Read NQAARIIT NE ROOG 1 Caloori ke 29 Bible Online

1 Caloori ke 29 - NQAARIIT NE ROOG bible

1 Caloori ke 29

¹O maad Dawid a laya mbokatax naa ndeeƭna maaga fop ee: «O ƥees Salomo fee Roog a jilna kaa maad o refaa o ndeɓandoong too jegafulee doole. Calel ke mbareena o mbi koy kaa magin lool yaam maq ne refee mbind no maad naa na maxaneel o kiin ndaa Mbind no Yaal oxe Roog oo.

²Fi’aam podu naa na doole es fop ndax um waajan Mbind ne na Roog es. Fokataam wurus fa xaaliis fa nqoolu fa xanjar fo celem ƥaal fo a teex yaam tig oo tig ke na jalitkeel xa qos xa pogreer axeene. Jagandaam a ƥil a cafeñu akaa na nqoyeel onik fo a ƥil cafeñu a mosandir a lakas fo a ƥil a ƥaal fo akaa saqna xa ƥiñ xa lakas fo xa qos a ƥil a cafeñu kuu ndefna fo a ƥil marbar a tan.

³Halal fee jegooduuma koy, ta ref wurus mbaat xaaliis, ci’aanum Mbind ne na Roog es. Ɓaataanum no ke jagandanuuma Mbind tedu neene boo ƴut yaam kaa felaam lool.

⁴Ci’taam ngap parig juni wurus fee hatna Ofiir[44] fo ngap parig cuni ƭik fo parig teemeed nahik xaaliis fa nqoolu, ta laarkeel na xa saax axe no Mbind Roog ne.

⁵Ndiiki koy, an na nuun jaɓu o ci o Yaal oxe no fud o letu wurus mbaat xaaliis, ndax jaajal we a njal xa ƥaxañ wurus mbaat xaaliis axe mbarna?»

⁶Maaga, yaal ƥasil ke fo kelfa ke Isra’el fo aa-adax no xiixire juni we fo aa-adax no xiixire teemeed we fo aa-adax we na yaj ake na njalanaa o maad oxe a ngebooxana a qoox den.

⁷A ci’ta no calel ke no Mbind Roog ne, parig juni fo parig teemeed ɓetuu ƭik wurus fo xa qanjar wurus cuni xarɓaxay, fo parig cuni tadik fo parig teemeed nahik xaaliis fa nqoolu, fo ngap parig cuni ɓetuu fa leng fo parig teemeed xanjar fo parig cuni qarɓeen tadik fo parig cuni nahik celem ƥaal.

⁸We njeg’ina a ƥil a cafeñu a cooxa a den a Yehi’el fee na qaw ale Geerson, ta refan halal fee no Mbind ne no Yaal oxe.

⁹Xeet fee kaa sawar’u no ci’it o fud o letu ke mbi’eena. O maad Dawid itam a felakinoox’a teen.

¹⁰Dawid a simata o Yaal oxe mbaambir mbokatax ne fop a lay ee: «O Yaal oxe Roog fee no taan in Isra’el a hela o simateel bo na moos boo moos.

¹¹O Yaal oxe, wo jegu o magnel fa katil fo o mosel fo o ndam fo o niwel. Fop ke refna na asamaan fo took lanq ke wo jegun, yaam wo refu o maad, o Yaal oxe no pindel ke fop.

¹²Halal fa tedaanga na wo a ngataa, wo fee na maadooxaa took fop. Wo jegu doole fa katil too o ɓay of a waaga o magnand too a saƭkand fop.

¹³Ndiiki koy, wo Roog in, kaa i ngidmang too simataa gon of jegu o ndam.

¹⁴Ndi an refum, too xar xeet es a refu boo tee kaa mbi’anang ci’it o fud o letu podu neene? Mee ndax fop na wo a hatu, too o ɓay of cooxu a in fop ke i ci’oonga!

¹⁵Kaa i ndef mbaambir of genar fo xa kataakoon nen daan in fop, ñaal ke in took lanq ke a ndef nen yook too i njegee yaakaar leng.

¹⁶O Yaal oxe Roog in, paax kene fop i njangandna ndax i maxantin gon of tedu Mbind no ɓay of a hatu. Fop wo jegun.

¹⁷Wo Roog es, andaam ee kaa o horooxaa a qeeñ ake fop soo fex o cofel. Fi’anaaxoong boog ci’it ke mi no fud o letu kam o cofel ole no xeeñ es, too ga’aam xaye fo o ɗaay xeet of feeke ndefna fa mi a mbi’anong leng kut ke fi’uuma.

¹⁸O Yaal oxe Roog fee no daan in Abraham fa Isaak fa Isra’el[45], geeki o jeg-yiif oleene na xeet of, ndax a qalaat den a njagin na wo kili.

¹⁹Ci’i a Salomo fee o ƥees yiif laa damooxna no gay bargal ke wo fo a cangin ale wo fo kebil ke wo, a reefaa fop too a max mbind maak ne jagandanuuma kene fop.»

²⁰Cinj kaaga, Dawid a laya mbokatax naa fop ee: «Ngidimyo o Yaal oxe Roog nuun!» Mbokatax naa fop boog a ngidma o Yaal oxe Roog fee no daan den. A ngooknooxa soo a ngung mbaambir no Yaal oxe fo mbaambir o maad oxe.

²¹No feet olaa, Dawid fa xeet fee a ƥoxota o Yaal oxe sadax camsa’oor fo sadax toxel. A ƥoxotaan qoox juni fo a suk paal juni fo fo mbaal juni, a yoonandtin sadax biiñ fee warna fo sadax lakas mayu kaa ngiñna Ii-isra’el we ndeeƭna maaga fop.

²²A koom, a ñaama, a yer mbaambir no Yaal oxe fo o ɗaay o maak. A ndalna a Salomo fee o ƥiy Dawid o maad jaf ɗikandeer. A ƭuumaan mbaambir no Yaal oxe nen o ƭooɗox, soo a ƭuum a Saadok nen o saasadax o maak.

²³Salomo a moofa nen o maad na seek ale faap um Dawid no uum-maamaad le o Yaal oxe a sipna. Fop um a ñaaƴa, soo Isra’el fop a nananin.

²⁴Kelfa ke fop fo a salma-koor ake boo na xa ƥiy axe no maad Dawid sax a nanana o maad Salomo.

²⁵O Yaal oxe a yoɗa a Salomo took na kid no Ii-isra’el we fop. A ci’a maat um o mosel olaa hupna ole no maad we Isra’el adooxuuna fop.

²⁶Dawid fee o ƥiy Isay a maadooxanooga a Isra’el fop.

²⁷Xa kiid qarɓeen nahik a maadoox’u, xa kiid ɓetaa ƭaq kam Hebron fo xa kiid qarɓeen tadik fo xa kiid xa tadaq kam Yeerusaleem.

²⁸Dawid a xona ye ta nogoyna tigi, too a may’a halal fo o ndam. O ƥeem Salomo a rondandaan no maat naa.

²⁹Ke xotitna no mberaandoong ne na cosaan fee no maad Dawid boo no muukandoong ne kaa bindel na safe ke na nqoyeel «A pi ake no ƭeet Sami’el» fo «A pi ake no tuleer Natan» fo «A pi ake no ƭeet Gaad».

³⁰Ke xewna no maat um fo njambaar um fop fo ke xewna na jamaane um, ta ref kam Isra’el mbaat kam maat lakas ke na saax ake mbiduuna a mbinde na safe keene.