Read NQAARIIT NE ROOG 2 Caloori ke 24 Bible Online

2 Caloori ke 24 - NQAARIIT NE ROOG bible

2 Caloori ke 24

¹Yowaas a refa o maad, ye ta jegna xa kiid ɓetaa ƭaq, soo a maadoox xa kiid qarɓeen nahik kam Yeerusaleem. Ya um Sibiya a ne’’e, a gen Beer-Seeba.

²Yowaas a fi’a kaa faaxna na kid no Yaal oxe no ñoow o ñis Yehoyada fee o saasadax oxe.

³Yehoyada a waaƭana a Yowaas rew ɗik soo Yowaas a jeg xa ƥiy xa koor fo xa ƥiy xa tew.

⁴Cinj kaaga, Yowaas a hebooxa no xeeñ um o xendand Mbind ne no Yaal oxe.

⁵A fokata saasadax we fo Leelewi we, a lay a den ee: «Fat nu ndet kam teeru ke Yudaa fo kam Isra’el fop mbokatiid xaaliis fee na bateer ake o hiid oluu refna, ndax nu nqendand Mbind ne na Roog nuun, too ba nu yapatilin!» Kaa koy, Leelewi we a yapatilaan.

⁶Maaga, o maad oxe a xoya a Yehoyada fee o saasadax o maak oxe, a layin ee: «Xar taxu seriro Leelewi we da nqot xaaliis fee na bateer ake, Moyiis fee o tag no Yaal oxe a dalinna. A wara o xottel me no wiin we Yeerusaleem fo Yuuyudaa lakas we fo kam Isra’el fop, a ɓisiidel no Ƭiif ne saqna arka ne no ngiɓoor ne.

⁷Ataliya fa mbaaxeer fo xa ƥeem kaa mbiitin Mbind Roog ne, soo tig oo tig tedu ke teen fop da ƥis a den na xa cuurand axe Baaliin.»

⁸Maaga, o maad oxe a laya yee fat arka a fi’el, a diƈel tafil, no don-maax ole no Mbind ne no Yaal oxe.

⁹A yegnite kam Yudaa fo kam Yeerusaleem ee oxuu refna a wara o ɓisiid o Yaal oxe a bateer ale Moyiis fee o tag Roog a dalnan’ina Ii-isra’el we fop kam a koƥ-a-ƥor alaa.

¹⁰Aa-adax we fop fa xeet fee fop a sawara taaga, too a ƥisiida a bateer den, a yipan kam arka ne boo neen a mayu.

¹¹Mbanuu Leelewi we a mbarna o ƥis arka ne, ndax ta ɗeettel no mbind no maad ne, yaam a nga ee a jega xaaliis fa mayu, o piibind oxe no maad oxe fo o liilim xaaliis oxe no saasadax o maak oxe a yuurooga arka ne, cinj kaaga da nomtin na seek um. A mbi’ooga neene ñaal nuu refna too a mbokatooga xaaliis fa mayu.

¹²O maad oxe fa Yehoyada a cooxoogaan we adooxan’ina calel ke no Mbind ne no Yaal oxe. Weene a ndabdooga teen seesex we na ƥil ake fo daadaaƴ we fo xaaxaw celem fo xanjar ndax da nqendand Mbind ne no Yaal oxe.

¹³Jaajal we a ndefa teen too a qendand ale a ñaaƴa. A mbi’a boo Mbind Roog ne a dakoox naa ta reeƭna, a ɓaat o saƭik.

¹⁴Ye calel ke a muukooxna, aa-adax we no jaajal we a ƥisa o maad oxe fa Yehoyada ke yoq’ina na xaaliis fee. Kaaga a jiriiñoore ndax ta jaltel xa ƥaxañ axe no Mbind ne no Yaal oxe: Xa ƥaxañ xa paɗoor, xa sadaxir, a tokol fo ƥaxañ lakas wurus mbaat xaaliis. A ƥoxotooga kili sadax toxel kam Mbind ne no Yaal oxe took o sadaxand ole no Yaal oxe no ñoow o ñis Yehoyada fop.

¹⁵Yehoyada kaa nogoy’atu lool. A xona ye ta jegna xa kiid teemeed fo xa kiid qarɓeen tadik.

¹⁶A gase na ƥak ale Dawid me no maad we, yaam kaa fi’’u paax kam Isra’el, a fi’in na kid Roog fo no Mbind Roog ne itam.

¹⁷A cinj ye Yehoyada a xonna, kelfa ke Yudaa a soƥiida o maad oxe, a ngung mbaambir um soo a ƈaxin nof. O maad oxe a nan-gilooxa a den.

¹⁸Neene, Ii-isra’el we a nqaƴa Mbind ne no Yaal oxe Roog fee no daan den soo a mbaɗooxaa xa taaƴ xa lupe xe Asera fo pangool lakas ke. Fuux le no Yaal oxe a biltooxana a Yudaa fa Yeerusaleem yaam tooñ neene da mbi’’ina.

¹⁹O Yaal oxe a lultiida a den duleer ndax weene a nomtiid a den me ten. Duleer we a ƥanja a den, ndaa a mbaña o nan-giloox a den.

²⁰Maaga, Yiif le Roog a fudooxa took Sakari fee o ƥiy Yehoyada fee o saasadax. A inooxa, a faambir fa xeet faa, a lay a den ee: «Roog kaa tee: ‹Xar taxu nu mbañ o ndeef kebil es? Nu nqotitkee teen o ndam o leng toox de. Feek kaa nu nqaƴ o Yaal oxe, ten itam xan a xaƴ a nuun.› »

²¹Maaga, a ngiɓanaan o ngir, a mbartin a kac took kebil no maad oxe kam o maax ole no Mbind ne no Yaal oxe.

²²O maad Yowaas a weec’a boog o mbeq onqe Yehoyada fee faap Sakari a jeg’ina no ten soo a warnoor o ƥeem. Ye Sakari a xonaa, a laya yee: «Yaasam o Yaal oxe a ga ke na xewaa too a xawong.»

²³No muukandoong ne no hiid ole, xiixire we Araam a inooxana a Yowaas. A ndoka kam Yudaa fa Yeerusaleem, a nduguñ kelfa ke na xeet fee fop, soo a ƥis maa no maad oxe Damaas kalal ke da njangal’ina fop.

²⁴Xiixire we no Aa-araam we koy may’ee dara ndaa yaqanee o Yaal oxe a ɓoxot xiixire mayu na xa ƥay den, yaam weene kaa nqaƴ’u o Yaal oxe Roog fee no daan den. Neene, Aa-araam we a ndeeƭa a qaw na Yowaas.

²⁵Yaa da nqaadna, a mbaasaan fo jir ɗomu soo dag we ten a ngiɓanin o ngir, yaam fo’oy le no ƥiy onqe Yehoyada fee o saasadax. A mbartaan took njong um, soo ta gasel na ƥak ale Dawid ndaa fokat’aand fo maad lakas we.

²⁶We ngiɓan’ina a Yowaas o ngir ndeeƭu: Sabad fee o ƥiy Sime’at fee reeƭna o tew o Aa-amon fa Yosabad fee o ƥiy Simrit fee reeƭna o tew o Moomowaab.

²⁷A kon ake na xa ƥiy axe Yowaas fo ke duleer we a yegnitna no ten fo a betandax ale na qendand ale no Mbind Roog ne kaa mbindel no «Safe le na cosaan fee no maad we». O ƥeem Amatsiya a rondandaan no maat naa.