Read NQAARIIT NE ROOG 2 Caloori ke 10 Bible Online

2 Caloori ke 10 - NQAARIIT NE ROOG bible

2 Caloori ke 10

¹Rehabewam a reta Sikeem, yaam Ii-isra’el we fop kaa ngar’u maaga, ndax da ndodin o maad.

²Ye Yerobowam fee o ƥiy Nebat a yegtuuna Misira, maa ta ƴuf’ina, ndax ta daɗ o maad Salomo, a nomtooxiida.

³A carind ake no ɓemb-roog o janoon a nqoynika a Yerobowam. Maaga, a yooniida fo Ii-isra’el we fop, a lay a Rehabewam ee:

⁴«Faap of kaa roxond’u a in a toq a meɗu. Ndiiki koy, yelefandani a in a toq aleene hatna na faap of, too ta meɗ dis, yaaga xan i ndagooxong.»

⁵Rehabewam a doona a den ee: «Ndeer mene fo ñaal tadik fat nu nomtooxiid.» Maaga, xeet faa a ndeta.

⁶O maad Rehabewam a laamta maak waa asoogna a faap um Salomo, ye ta ñoowaa. A laya a den ee: «Xar nu askaxam kaa doonuuma xeet fene?»

⁷Maak waa a layaan ee: «Me ta refna xaye, o faaxangaa na xeet fene, jaɓ ke da mbugna, doon a den o doonanqol o felu, yaaga xan a ndef dag of boo kili.»

⁸Kaa koy, o maad oxe a yapatila o as ole maak we a coox’uuna soo a laamtik xa pes xa kend um axe ndeeƭna fo ten too a yaroox fo ten.

⁹A laya a den ee: «Xeet fene kaa laamtaxam, ndax um yelefandan a den a toq ale faap es a roxond’ina a den. Xar nu nqalaatu yee kaaga i ndoonkaa a den.»

¹⁰Xa pes axe yaroox’ina fo ten a ndoonaan ee: «Layi keeke xeet fee layoonga yee faap of kaa roxond’u a in a toq a meɗu, ndaa wo o mat, yelefandaneen a in: ‹O nqol o mbangdir onqe mi moƴu o magin ndet ne faap es.

¹¹Faap es a roxond’a a nuun a toq a meɗu, mi koy, xam roxond a nuun a toq alaa moƴna o meɗ. Faap es xa yar a yartoogu a nuun, mi koy, xa cap axaa ƭomitna nen ŋat a beex um yaritkaa a nuun.› »

¹²No ñaal ndadkandeer naa, Yerobowam fa xeet faa fop a ngara, a soƥiid o maad Rehabewam, ne ta layit’uuna a den.

¹³O maad oxe a doona xeet faa o doonanqol o ñexetu. A faña o reef o as ole maak we a coox’uuna,

¹⁴ndax a reef ke xa pes axe a as’uuna. O maad Rehabewam a laya a den ee: «Faap es a roxond’a a nuun a toq a meɗu, mi koy, xam roxond a nuun a toq alaa moƴna o meɗ. Faap es xa yar a yartoogu a nuun, mi koy, xa cap axaa ƭomitna nen ŋat a beex um yaritkaa a nuun.»

¹⁵Neene, o maad oxe nan-giloox’ee xeet fee, yaam fop ke xew’ina na Roog a inoor’u, ndax ke o Yaal oxe a lay’ina a reefandin na Ahiya fee genna Silo a fadnoox na Yerobowam fee o ƥiy Nebat.

¹⁶Ye Ii-isra’el we a nga’na yee o maad oxe nan-giloox’ee a den, a ndoonaan ee: «Xar i ndeeru fa Dawid? I mbogee dara fo o ƥiy onqe Isay. In Ii-isra’el we, fat oxuu refna a nomtoox no ƭiif um, wo o ndaan Dawid o mat, o topatook maat of.» Maaga, a ndalfooxa o nomtoox no ƭiif den.

¹⁷Ii-isra’el we ngen’ina no teeru ke Yudaa soom Rehabewam a maadooxanoogatu.

¹⁸Yaqanee koy, a hebla a Hadoram fee yetooxoogna calel ke na serteel maa no Ii-isra’el[8] waa, ndaa weene a mbartaan a kac. Maaga, Rehabewam a dalfooxa o ŋaay na sareet-xire soo a ƴuf Yeerusaleem.

¹⁹Neene Ii-isra’el we a siiknoortu fo mbind Dawid boo no ñaal roog ne xaye.