Read NQAARIIT NE ROOG 2 Caloori ke 20 Bible Online

2 Caloori ke 20 - NQAARIIT NE ROOG bible

2 Caloori ke 20

¹Cinj kaaga, Moomowaab we fo Aa-amon we a mbokatoora fo Meeme’un[10] we ƥaatoox’ina na den, soo da nqire’iid fa Yosafat.

²O maad Yosafat a yegne yee: «A yaj no xiixire fagkatar owe songiidang, a inoor no saax o lakas ole no maag o Xanju le no saax laa Edoom[11], too owaay Hasason-Tamaar refna ref En-Gedi.»

³Diid maak a dama a Yosafat soo ta heboox o waaƭ o Yaal oxe. A yegnita koor kam xeet fee no maat ne Yudaa fop.

⁴Yuuyudaa we a inooriida no teeru ke kam saax le fop, a mbokatoor ndax da nqeɗ o ndimle no Yaal oxe.

⁵Yosafat a geenooxa a ndeer mbokatax ne no Yeeyeerusaleem we fo Yuuyudaa lakas we mbaambir o maax o xas ole no Mbind ne no Yaal oxe.

⁶A laya yee: «O Yaal oxe Roog fee no daan in, mee ndax wo refu Roog fee na asamaan too wo na maadooxaa took qeet ke na saax ake fop. O ɓay of saqu doole fa katil faa o leng a waageerna o xox.

⁷Wo refu Roog in fee raxna we ngen’ina no saax leeke mbaambir Isra’el fee xeet of, soo ci’in xa taan axe Abraham mbexoonga da njegkin boo kili.

⁸A ngena saax le, a maxan teen gon of o mbiñ o tedu, a lay ee:

⁹‹Taamaala a dalangaa a in, ta ref xire mbaat a qaw mbaat piste mbaat biim xan i ngeenoox mbaambir Mbind neeke fo mbaambir of yaam gon of ley no Mbind neeke. Kam naqad in i ƈufginooxangaang, fat o ƴufgiid soo mucil a in.›

¹⁰Ndiiki koy, Aa-amon we fo Moomowaab we fo we na xa coong axe Seyiir, fañit’oona Ii-isra’el we da ndeef me den ye da sutoorna Misira, yaam kaa laqtoox’u a den too moocandee a den,

¹¹ga’angi ke da ndabdiidna a in, a ngara ndax da ndaxit a in no lanq ke ci’oona a in.

¹²Cey, o Yaal oxe Roog in, ndax kaa hate’kiro a den? In de, kaa i ñak doole mbaambir faan mayu leeke na ngaranaa a in, too i njegee naa i mbi’na. Kaa koy, a kid in owe ngaana na wo.»

¹³Yuuyudaa we fop boo no rew we fo xa caaƈ axe kaa ngeenoox’u mbaambir no Yaal oxe.

¹⁴A ndeer ee ndeer mbokatax naa, Yiif le no Yaal oxe a fudooxa took Yahasi’el fee o Leelewi too a ref o ƥiy Sakari fo o ndaan Benaya fee o ƥiy Ye’iyel too a ref itam o ndaan Mataniya fo o ndaan Asaf.

¹⁵Yahasi’el a falalooxa yee: «Nan-gilooxaamoo a paax nuun we ngenna Yeerusaleem fo Yuuyudaa lakas we fop fa Yosafat fee o maad oxe. Keeke refu ke o Yaal oxe a layna a nuun: ‹Ba nu saɗar dara, too ba nu ndiid faan fagkatar leeke, yaam refee xire nuun ndaa xire no Yaal oxe yoo.

¹⁶O feet fat nu nqetik fo fañ nuun we na inoortiidaa no saax ole farna fo Ñaang le no piɗ ke. Xan nu nqet fa den no cat kaa no gamb laa jasnoorna fa koƥ-a-ƥor alaa Yeru’el.

¹⁷Nu soxla’ee koy o ñoxoraa fa den. Nuun wiin we Yeerusaleem fo Yuuyudaa lakas we fop, fat nu ngeenoox maaga rek, yaam kaaga a deya soo nu ƭeet ne um watitkaa a nuun, mi o Yaal oxe.› Ba nu saɗar dara too ba nu mbiriɓ. O feet fat nu nqetik fa den too xan o Yaal oxe a ref fa nuun.»

¹⁸Yosafat a dalfooxa o gung a lanq. We ngenna Yeerusaleem fo Yuuyudaa lakas we fop a ngung itam mbaambir no Yaal oxe, a mbaɗooxin.

¹⁹Cinj kaaga, Leelewi we na qaw ake Kehat fo na ke Koore a inooxa, a simat o Yaal oxe Roog fee Isra’el fo xa ñuxur xa cegu doole.

²⁰No feet olaa, a inooxa ƥiiɓ teel, a nqot farna fa koƥ-a-ƥor alaa Tekowa. Ye da ndetaa Yosafat a geenooxa a lay ee: «Nan-gilooxaamoo, nuun we ngenna Yeerusaleem fo Yuuyudaa lakas we fop. Fat a koolax nuun no Yaal oxe Roog nuun a saƭik too yaaga xan ta xoxit a nuun. Ngoolooxyo itam joojo’it we ten too yaaga xan nu njeg o ndam.»

²¹Cinj kaaga, a ga’ra fa xeet faa, a jilan o Yaal oxe giigim, da ndokoox toki tedu ke, a adooxan xiixire we soo a simataa o Yaal oxe yee: «Ngidimyo o Yaal oxe, yaam o mbeq um xan a maadaa boo faw.»

²²Ye da yoɗaa a kim a simatir ake, o Yaal oxe a jaxasranda Aa-amon we fo Moomowaab we fo we na xa coong axaa Seyiir ngaranoogna Yuuyudaa we soo da ñoxoraa a ndeer den.

²³Aa-amon we fo Moomowaab we a ndalfooxa o song Seeseyiir we, a nduguñ a den, a moocand a den. Cinj kaaga, da moocandir.

²⁴Ye Yuuyudaa we a mbadiidna no mbiñ onqe waageena o ƴookit a koƥ-a-ƥor ale, a ngeleerooxa farna fo faan laa too nga’ee lakas, a refangee xa tal axe ƭaapooxna a lanq. O leng koy daɗ’ee.

²⁵Yosafat fa xeet fee ten a ndalfooxa o ndef no njangalaa ke da soƥna na mbeel xire laa. A soƥa maaga cegel mayu fa halal fo tikoorik fo tig oo tig cegu o njiriiñ. Keene kaa may’u boo da njeg ñaal tadik kaa da nduuñaa paax ke too sax mbaag’iran o ƥis fop.

²⁶No ñaal nahkandeer naa, a mbokatoora na yulanq ale na barke fee ndax da ngidim o Yaal oxe. Ten taxu o mbiñ onqaaga a xoyeel a yulanq Barke le boo no ñaal roog ne xaye.

²⁷Goor we Yeerusaleem fo Yuuyuda lakas we fop fa Yosafat fee adooxan’ina a den a nomtooxa Yeerusaleem fo o ɗaay. O Yaal oxe kaa mayƭand’u a den fo o ɗaay ye ta watna a den no fañ den.

²⁸A ndoktiida kam Yeerusaleem a tiiti fo fo nqilimb fo a luuƥ boo no Mbind ne no Yaal oxe.

²⁹Ye maat lakas ke fop a yegna yee o Yaal oxe kaa ñoxor’u fo fañ we Isra’el, diid maak a dama a den.

³⁰Maat ne Yosafat a yaadoox’ata, yaam Roog um a ci’in a ñootnax na xa saax axe fop.

³¹Ye Yosafat a sogna o refaa o maad, a soƥ’a ta jeg xa kiid qarɓeen tadik fo xa kiid xa ƥetaq. A maadooxa xa kiid qarɓeen ƭik fo xa kiid xa ƥetaq kam Yeerusaleem. Ya um Asuba a ne’’e, a ref o ƥiy o ndew Silhi.

³²A reefooga o jaf faap um Aasa, a fañ o waas, a fi’aa kaa jofna na kid no Yaal oxe.

³³Kaa koy, a ñaang a sadaxand ake moocand’aand, ten taxu xeet fee ndamoox’ee na Roog fee no daan den na qeeñ den fop.

³⁴Ke xotitna no mberaandoong ne na pi ake Yosafat boo no muukandoong ne kaa mbindel kam «A pi ake Yehu fee o ƥiy Hanani» too da ƥekel no «Safe le no maad we Isra’el».

³⁵Cinj kaaga, Yosafat fee o maad Yudaa a hiɓoora fa Ahasiya fee o maad Isra’el, a pesoorooƭ um a faaxeerna.

³⁶A fokatoora fo ten ndax da njal a kaal akaa na mbugko ndetaa boo Tarsis. A njala a kaal akeene na waax faa Esiyon-Gebeer.

³⁷Kaa koy, Eliyeseer fee o tuleer oxe too a ref o ƥiy Dodawa fee o Maamaresa a jo’ta a Yosafat ee: «Feek kaa o hiɓoor fa Ahasiya, xan o Yaal oxe a yaq ke jaloona.» A kaal akaa a nduguñooxa boo mbaagatee o ndet Tarsis.