Read NQAARIIT NE ROOG 2 Caloori ke 23 Bible Online

2 Caloori ke 23 - NQAARIIT NE ROOG bible

2 Caloori ke 23

¹No hiid o ɓetuu ɗikandeer ole, Yehoyada fee o saasadax a saƭakinooxa soo a dalin ngiɓoor fo aa-adax no xiixire teemeed we, da ndef: Asariya fee o ƥiy Yeroham, Isma’el fee o ƥiy Yohanan, Asariya fee o ƥiy Obed, Maseya fee o ƥiy Adaya fa Elisafat fee o ƥiy Sikiri.

²Weene a mbida maat ne Yudaa fop fo teeru ke fop, a mbokat Leelewi we fo yaal ƥasil Ii-isra’el we soo a yooniid fa den Yeerusaleem.

³Wiin we fop mbokatoorna kam Mbind Roog naa a ngiɓoora fo o maad oxe. Yehoyada a laya a den ee: «O ƥiy onqe no maad oxe xey, fat a maadoox ne o Yaal oxe a laytuuna na xa taan axe Dawid.

⁴Keeke refu ke nu mbi’kaa: No we na mberaa na nuun calel na bes fee na ñootnax ale, ta ref o saasadax mbaat o Leelewi, fat a qaaj a leng a yetooxaa ndokand ne no Mbind Roog ne,

⁵a qaaj a ƭikandeer ale a yetooxaa ndokand ne no mbind ne no maad oxe soo a qaaj a tadkandeer ale a yetooxaa Ndokand ne no fer le. Xeet fee fop koy no maax ole no Mbind ne no Yaal oxe a ndefkaa.

⁶Ba o leng a rok kam Mbind ne no Yaal oxe a refangee saasadax we fo Leelewi we na mbadnaa o far den. Weene a njega sañ-sañ o ndok teen yaam kaa da kesanel keene. Xeet fee fop a mbara o ngeenoox no ke o Yaal oxe a heblitna.

⁷Leelewi we na ndeerkaa o maad oxe o saax oo saax, oxuu refna a pokoox ƥonax um too o lakas oxuu rokiidna no Mbind Roog ne fat a warel. Fat nu ndef fo o maad oxe muu ta dakaa.»

⁸Leelewi we fo Yuuyudaa we fop a mbi’a ke Yehoyada fee o saasadax a hebil’ina a den. O aa-adax na yaj aluu refna a fokata wiin um, we sog’ina o ndokaa no far den na bes fee na ñootnax ale fo we muuk’ina o far den na bes faaga, yaam Yehoyada ci’’ee o leng na den a ñootnax a koom.

⁹Yehoyada fee o saasadax a coox’a aa-adax no xiixire teemeed we a salma ke fo pegoor maak ke fo teɓ ke o maad Dawid a jeg’ina, too da ndeeƭu no Mbind Roog ne.

¹⁰A fi’a xeet faa fop yeeyetax, oxuu refna a pokoox ƥonax um, da ngeenoox me xotitna no saax o ñamaak ole boo no saax o janoon ole no Mbind Roog ne paam o sadaxand ole fo paam Mbind Roog ne, ndax da ndeer o maad oxe.

¹¹Maaga, o ƥiy onqe no maad oxe a sutiide, a rokanel o ndip no maad onqe, a cooxel yiƥadax ne no safe le no kebil ke. A dalne o maad, soo Yehoyada fo xa ƥeem a ƭuumin, fop a mbalalooxaa yee: «Yaasam o maad oxe a ñoow!»

¹²Ye Ataliya a nanna coow le na xeet fee ƈufoogna, a simataa o maad oxe, a gara maa na xeet faa kam Mbind ne no Yaal oxe, a ɗeetiid.

¹³A ƴooka o maad o qas oxe ta geenoox took ndaalaand um no ndokand ne, aa-adax we fo luuluuƥ we a ngeenoox paam um. Xeet fee no saax laa fop kaa ndeeƭu no ɗaay, a luuƥaa, soo giigim we a saq pakir den a adooxan a simat ake. Maaga, Ataliya a dalfooxa faar toki um, a falaloox ee: «Hiɓaneem o ngir oo, hiɓaneem o ngir!»

¹⁴Maaga, Yehoyada fee o saasadax a hebla aa-adax no xiixire teemeed waa yee: «Ndeefneenoo ndeer xa qod axe, sutin, too oxuu ƴufgiiduuna, fat a wartel laƥ.» O saasadax oxe koy kaa lay’u yee baa ta wartel muk kam Mbind ne no Yaal oxe.

¹⁵A ndeƈ-ndeƈnaan boo no mbind ne no maad oxe, a ndeefnin no Ndokand ne no pis ke. Maaga mat a mbartun.

¹⁶Yehoyada a dalna ngiɓoor a ndeer um fa xeet faa fop fo o maad oxe yee a mbara o ndef xeet fee no Yaal oxe.

¹⁷Xeet faa fop a ndoka kam mbind a qeƭ ne Baal, a mbaytin, a nduguñ bo tee nem xa sadaxand axe fo nitaal ke ten, soo Matan fee o saasadax Baal, da mbartin mbaambir xa sadaxand axe.

¹⁸Yehoyada a doxna saasadax Leelewi we a yetax ale no Mbind ne no Yaal oxe. Dawid kaa fi’’u a den a qaaj ndax da ƥoxotaa o Yaal oxe sadax toxel ke ne ta bindteena no kebil ke Moyiis. Dawid bindan’un a den ndax da mbadnaa o far den fo a kim o ɗaay.

¹⁹Yehoyada a geenna yeeyetax we na xa ton-maax axe no Mbind ne no Yaal oxe ndax o leng oxaa xoolaƭarna rokkee teen.

²⁰Yehoyada a fokata aa-adax no xiixire teemeed we, wiin maak we, we njeg’ina sañ-sañ na xeet faa fo we no saax laa fop, da nqotit o maad oxe no Mbind ne no Yaal oxe, a ƥisin no mbind no maad ne, a ndeefnin no ndokand ne took soo a moofnin no uum-maamaad le.

²¹Xeet faa no saax laa fop a mbelakinooxooga, soo teeru faa a yeeɓooxat. Ataliya o mat a warit’e laƥ.