Read NQAARIIT NE ROOG 2 Caloori ke 19 Bible Online

2 Caloori ke 19 - NQAARIIT NE ROOG bible

2 Caloori ke 19

¹Yosafat fee o maad Yudaa a nomtooxiida fa jam no mbind um kam Yeerusaleem.

²O ƭeet Yehu fee o ƥiy Hanani a xetooxiidaan, a layin ee: «Ndax soxodu we o bugko dimle’aa, soo fex we mbañna o Yaal oxe? O Yaal oxe kaa fuuxanong koy yaam ke fi’oona.

³Yaag oo toox de a maada o jegaa kaa faaxna na wo yaam moocandaa no saax of xa taaƴ xa lupe xe Asera soo waaƭ o Yaal oxe no xeeñ of fop.»

⁴Yosafat koy kam Yeerusaleem a gen’u. A reefana xeet faa fop ke xottoonga Beer-Seeba boo na xa coong axaa Efrayim, a nomtiid a den no Yaal oxe Roog fee no daan den.

⁵A dalna haahate kam saax le, kam teeru cegu saŋe ke Yudaa fop.

⁶A laya haahate waa yee: «Mbadinyo o far nuun ne waritna, yaam nu ngate’anee wiin we, ndaa o Yaal oxe nu ngate’anaa, too ten fa xoox um sax xan a ref fa nuun yaa nu ngate’aa.

⁷Ndiiki koy, saɗaryo o Yaal oxe, mbootoox a paax yaa nu ƭegaa hate, yaam o Yaal oxe Roog in jaɓkee njofaƭar mbaat o farit o kiin mbaat o jaɓ o gerel.»

⁸Kam Yeerusaleem itam Yosafat a jila Leelewi fo saasadax fo yaal ƥasil waa na ngate’aa no gon no Yaal oxe, a nqafaa taawir ke no we ngenna na teeru fee.

⁹A hebla a den ee: «Fat nu mbesoor neeke took o saɗar o Yaal oxe fo ngor fo xeeñ damooxu:

¹⁰Layoor nuu fog nuun we ngenna no teeru ke a ƥisiidna me nuun, ta jof na bar mbaat no kebil ke mbaat no bargal ke mbaat kaa dalneena mbaat no mbaax onqe, fat nu maƭoox a den. Neene, tooñkee o Yaal oxe too fuuxankee a nuun, nuun fo fog nuun. Mbesooryo neene yaam ndik nu tooñ nuun fa qoox nuun.

¹¹Amariya fee o saasadax o maak oxe xan a yetooxaa a nuun no kuu farna no Yaal oxe, Sebadiya fee kelfa’na maat ne too a ref o ƥiy Isma’el a topatooxaa kuu farna no maad oxe. Leelewi we mat xan a mbadnaa o far den na ñaaƈnooƭ ale no saax le. Njalyo boog fo njambaar ndeyu sik! Yaasam o Yaal oxe a ref fo we na mbi’aa paax.»