Read NQAARIIT NE ROOG 2 Caloori ke 16 Bible Online

2 Caloori ke 16 - NQAARIIT NE ROOG bible

2 Caloori ke 16

¹No hiid qarɓeen tadik fo ɓetaa fo lengandeer ole no maat Aasa, Baasa fee o maad Isra’el a songiida saax le Yudaa, a ref no saƭkandaa teeru fee Rama, ndax wiin we Aasa fee o maad Yudaa sutooxkatee mbaat da ndokiid.

²O maad Aasa a janga na xaaliis fee fo na wurus fee na kamba le no Mbind ne no Yaal oxe fo na kamba le no mbind ne no maad oxe, a lultin maa Ben-Hadad fee o maad Araam too a gen Damaas, ndax ta layanel o ten ee:

³«Fat i tipir nqaariit, ne ta refit’ina a ndeer faap es fa faap of. Lultiidaaxoong xaaliis fa wurus. Reti tas nqaariit ne a ndeer of fa Baasa fee o maad Isra’el, ndax ta in wiin we ten no fiisel ole mi.»

⁴Ben-Hadad a jaɓa fa lay faaga no maad Aasa. A dalfooxa o lul aa-adax we no xiixire we ten kam Isra’el, soo da songik teeru ke Isra’el. A njaɓa a Iyon, Dan, Abel-Mayim fo teeru ke ndeeƭna taga no maad no fiisel ole Neftali fop.

⁵Ye Baasa a yegna kaaga, a xaƴa maq ne Rama ta fi’oogna.

⁶Maaga, o maad Aasa a gara fo Yuuyudaa we fop, ndax da ƥistin a ƥil ake fo a teex ake Baasa a jiriiñooroogna no maq ne. O maad Aasa a jiriiñoora a den, ndax ta xoxit a Geba fa Mispa.

⁷Na jamaane faaga, Hanani fee o ƭeet oxe a soƥiida a Aasa fee o maad Yudaa, a layin ee: «Yaam ne geƈnooxoona no maad oxe Araam, fañ o geƈnoox no Yaal oxe Roog of, xiixire we no maad Araam a ƥostooxaang.

⁸Mee ndax Kuukuus we fo Luuluub we a yaj no xiixire cegu doole a mbi’’u, a yoonit a sareet-xire fo ŋaaŋaay pis waa mbaagaandeena o lim! Yaqan’ee toox de o Yaal oxe a ɓoxot a den na xa ƥay of, yaam kaa o geƈnoox’u no ten.

⁹O Yaal oxe kaa horooxaa we no lanq ke fop ndax ta saƭkand we a qeeñ den a ndamooxna no ten. Me ta refna koy, kaa o xalaatit nen o ƭof too meene o reefkaa xire’ataa.»

¹⁰Aasa a dalfooxa o sayan o ƭeet oxe soo a wegnoorin kaso yaam fa lay fee no xeene kaa fuuxnoor’un lool. Na jamaane fa leng kut faaga, Aasa a refa no toroxandaa itam leng-leng na xeet um.

¹¹Ke xotitna no mberaandoong ne na pi ake Aasa boo no muukandoong ne kaa mbindel no «Safe le no maad we Yudaa fo we Isra’el».

¹²No hiid qarɓeen tadik fo ɓetuu nahkandeer ole no maat um, jir ɗomu a damaan na caf. Ke jir le a ɗom’ina fop oo, taxee ta waaƭ o Yaal oxe ndax a ƴufginook o baawaadin.

¹³Aasa a daba daan um no hiid qarɓeen nahik fo lengandeer ole no maat um,

¹⁴soo a gasel na mboy ale ta fi’in’ina kam a ƥak ale Dawid. O dal ole ten kaa doon’el no njong naa da njuum’ina qeeñe-xeeñe mayu kaa mbogreerna too jaajaxas cuuraay we a mbi’’un, soo a ngeƥandanin ƈulfaan maak.