Read NQAARIIT NE ROOG 2 Caloori ke 22 Bible Online

2 Caloori ke 22 - NQAARIIT NE ROOG bible

2 Caloori ke 22

¹We ngenna Yeerusaleem a ndoda a Ahasiya refna mbat-fo-ɗeen ne Yehoram ta rondand a faap um no maat naa. A yaj ale yooniid’ina fo Araab we no saŋe naa no Yuuyudaa waa kaa mbar’u maag we no xeene. Neene, Ahasiya fee o ƥiy Yehoram a refata o maad Yudaa.

²Xa kiid qarɓeen ƭik[13] fo xa kiid xa ƭaq a jeg’u ye ta sogna refaa o maad. A maadooxa o hiid o leng kam Yeerusaleem. Ya um Ataliya a ne’’e, a ref o ndaan o ndew Omri.

³Ahasiya a reefa o jaf ƥasil ne Ahab, yaam ya um xa as xa paaxeer a asoogun.

⁴A fi’a kaa faaxeerna na kid no Yaal oxe ne ƥasil ne Ahab a mbi’it’uuna. Cinj fa nqon fee faap um, aa-as we ten no ƥasil ne Ahab a mbog’u too den ƥek’un no njakad.

⁵Na xa as den o mat a yoontu fa Yoraam fee o ƥiy Ahab too a ref o maad Isra’el, da ñoxorik fa Hasa’el fee o maad Araam na teeru faa Ramot kam Galaad. Kam a ñoq ale, Aa-araam we a ngaaña o maad Yoraam.

⁶Oxeene a nomtooxa Yisre’el, ndax ta waadnoox no kaañ ke ta gaañoor’ina Rama, ye ta xire’aa fa Hasa’el fee o maad Araam. Ahasiya fee o ƥiy Yehoram too a ref o maad Yudaa a gara Yisre’el, a ɗeetiid a Yoraam fee o ƥiy Ahab, yaam oxeene kaa xij’u lool.

⁷Roog a riña a Ahasiya ta ret maa Yoraam yaam a bug o saŋkin. Ye ta fadiidna, a yoona fa Yoraam da nqetik fa Yehu fee o ndaan Nimsi. Oxeene koy, o Yaal oxe kaa ɗuum’un[14] ndax ta moocand ƥasil ne Ahab.

⁸Yehu a fadna kate ne Roog no ƥasil ne Ahab. A xeta fo gelwaar we Yudaa fo xa ƥiy axe no maag we Ahasiya ndefna dag no maad oxe, soo a saŋik a den.

⁹Cinj kaaga, a waaƭnika a Ahasiya soo ta damtel kam Samari maa ta ɗas’ina. A ɓisiide mbaambir Yehu, a warel soo a gasel yaam wiin we kaa layoogu yee: «O ndaan Yosafat fee waaƭ’ina o Yaal oxe no xeeñ um fop a refu.» O leng no ƥasil ne Ahasiya xaa waagna o maadoox jeg’atee.

¹⁰Ye Ataliya fee ya no maad Ahasiya a yegna yee o ƥeem a xona, a inooxa, a saŋik ƥasil no maad ne kam Yudaa fop.

¹¹Kaa koy, Yehosabat fee o ƥiy o ndew onqe no maad oxe a janga a Yowaas fee o ƥiy Ahasiya, a xottin na yelem a ndeer xa ƥiy axe no maad oxe mbaroogeena. A fokataan fo xaa na numnan kam a ndok a pe’el ale. Neene, Yehosabat o ƥiy o ndew onqe no maad Yehoram too a ref o tew Yehoyada fee o saasadax, a ref itam o cigeen Ahasiya, a ɗasnaan boo Ataliya ga’iran ndax ta warin.

¹²A ɗasne fa den kam Mbind Roog naa boo xa kiid ɓetaa fo leng, yaam Ataliya maadooxoogu kam saax le.