Read NQAARIIT NE ROOG 2 Caloori ke 21 Bible Online

2 Caloori ke 21 - NQAARIIT NE ROOG bible

2 Caloori ke 21

¹Yosafat a daba daan um soo a gasel me no daan um na ƥak ale Dawid. O ƥeem Yehoram a rondandaan no maat naa.

²Yehoram a jeg’a xa teɓ axaa ta fogitna a faap, da ndef: Asariya, Yehi’el, Sakari, Asariyahu, Mika’el fa Sefatiya. Den fop xa ƥiy Yosafat fee o maad Yudaa a ndeeƭu.

³Yosafat fee faap den kaa fi’an’u a den ci’it mayu na xaaliis fa wurus fo no tig cegu o njiriiñ soo a doxin a den da ƭoxaa teeru cegu saŋe ke Yudaa. Kaa koy, Yehoram a jil’u ndax ta rondandin no maat ne yaam ten reeƭu taaw.

⁴Ye Yehoram a jangna maat ne faap um boo a saƭkandin, xa teɓ axe ten fop fo kelfa leng-leng kam Isra’el a warta a den laƥ.

⁵Yehoram a jeg’a xa kiid qarɓeen tadik fo xa kiid xa ƭaq soo a refkaa o maad. A maadooxa xa kiid ɓetaa tadaq kam Yeerusaleem.

⁶A reefa o jaf no maad we Isra’el, ne mbind Ahab a mbi’it’uuna. Kaa gilig’u o ƥiy o ndew Ahab, soo a fi kaa faaxeerna na kid no Yaal oxe.

⁷Kaa koy, o Yaal oxe bug’ee o moocand mbind Dawid, yaam kaa reg’u o tag um Dawid ee xan a jegaa kili o leng na xa taan um oxaa na maadooxaa.

⁸No maat Yehoram, Ee-edoom we a siiknoora fo maat ne Yudaa soo a ndalnan a qoox den o maad.

⁹Maaga, Yehoram a reta a yoon fo aa-adax we no xiixire we ten fo a sareet-xire ke ten soo Ee-edoom we a mbid a den o kurul-keƥ. A ndeer o yeng o njeek o maad oxe a songa Ee-edoom we.

¹⁰No kaa xotitna na waxtu faaga, Ee-edoom we a njegata a qoox den na Yudaa boo xaye. Na jamaane fa leng kut faaga, teeru fee Libna a jegata a xoox um itam na Yudaa, yaam Yehoram kaa fañ’u o nanan o Yaal oxe Roog fee no daan um.

¹¹Yehoram a reta sax boo a fi a ñaang a sadaxand took xa coong axe Yudaa soo a ɓek wiin we Yeerusaleem no njaga[12], Yuuyudaa we ta ɓek a den no caasaay.

¹²Yehoram a daawa a pind no tuleer Eliya, akaa layuuna yee: «O Yaal oxe Roog fee no taan of Dawid kaa tee: ‹Ne reefeeroona o jaf faap of Yosafat fo o taan of Aasa fee reeƭna o maad Yudaa,

¹³ndax o dek reefik o jaf no maad we Isra’el, ɓek we Yeerusaleem fo Yuuyudaa lakas we fop no laalaa njaga ne no mbind Ahab soo war xa teɓ of axe fogtoona a faap sax too da moƴong,

¹⁴ten taxu xan o Yaal oxe a xawit xeet of fo xa ƥeef fo reef fo o jeg of fop taamaala fa maak.

¹⁵Wo fa xoox of koy, xan a cir a pogreer a ndalong too leng na den kaa moƴkaa o ɓaatooxaa ñaal oo ñaal boo yaa laaw of ke a ngarna tafil.› »

¹⁶O Yaal oxe a riña Fiifilista we fo Araab we ndefna gentand no Kuukuus we da nqire’iid fa Yehoram.

¹⁷A songiida maat ne Yudaa, a ndok kam saax le soo a njang kalal ke ndeeƭna kam mbind ne no maad oxe boo sax na xa ƥeem fo reem too yoqiɗ’atee o leng a refangee Yowahas fee na xoyahineel Ahasiya, refna mbat-fo-ɗeen ne ten.

¹⁸Cinj kaaga fop, o Yaal oxe a xawtaan jir laa waageerna o wod no laaw ke ten.

¹⁹Farna fo muukandoong ne no hiid o ɗikandeer ole, jir le Yehoram a ɓaatooxooga ñaal oo ñaal boo laaw ke ten a ƥaxooxiid. A jega coono fa ƭomu soo a xon. Xeet um a mbañaan o ngeƥandan ƈulfaan ne da mbi’anit’uuna daan we ten.

²⁰Xa kiid qarɓeen tadik fo xa kiid xa ƭaq a jeg’u soo a refkaa o maad, a maadoox xa kiid ɓetaa tadaq kam Yeerusaleem. A xona too o leng looliran. A gase na ƥak ale Dawid, kaa koy refee me maad we a ngeekeena.