Read NQAARIIT NE ROOG 1 Caloori ke 28 Bible Online

1 Caloori ke 28 - NQAARIIT NE ROOG bible

1 Caloori ke 28

¹O maad Dawid a fokata kam Yeerusaleem aa-adax we kam Isra’el fop: Aa-adax we na carind ake, aa-adax we no xiixire juni fo aa-adax we no xiixire teemeed, cawdiin ke no jeg ole fo na xa siir axe no maad oxe fo axe na xa ƥeem fo jaajal we no mbind no maad ne fo xiixire we moƴna o njambaar fo xir say we fop.

²O maad Dawid a inooxa, a lay a den ee: «Nuun fog es, nuun we na xeet es, nan-gilooxaamoo! Kaam heboox’u o max Mbind Roog, ndax um ɓek teen arka ne no ngiɓoor ne no Yaal oxe refna o dakand ole Roog in. Jagand’aam keene fop boog.

³Kaa koy Roog a layaxam ee: ‹Refee yee wo na maxankaa gon es Mbind, yaam o kiin xire xaa ɓaxna fo’oy fo mayu refo.›

⁴Yaag oo toox de, mi o Yaal oxe Roog fee Isra’el a jilu ndeer ƥasil ne faap es fop, ndax um ref o maad Isra’el boo kili. A jila a carind ale Yudaa ndax ta ɗoxaa xeet um, na Yudaa ta jil mbind faap es, soo no mbind faap es ta jilaam a ndeer xa ƥiy axe faap es, ndax um maadooxan a Isra’el fop.

⁵Ndiiki koy, na xa ƥiy xa mayu xe o Yaal oxe a ci’axama, a jila teen a Salomo, ndax ta moof no uum-maamaad le no Yaal oxe kam Isra’el.

⁶A layaxam ee: ‹O ƥeef na maxankaxam Mbind fo xa maax um, yaam kaam jilin nen o ƥees too mi fa xoox es xam refanin faap.

⁷Xam saƭkand maat um boo kili, yaa ta gayna kebil es fo bargal es nen a xaye.›

⁸Ndiiki koy, na kid no Ii-isra’el we fop, no mbokatax ne no Yaal oxe, mbaambir Roog in fee na nanaa a in, ngayyo too ndeef kebil ke no Yaal oxe Roog nuun ne ta waritna. Neene, xan nu njegik saax faaxaand leeke soo nqaƴanin xa taan nuun da lamin boo kili.

⁹Wo Salomo fee o ƥees koy, andi a Roog fee na faap of too dagoortin xeeñ letu fo yiif jagandooxu, yaam o Yaal oxe kaa ɓaalaa a qeeñ ake fop, soo a jaqtaa a qalaat ake fop. O waaƭangaan, xan a ga’nooxong, ndaa o xaƴangaan xan a deɓong boo kili.

¹⁰Me ta refna koy, fat o and a paax ee o Yaal oxe jilong ndax o maxanin mbind naa na refkaa Mbind Roog. Saƭakinooxi boog too jal!»

¹¹Dawid a cooxa a Salomo samandaal ne no maq ne no Mbind Roog ne: o ndambalaan onqe, fo ndok-o-nqulanq ne, fo ndok ne na kamba le, fo ndok-took ne, fo ndok-kam ne fo a ndok ale no afnir-o-fortand ole.

¹²A cooxaan itam samandaal ne no fop ke hat’ina no Yiif le, a jagin na xa maax axe no Mbind ne no Yaal oxe, no tok ke mbidna xa maax axe, no tok ke kesaneena a kamba le no Mbind Roog ne fo a kamba le no tig oo tig tedu ke.

¹³A cooxaan a qaaj ake no saasadax we fo Leelewi we fo calel ke mbareena o mbadnaa kam Mbind ne no Yaal oxe fo ƥaxañ ke na mbaɗorteel kam fee.

¹⁴A lalaan o meɗel ole na wurus fee warna no ƥaxañ wurus oluu refna fo o meɗel xaaliis ole warna no ƥaxañ xaaliis oluu refna, a reefandin no ne ta jiriiñooritkeel,

¹⁵fo itam o meɗel ole na pagal wurus ake na xa lampa xe fo xa lampa wurus axe, a pagal xaaliis ake na xa lampa xe fo xa lampa xaaliis axe, a reefandel no ne da njiriiñooritkeel.

¹⁶A cooxaan itam o meɗel ole na taabul wurus aluu refna too a refankaa xa kaf puuru xe na ƥoxotkeel a Roog fo o meɗel ole na taabul xaaliis ake.

¹⁷A cooxahinaan o meɗel ole na xa cuutir-a-tegeƴ axe, ole na xa toon-xa-biisir axe fo fo njaq wurus fa nqoolu ne fo palka wurus ke fo palka xaaliis ke, a reefandel no ne da njiriiñooritkeel,

¹⁸fo o meɗel ole no sadaxand ole no qeeñe-xeeñe ke. A cooxaan itam samandaal ne na sareet ale fo ne no pindel wurus yeeyetax ke na singtaa arka ne no ngiɓoor ne no Yaal oxe a nafir den.

¹⁹Dawid a layaan ee: «Keene fop o Yaal oxe a bindanaxam o ten ndax ta andnooraam ne ta wareena o jalit.»

²⁰Cinj kaaga, Dawid a ɓaata teen ee: «O ƥees, saƭakinoooxi too jal! Ba o saɗar boog, too ba o diid! O Yaal oxe Roog es xaƴkirang, oxey fa wo too xan a damtong boo yaa calel ke no Mbind ne ten a muukooxkaa.

²¹A qaaj ake no saasadax we fo Leelewi we na mbugko njalaa kam Mbind Roog ne owey paam of. No calel ke mbareena o mbi waagaa o geƈnoox no wiin we na njalaa no fud o letu too a mbaane. Kelfa ke fa xeet fee fop a njega teen a posax.»