Read NQAARIIT NE ROOG 2 Caloori ke 15 Bible Online

2 Caloori ke 15 - NQAARIIT NE ROOG bible

2 Caloori ke 15

¹Yiif le Roog a fudooxa took Asariya fee o ƥiy Oded.

²A inooxa a soƥik a Aasa, a layin ee: «O maad Aasa fo nuun Yuuyudaa we fo Beebensame we, nan-gilooxaamoo! O Yaal oxe xey fa nuun yaa nu ndefna fo ten. Nu mbaaƭangaan, xan a ga’noox a nuun. Kaa koy, nu mbaasangaan, xan a waas a nuun itam.

³Ii-isra’el we o mat a ñoowa miñu no kaa da ndeefeerna a Roog fa ndigil fee, saasadax waa na njangnaa a den nga’aand too ngayee kebil ke.

⁴Kaa koy, kam naqad den a nomtooxiida no Yaal oxe Roog fee Isra’el, a mbaaƭin, soo o Yaal oxe a ga’noox a den.

⁵Na jamaane faaga, o kiin retoogee a garaa na jam. Wiin we na saax ake fop kaa ngen’u no jaq.

⁶Kaa ngen’u no ñoxoraa, xeet a inooxan fa ngend um, teeru a inooxan fa ngend um, yaam Roog kaa jaxasit’u a den o njakad onquu refna.

⁷Yaaga boog, saƭikyo too ba nu nqaƴ xa ƥay nuun da yaar, yaam a pi ake nuun xan a saɗgel.»

⁸Ye Aasa a nanna fa lay faaga fo njo’it ne no tuleer oxe, a saƭakinooxa, a yaq cakalaaru ke kam Yudaa fa Bensame fo no teeru ke na xa coong axaa Efrayim ta jaɓ’ina. Cinj kaaga, a jagandatina o sadaxand ole no Yaal oxe reeƭna mbaambir o ndambalaan onqaa no Mbind Roog ne.

⁹Ii-isra’el mayu na carind ale Efrayim fo na le Manaase fo na le Simewon a nqaƴa saax den, a ngat Yudaa yaam ne da nga’na yee o Yaal oxe refu Roog fee Aasa too a reeƭa fo ten. O maad oxe a xoyna Yuuyudaa we fo Beebensame we fo we ngat’atna no saax um fop.

¹⁰A mbokatoora Yeerusaleem no nqool o ndadkandeer onqe no hiid xarɓaxay fo ɓetkandeer ole no maat Aasa.

¹¹No ñaal naa da mbadiidna, a ƥoxota o Yaal oxe sadax qoox teemeed ɓetuu ƭik fo paal cuni ɓetuu ƭik no ke da njangalit’ina no fañ we.

¹²A ngebooxa na qeeñ den fo na xa laaw den fop o mbaaƭ o Yaal oxe Roog fee no daan den.

¹³Oxuu damoox’eerna no Yaal oxe Roog fee Isra’el koy kaa war’u o maaltel fa nqon, ta ref o maak mbaat o ndeɓ, o koor mbaat o tew.

¹⁴A ndaaɓooxa no Yaal oxe fo xa ñuxur xa maak fo xa soroxole, a yoonandtin a luuƥ fo a seeluumb.

¹⁵Yuuyudaa waa fop a mbelakinooxa na taaƥ alaaga. Den fop kaa mbi’it’un a qeeñ a letu fo took o mbosoox o mbaaƭ o Yaal oxe. Maaga, o Yaal oxe fa xoox um a ga’nooxa a den soo a ci a den a ñootnax na xa saax axe fop.

¹⁶O maad Aasa a watna sax lingeer ne Maaka fee maam um yaam oxeene kaa sipan’u a Asera mbangool. Aasa a yaqa mbangool neene, a duguñin soo a doxtin na yulanq alaa Kederon.

¹⁷Kaa koy, ke xeeñ um fop a refan’ina a Roog no ñoow o ñis um fop oo, tax’ee ta moocand a ñaang a sadaxand ake.

¹⁸A ɓisiida kam Mbind Roog ne ke faap um a kes’ina fo ke ta kes’ina ten fa xoox um, refna xaaliis fa nqoolu fee, wurus fee fo tig oo tig pogreer.

¹⁹Xire jeg’atee boo no hiid qarɓeen tadik fo ɓetkandeer ole no maat Aasa.