Read NQAARIIT NE ROOG 2 Caloori ke 13 Bible Online

2 Caloori ke 13 - NQAARIIT NE ROOG bible

2 Caloori ke 13

¹No hiid xarɓaxay fo hiid o ɓetuu dadkandeer ole no maat Yerobowam, Abiya reeƭatu o maad Yudaa.

²A maadooxa xa kiid xa tadaq kam Yeerusaleem. Ya um Mikaya a ne’’e, a ref o ƥiy o ndew Uuri’el fee genna Gibe’a. Abiya fa Yerobowam kaa nqire’oogu.

³Abiya a roka na ñoq ale fo a yaj no xiixire waa ndefna xir say cuni teemeed nahik. Yerobowam a siiknoorta fo ten a yaj no xiixire laa fi’na xir say cuni teemeed ɓetuu tadik.

⁴Abiya a ŋaaya no jul olaa no joong olaa Semarayim fogna na xa coong axe Efrayim. A foda maaga, a lay ee: «Yerobowam fo Ii-isra’el we fop, nan-gilooxaamoo!

⁵Kaa nu andee yee o Yaal oxe Roog fee Isra’el kaa ci a Dawid maat ne kam Isra’el boo kili, ten fo xa ƥeem fo xa taan um, a fi’tin ngiɓoor naa waageerna o ɗeg.

⁶Kaa koy, Yerobowam fee o ƥiy Nebat too a reeƭu o tag Salomo fee o ƥiy Dawid, a inooxa a siiknoor fo o yaal um.

⁷Wiin goɓong fo jaree tus a mbokatoora maa ten, a sooban took Rehabewam fee o ƥiy Salomo. Rehabewam koy, kaa reeƭu o njaaƈ too jeg’afulee a qalaat a qooɗu, waag’ee o xox mbaambir den.

⁸Ndiiki koy, kaa nu njeemaa o siiknoor fo maat ne o Yaal oxe a doxinna xa taan axe Dawid. Kaa nu mbi a yaj no xiixire cegu doole soo ngadoox fo nqeel wurus ne Yerobowam a fi’’ina da ndef roog nuun.

⁹Kaa nu ndax saasadax we no Yaal oxe ndefna xa taan axe Aaroon fo Leelewi we, soo njilan a qoox nuun saasadax nen qeet ke na saax a lakas ake. Oxuu ɓisiid’ina nqoox fo a suk paal ɓetaa ƭaq rek, nu ndalfooxin o mbi o saasadax no ke refeerna Roog.

¹⁰In o mat o Yaal oxe refu Roog in, too i ndeɓiran. Xa taan Aaroon ndefu saasadax we na njalanaa o Yaal oxe too Leelewi itam kaa njalanan.

¹¹Nqes fo kirand kaa da ƥoxotaa o Yaal oxe sadax toxel, a ndoxanan cuuraay, xa kaf puuru xe ƥoxoteena a Roog da ndoonaa a den na taabul a tedu le. Kirand nuu refna kaa ngeƥandaa xa lampa xe na pagal wurus ake. Kaa i mbadnaa fo ngor calel ke no Yaal oxe Roog in, ndaa nuun o mat, kaa nu mbaasin.

¹²Ndiiki koy, Roog o mat adooxanu a in too saasadax we ten owey meen, a njagandoox ndax da mbangin a luuƥ ake soo i njibin xa buuq xire. Yaaga boog, nuun Ii-isra’el we, ba nu nqire fo o Yaal oxe Roog fee no daan nuun, yaam nu nqotitkee teen o ndam o leng.»

¹³Yerobowam koy kaa hebil’u a qaaj no xiixire we ten da ndet a ƥeŋ a cinj no Yuuyudaa we. Weene boog kaa ndeeƭu a ndeer no Ii-isra’el we da njasnoor’ina fo we mbod’ina a den a cinj.

¹⁴Ye Yuuyudaa we a ngeleerooxna, a nga’a yee a mbar’a o ñoxorit we da njasnoor’ina fo itam we mbod’ina a den a cinj. Maaga, a ndalfooxa o ƈufginoox o Yaal oxe too ye saasadax we a njibinna a luuƥ ake,

¹⁵xiixire we Yudaa a njibna xa buuq xire. Ndak fo ndak, o Yaal oxe a xawa a Yerobowam fo Ii-isra’el we mbaambir Abiya fo Yuuyudaa we.

¹⁶Ii-isra’el we a ƈufa mbaambir no Yuuyudaa we soo Roog a ɓoxot a den na xa ƥay no weene.

¹⁷Abiya fo a yaj ale ten a nqawa a den a qaw a ƭomu. A mbara na den goor cuni teemeed ƥetik waa ndefna xir say.

¹⁸A koom, Ii-isra’el we a neewand’e soo Yuuyudaa we a njeg o ndam onqe yaam kaa ngeƈnoox’u no Yaal oxe Roog fee no daan den.

¹⁹Abiya a daaba a Yerobowam soo a janganin teeru keeke: Betel, Yesana fa Efron fo caate ke da mbaxooxna.

²⁰Yerobowam koy, jeg’atee doole na jamaane Abiya. O Yaal oxe a xawaan soo ta xon.

²¹Abiya mat a moƴa o jeg doole. A jeg’a rew xarɓaxay fo rew nahuk soo a jeg xa ƥiy xa koor qarɓeen ƭik fo xa ƥiy xa koor xa ƭaq, fo xa ƥiy xa tew xarɓaxay fo xa ƥiy xa tew ɓetuu fa leng.

²²Ke yoqna na pi ake Abiya kaa mbindel no safe le ne’eena «Betandoor ke no tuleer Ido». Maaga, kaa laytaa a pi ake ten fo ke ta fesoorna.

²³Abiya a daba daan um soo a gasel na ƥak ale Dawid. Aasa fee o ƥeem a rondandaan. No ñoow Aasa, saax le a reeƭata na jam boo xa kiid xarɓaxay.