Read NQAARIIT NE ROOG 1 Caloori ke 27 Bible Online

1 Caloori ke 27 - NQAARIIT NE ROOG bible

1 Caloori ke 27

¹Keeke ndefu a kon no Ii-isra’el we njalanoogna o maad oxe, a ndef yaal ƥasil, aa-adax no xiixire juni fo aa-adax no xiixire teemeed fo aa-adax lakas waa ndimle’oogna o maad oxe na qaaj ake yaa da ndetaa fo yaa da ngataa, no nqool onquu refna no hiid ole fop. A qaaj aluu refna a reeƭa goor cuni qarɓeen ƭik fo goor cuni nahik.

²A qaaj a eetaand ale, no nqool o eetaand onqe Yasobe’am fee o ƥiy Sabdi’el ɗoxoogun, a jeg na qaaj um goor cuni qarɓeen ƭik fo goor cuni nahik.

³O leng na xa taan axe Peres a reeƭu. Ten adooxan’u aa-adax lakas we no xiixire we no nqool o eetaand onqe.

⁴A qaaj ale no nqool o ƭikandeer onqe Dodaay fee o ndaan Ahowa ɗoxoogun, Miklot a dimle’an. Na qaaj aleene a jeg’a goor cuni qarɓeen ƭik fo goor cuni nahik.

⁵Oxe adooxan’ina a qaaj a tadkandeer ale no nqool o ndadkandeer onqe refu Benaya fee o ƥiy Yehoyada fee o saasadax oxe. A jeg’a na qaaj um goor cuni qarɓeen ƭik fo goor cuni nahik.

⁶Benaya feene jambaar a reeƭu a ndeer xir say qarɓeen tadik we too ten adooxan’u a den. O ƥeem Amisabad a fog’a na qaaj ale ten.

⁷O nahkandeer oxe no nqool o nahkandeer onqe, refu Asa’el fee o ndeɓ Yowab, soo o ƥeem Sebadiya a rondandin. A jeg’a na qaaj um goor cuni qarɓeen ƭik fo goor cuni nahik.

⁸O ƥetkandeer oxe no nqool o ƥetkandeer onqe refu Samahut fee fogna na qaw ale Yisra. A jeg’a na qaaj um goor cuni qarɓeen ƭik fo goor cuni nahik.

⁹O ɓetuu fa lengandeer oxe no nqool o ɓetuu fa lengandeer onqe refu Ira fee o ƥiy Iqees fee genna Tekowa. A jeg’a na qaaj um goor cuni qarɓeen ƭik fo goor cuni nahik.

¹⁰O ɓetuu ƭikandeer oxe no nqool ɓetuu ƭikandeer onqe refu Heles fee genna Pelon, a fog na carind ale Efrayim. A jeg’a na qaaj um goor cuni qarɓeen ƭik fo goor cuni nahik.

¹¹O ɓetuu tadkandeer oxe no nqool ɓetuu ndadkandeer onqe refu Sibkay fee genna Husa, a fog na qaw ale Serax. A jeg’a na qaaj um goor cuni qarɓeen ƭik fo goor cuni nahik.

¹²O ɓetuu nahkandeer oxe no nqool ɓetuu nahkandeer onqe refu Abiyeseer fee genna Anatot, a fog na carind ale Bensame. A jeg’a na qaaj um goor cuni qarɓeen ƭik fo goor cuni nahik.

¹³O xarɓaxayandeer oxe no nqool xarɓaxayandeer onqe refu Mahray fee genna Netofa, a fog na qaw ale Serax. A jeg’a na qaaj um goor cuni qarɓeen ƭik fo goor cuni nahik.

¹⁴O xarɓaxay fo lengandeer oxe no nqool xarɓaxay fo lengandeer onqe refu Benaya fee genna Piraton, a fog na carind ale Efrayim. A jeg’a na qaaj um goor cuni qarɓeen ƭik fo goor cuni nahik.

¹⁵O xarɓaxay fo ƭikandeer oxe no nqool xarɓaxay fo ƭikandeer onqe refu Helday fee genna Netofa, a fog na qaw ale Otni’el. A jeg’a na qaaj um goor cuni qarɓeen ƭik fo goor cuni nahik.

¹⁶Keeke ndefu a kon no we kelfa’ina a carind ake Isra’el: Na carind ale Ruben, Eliyeseer fee o ƥiy Sikiri. Na carind ale Simewon, Sefatiya fee o ƥiy Maaka.

¹⁷Na carind ale Lewi, Hasabiya fee o ƥiy Kemu’el fa Saadok fee o ndaan Aaroon.

¹⁸Na carind ale Yudaa, Elihu o leng no maag we Dawid. Na carind ale Isakaar, Omri fee o ƥiy Mika’el.

¹⁹Na carind ale Sabulon, Yismaya fee o ƥiy Abjaas. Na carind ale Neftali, Yeremot fee o ƥiy Asri’el.

²⁰Na carind ale Efrayim, Hoose fee o ƥiy Asasiya. Na genwal a carind ale Manaase refna no mudand, Yowel fee o ƥiy Pedaya.

²¹Na genwal a carind ale Manaase dalna kam Galaad no batand, Ido fee o ƥiy Sakari. Na carind ale Bensame, Yaasi’el fee o ƥiy Abineer.

²²Na carind ale Dan, Asarel fee o ƥiy Yeroham. Weene ndefu kelfa ke na carind ake Isra’el.

²³Dawid lim’ee we njegna xa kiid qarɓeen ƭik a gar a lanq, yaam o Yaal oxe kaa lay’u yee xan a fi boo Ii-isra’el we a mayit nen xa qoor axe na asamaan.

²⁴Yowab fee o ƥiy no tew o ne’e Seruya fer’u a lim ale, ndaa muuk’iran yaam Roog kaa fuuxan’u a Isra’el no keene. Ten taxu ne xeet fee a fodna jegee no «Safe le na pi ake no maad Dawid».

²⁵Asmawet fee o ƥiy Adi’el reeƭu jawdiin fee na kamba le no maad oxe. Yoonatan fee o ƥiy Usiya reeƭu jawdiin fee na kamba le kam saax le, no teeru ke fo no caate ke fo na xa yetooxand axe.

²⁶Esri fee o ƥiy Kelub reeƭu jawdiin fee no jaajal we na xa qol axe kam saax le.

²⁷Simey fee genna Rama reeƭu jawdiin fee na ƭing taxar biiñ ake. Sabdi fee genna Sefam reeƭu jawdiin fee na biiñ fee na hataa no taxar biiñ keene.

²⁸Baal-Haanan fee genna Gedeer reeƭu jawdiin fee na ƭing taxar oliiw ake fo paƭat ke no jegel ole na yulanq ake. Yowaas reeƭu jawdiin fee na diwliin fee.

²⁹Sitray fee genna Saron reeƭu jawdiin fee na xa siir naak axe na xa kayand axe Saron. Safat fee o ƥiy Adlay reeƭu jawdiin fee na xa siir axe no fo mbiñ fo lakas ne na xa saawit axe.

³⁰Obil fee o Ii-isma’el reeƭu jawdiin fee no keeleemb ke. Yehdeya fee genna Meronot reeƭu jawdiin fee na xa paam axe.

³¹Yasis fee o Aa-agaar reeƭu jawdiin fee no paal ke fo pambe ke. Weene ndefu we topatooxoogna o jeg ole no maad Dawid.

³²Yoonatan fee faap o ndeɓ Dawid reeƭu o aa-as um, too a ref o yaal-o-and o maak fo o piibind. Yehi’el fee o ƥiy Hakmoni topatooxoogu xa caaƈ axe no maad oxe.

³³Ahitofel itam o aa-as no maad oxe a reeƭu, Husay o Aa-arki xe a ref xaariit no maad oxe.

³⁴A cinj Ahitofel, a jeg’a a Yehoyada fee o ƥiy Benaya, a jeg itam a Abiyataar. Yowab o mat reeƭu farɓa fa maak fee no maad oxe.