Read NQAARIIT NE ROOG 1 Caloori ke 5 Bible Online

1 Caloori ke 5 - NQAARIIT NE ROOG bible

1 Caloori ke 5

¹We na ngaraa taa mbaambir ndefu xa ƥiy axe Ruben fee taaw Isra’el. Ruben refu taaw, ndaa cinj ye ta wondooxna fo o leng no rew we faap um, a las taaw ale ten a cooxe a Yoseef fee refna ten itam o ƥiy Isra’el, too Ruben a ɗeet’ate nen oxaa ñakna a las taaw ale ten.

²A carind ale Yudaa moƴ’atu o jeg doole a ndeer a carind ake no fog faap we ten, too no ten oxe na refkaa o maad Isra’el a inooru, ndaa a las taaw ale o mat Yoseef jeg’un.

³Xa ƥiy axe Ruben fee taaw Isra’el ndefu: Henok, Palu, Hesron fa Karmi.

⁴Yowel rimu a Semaya, Semaya a rim a Gog, Gog a rim a Simey,

⁵Simey a rim a Mika, Mika a rim a Re’aya, Re’aya a rim a Baal,

⁶Baal a rim a Beera fee reeƭna o yaal a carind ale no Ruuruben we, too Tiglat-Pileseer fee o maad oxe Asuur a ɓis’un gilaa saax took o hup doole.

⁷Fog faap we Beera, a ndeefandel na qaw den fo no bind le da ndeepatirandteena no safe. O eetaand oxe refu Ye’iyel, cinj oxeene Sakari,

⁸soo oxe falakna a ref Bela fee o ƥiy Asas, too Asas a ref o ƥiy Sema fee o ƥiy Yowel. Ruuruben weene kaa ñoowoogu kam o fiisel ole xotitna Aroweer no ɓemb-roog o ñamaak boo no joong ole Nebo fa teeru fee Baal-Me’on no ɓemb-roog o janoon.

⁹No batand naa, a ngena boo me a koƥ-a-ƥor alaa retna boo no xuluɓ ole Ofrat a feritna, yaam kaa njeg’u xa siir fo a ked a mayu kam o jegel oleene na xoyeel Galaad.

¹⁰Na jamaane Sawul, weene kaa nqire’’u fo Aa-agaar we soo a nqaw a den, a ngen kenand ke den kam xa cegel axe no batand ne Galaad fop.

¹¹Xa taan axe Gaad no ɓemb-roog o janoon ole no Ruuruben we a ñoowoogu no saax le Basan boo Salka no batand.

¹²Yowel reeƭu o yaal a carind ale den, oxe reefna took um a ref Safam, Yanay a reef, soo Safat fee gen’ina Basan a doonoox.

¹³Ɓetuu ɗik weeke ndefu fog faap den, a reefandel na qaw den: Mika’el, Mesulam, Seeba, Yoraay, Yakan, Siya fa Ebeer.

¹⁴Weene ndefu xa taan axe Abihayil fee o ƥiy Xuri, Xuri a ref o ƥiy Yarowa, Yarowa a ref o ƥiy Galaad, Galaad a ref o ƥiy Mika’el, Mika’el a ref o ƥiy Yesisay, Yesisay a ref o ƥiy Yahdo, Yahdo a ref o ƥiy Buus.

¹⁵Ahi fee o ƥiy Abdi’el fee o ƥiy Guni adooxan’u a qaw akeene.

¹⁶Xa taan axe Gaad a ngenooga boog kam Galaad fo kam Basan fo no teeru ke da mbaxooxna, a ngayaa a ked ake den ke xotitna Saron boo maa xa kayand axe a ndayna.

¹⁷A kon akeene fop a mbind’e no safe, ye Yotaam a maadooxaa kam Yudaa, Yerobowam a maadooxaa kam Isra’el.

¹⁸A carind ale Ruben fo ale Gaad fa genwal a carind ale Manaase a njeg’a goor cuni qarɓeen nahik fo cuni nahik fo teemed ɓetuu ƭik fo qarɓeen ɓetuu fa leng waa mbadna ndet na xire, a moknin, a ndef xir say, a mbaag o njiriiñoor pegoor, laƥ fo a qali.

¹⁹A nqire’a fo Aa-agaar we, Yeeyetuur we, Naanafis we fo Noonodab we.

²⁰Na xire faaga, a nqeɗooxa o ndimle Roog. A jaɓa a qeƭ den soo a ƴufig a den, yaam ne da ngooloox’uuna. Maaga, a nqawa Aa-agaar we fo yoon den.

²¹A njaɓa cegel ke den: keeleemb cuni qarɓeen ƥetik fo paal fo pambe cuni teemeed ƭik fo cuni qarɓeen ƥetik fo xa paam cuni ƭik, a ƥis itam wiin cuni teemeed.

²²A mbar’a itam jaaku no fañ weene, yaam xire feene kaa inoor’u na Roog. Maaga, a ndala kam o fiisel olaaga no Aa-agaar we soo a ndef maaga boo neen a ƥise gilaa saax took o hup doole.

²³Genwal fee na carind ale Manaase kaa ngen’u no fiisel ole xotitna Basan no ɓemb-roog o ñamaak boo Baal-Hermon fa Seniir fo o joong ole Hermon no ɓemb-roog o janoon. Kaa may’u lool.

²⁴Weeke ndefu yaal a qaw ake den: Efer, Yisey, Eli’el, Asri’el, Yeremi, Hodawiya fa Yahdi’el. Den fop xir say waa njegna a kon a ndeeƭu.

²⁵Kaa koy, a carind a tadak akeene a ngore’aƭara na Roog fee no daan den, a mbaɗooxaa roog ke no qeet ke no saax le, qeet keene o Yaal oxe a rax’ina mbaambir den.

²⁶Roog fee Isra’el a riña a Pul fee na xoyeel a xoy Tiglat-Pileseer fee o maad oxe Asuur, ta song xa piisel axe na carind ale Ruben fo ale Gaad fa genwal a carind ale Manaase. A ɓisa a den took o hup doole Halah, Haboor, Hara fo paam o xuluɓ olaa Gosaan, too a maada maaga boo no ñaal roog ne xaye.

²⁷Xa ƥiy axe Lewi ndefu: Geerson[23], Kehat fa Merari.

²⁸Xa ƥiy axe Kehat ndefu: Amram, Yisxar, Hebron fa Usi’el.

²⁹Amram a jeg’a xa ƥiy xa ƭaq xa koor, da ndef Aaroon fa Moyiis fo o tew o leng, ta ref Miryam. Xa ƥiy axe Aaroon ndefu: Nadab, Abiihu, Eleyasaar fa Itamaar.

³⁰Eleyasaar rimu a Finees, Finees a rim a Abisuwa,

³¹Abisuwa a rim a Buki, Buki a rim a Usi,

³²Usi a rim a Serahiya, Serahiya a rim a Merayot,

³³Merayot a rim a Amariya, Amariya a rim a Ahituub,

³⁴Ahituub a rim a Saadok, Saadok a rim a Ahimaas,

³⁵Ahimaas a rim a Asariya, Asariya a rim a Yohanan,

³⁶soo Yohanan a rim a Asariya. Asariya feene a reeƭa o saasadax kam Mbind Roog ne Salomo a maxin’ina Yeerusaleem.

³⁷Asariya rimu a Amariya, Amariya a rim a Ahituub,

³⁸Ahituub a rim a Saadok, Saadok a rim a Saalum,

³⁹Saalum a rim a Hilkiya, Hilkiya a rim a Asariya,

⁴⁰Asariya a rim a Seraya, soo Seraya a rim a Yosadak.

⁴¹Yosadak feene o maad Nebukadnesaar a ɓis’u, ye o Yaal oxe a xaƴna wiin we Yeerusaleem fo maat ne Yudaa fop, ta ɓis a den gilaa saax took o hup doole.