’a xa ƥiy ɓetaa tadaq da ndeepatirit neeke: Semaya fee taaw, Yosabad, Yo’ax, Sakar, Netanel,

⁵Ami’el, Isakaar fa Pe’ultay. Roog a barke’a koy a Obed-Edoom.

⁶Semaya fee o ƥeem a jeg’a xa ƥiy axaa adooxan’ina ƥasil den yaam xir say a ndeeƭu.

⁷Xa ƥiy axe Semaya ndefu: Otni, Refa’el, Obed fa Elsabad fo itam fog faap den weeke Elihu fa Semakiya, ndeeƭna a salma-koor.

⁸Weene fop xa taan Obed-Edoom a ndefu, den fo xa ƥiy den fo fog den, a ndef cambaar cegu doole no calel den. A ndeeƭa goor qarɓeen ɓetuu fa leng fo goor ɗik.

⁹A yaj ale Meselemiya fokat’ina xa ƥeem fo fog um a ndeeƭa goor xarɓaxay fo goor ɓetuu daduk jaru.

¹⁰Hoosa fee fog’ina na xa taan axe Merari a jeg’a xa ƥiy da ndef: Simri fee faap um a dalin’ina ta ref o aa-adax oxe ke ta reeƭeerna taaw fop oo

¹¹fa Hilkiya fa Tebaliya fa Sakari. Xa ƥiy axe Hoosa fo fog um fop xarɓaxay fo daduk a ndeeƭu.

¹²Aa-adax we fo we mbogna na yaj ake no yeeyetax we, den fop a mbadnooga o far den kam Mbind ne no Yaal oxe.

¹³Na pexey mbanjang ne a lasra xa ton-maax axe mbareena o yetooxaa, a ndeefandin no ƥasil ke, xa pes axe fo maak we a mbodrandel.

¹⁴Mbanjang ne a lasa a Selemiya o don-maax ole no batand. O ƥeem Sakari fee reeƭna o aa-as o cegu yiif, a doxne na pexey mbanjang ne o don-maax ole no ɓemb-roog o janoon.

¹⁵Obed-Edoom farin’e no don-maax ole no ɓemb-roog o ñamaak, xa ƥeem a yetooxaa tok keekand ke.

¹⁶Supiim fa Hoosa njaƥatiroogu a yetax ale no don-maax ole no mudand fo ole Saleket faambirna fa ƭat ale no ñaang le. A qaaj ake no yeeyetax we, neeke a nqaajit’e:

¹⁷No don-maax ole no batand a jeg’a Leelewi ɓetuu fa leng ñaal nuu refna, no don-maax ole no ɓemb-roog o janoon, Leelewi nahuk ñaal nuu refna, no le no ɓemb-roog o ñamaak, Leelewi nahuk ñaal nuu refna, no tok keekand ke, a qaaj a ƭak akaa aluu refna a fi’na wiin ɗik,

¹⁸no tabax ne farna no mudand, goor nahuk a ndeeƭa na ƭat ale, soo ɗik a ndef kam fee.

¹⁹Keene ndeeƭu a yaj ake no yeeyetax we na xa ton-maax axe nqotteena na qaw ale Koora fo na le Merari.

²⁰Leelewi lakas we fog[43] den saq’u halal fee no Mbind Roog ne fo tig oo tig tedu ke ƥoxotoogeena a Roog.

²¹Xa taan axe Ladan na qaw ale Geerson too a ndef yaal ƥasil den ndefu Yehi’el

²²fo xa ƥeem Setam fo o ndeɓ um Yowel. Den ngadoox’u halal fee no Mbind ne no Yaal oxe.

²³Na qaw ale Amram fo na le Yisxar fo na le Hebron fo na le Usi’el,

²⁴Sebu’el fee o ndaan Geersom too a ref itam o ndaan Moyiis reeƭu o yeeyetax o maak oxe na kamba le.

²⁵Eliyeseer fee o ndeɓ Geersom rimu a Rehabiya, Rehabiya a rim a Yesaya, Yesaya a rim a Yoraam, Yoraam a rim a Sikiri soo Sikiri a rim a Selomit. Den fop koy, fog faap Sebu’el a ndeeƭu.

²⁶Selomit feene koy fo fog um ngadoox’u kalal ke o maad Dawid fo yaal ƥasil ke fo aa-adax no xiixire juni we fo aa-adax no xiixire teemeed we fo aa-adax lakas no xiixire we a kesan’ina a Roog.

²⁷Goor weene kaa kesan’u a Roog a seek no ke da njangaliid’ina ye fo qire ke ndax ta topatoorteel Mbind ne no Yaal oxe.

²⁸Fop ke o ƭeet Sami’el fa Sawul fee o ƥiy Kiis fa Abineer fee o ƥiy Neer fa Yowab fee o ƥiy no tew o ne’e Seruya a kesan’ina o Yaal oxe, Selomit fo fog um saq’un.

²⁹Kenaniya fo xa ƥeem mbogna na qaw ale Yisxar ndeeƭu aa-adax we fo haahate we kam Isra’el.

³⁰Hasabiya fo goor juni fo goor teemeed ɓetuu ƭik lakas waa ndefna cambaar, a mbog na qaw ale Hebron, yetooxoogu o fiisel ole Isra’el farna no mudand naa no xuluɓ olaa Yordaan. Den ngadoox’u a ñaaƈnooƭ ale na ƭat ale fo no sañ-sañ ke kam saax le.

³¹Yeriya reeƭu o aa-adax oxe na qaw ale Hebron. No hiid qarɓeen nahkandeer ole no maat Dawid, o kurcala laaga a ɓaale soo goor waa ndefna cambaar a soƥel teen kam Yaseer na Galaad.

³²O maad Dawid a dalna a Yeriya fo goor cuni ƭik fo goor teemeed ɓetuu ƭik lakas waa mbogna na qaw aleene too den fop a ndef yaal ƥasil, ndax da ngadoox a ñaaƈnooƭ ale na ƭat ale fo no maat ne kam a carind ale Ruben, na le Gaad fo na genwal a carind ale Manaase ndefna no batand.