Read NQAARIIT NE ROOG 2 Caloori ke 12 Bible Online

2 Caloori ke 12 - NQAARIIT NE ROOG bible

2 Caloori ke 12

¹Ye Rehabewam a saƭkandna maat ne boo a jegat doole, a deɓa kebil ke no Yaal oxe too Ii-isra’el we fop a ndeefa o jaf um.

²No hiid o ɓetkandeer ole no maat Rehabewam, Siisak fee o maad Misira a gara a song a Yeerusaleem. Keene koy, ngore’aƭar den no Yaal oxe garit’un.

³Siisak kaa adooxan’u a yaj no xiixire laa yoonitna a sareet-xire juni fo a sareet-xire teemeed ƭik fo ŋaaŋaay pis cuni qarɓeen ɓetuu fa leng. A yoonit’a itam xiixire ñaañaaƴ Luuluub fo Suusukot fo Kuukuus inooru Misira, a may boo mbaagaand o lim.

⁴A jaɓa teeru cegu saŋe ke Yudaa soo a suuriid boo Yeerusaleem.

⁵Ye Siisak a matiidaa, o tuleer Semaya a soƥiida a Rehabewam fo maak we Yudaa mbokatoor’ina kam Yeerusaleem, a lay a den ee: «O Yaal oxe kaa tee: Feek kaa nu ndeɓaam, mi itam oo xam deɓ a nuun na xa ƥay Siisak.»

⁶O maad oxe fo maak we a neewandooxa, soo a lay ee: «O Yaal oxe mat ɓuru.»

⁷Ndak fo ndak, ye o Yaal oxe a ga’na a neewandax ale den a layahina a Semaya yee: «Feek a neewandooxa, moocandkiim a den. Paktaand kaa xam mucil a den, yaam ricooxaam ke bug’uuma o ɓax fuux es kam Yeerusaleem, xaƴ a Siisak ta baytin.

⁸Kaa rek xan da ƥoxotoox na Siisak too neene xan da and njektir ne refna ndeer o ɓoxotoox na mi o Yaal oxe fo ɓoxotoox no maad we na adna fee.»

⁹Siisak fee o maad Misira a gara, a song a Yeerusaleem. A janga halal fee no Mbind ne no Yaal oxe fa fee no mbind no maad ne. A janga fop, a jang itam pegoor wurus ke Salomo a fi’in’ina sax.

¹⁰Maaga, o maad Rehabewam a jalna pegoor xanjar, ndax ta fi a den me kaana a ndeeƭna. A doxna a den aa-adax we no xiixire we na yetooxaa ndokand ne no mbind no maad ne.

¹¹Mbanuu o maad oxe a retoogna no Mbind ne no Yaal oxe, yeeyetax we kaa saqoogu pegoor ke. Cinj kaaga, a nomtiidooga a den no yetoorand ole.

¹²Ne Rehabewam a neewandooxna, fuux le no Yaal oxe a ɓoosa too moocand’iran, yaam paax a maada o jegaa no maat ne Yudaa.

¹³O maad Rehabewam a saƭkanda maat um kam Yeerusaleem. Xa kiid qarɓeen nahik fo o hiid o leng a jeg’u, ye ta sogna refaa o maad. A maadooxa xa kiid xarɓaxay fo xa kiid ɓetaa ƭaq kam Yeerusaleem refna teeru fee o Yaal oxe a jilna na carind ake Isra’el fop, ndax gon um a ref teen. Ya Rehabewam Naama a ne’’e, a ref o Aa-amon.

¹⁴Rehabewam a fi’a kaa faaxeerna yaam damoox’atee no Yaal oxe no xeeñ um fop.

¹⁵Ke xotitna no mberaandoong ne na cosaan fee Rehabewam boo no muukandoong ne kaa bindel na safe ke na nqoyeel «A pi ake Semaya, o tuleer oxe» fo «A pi ake Ido, o ƭeet oxe». Rehabewam fa Yerobowam kaa ngen’u no nqire’aa kili.

¹⁶Ye Rehabewam a dabna daan um, a gase na ƥak ale Dawid, o ƥeem Abiya a rondandin.