Read NQAARIIT NE ROOG 2 Caloori ke 25 Bible Online

2 Caloori ke 25 - NQAARIIT NE ROOG bible

2 Caloori ke 25

¹Amatsiya a jeg’a xa kiid qarɓeen ƭik fo xa kiid xa ƥetaq ye ta sogna refaa o maad. A maadooxa xa kiid qarɓeen ƭik fo xa kiid ɓetaa nahaq kam Yeerusaleem. Ya um Yowadan a ne’’e, a gen Yeerusaleem.

²Amatsiya a fi’a kaa faaxna na kid no Yaal oxe, ndaa koy refee fo xeeñ damooxu.

³Ye Amatsiya a saƭkandna maat um, a dalfooxa o war parɓa ke ten mbar’ina o maad Yowaas fee faap um.

⁴Kaa koy, warnoor’ee xa ƥiy axe den, a reefandin no ke bindeena no safe le no kebil ke Moyiis, ne o Yaal oxe a heblituuna yee: «Paap ke mbarnoorkaand yaam xa ƥiy axe den, too xa ƥiy axe itam mbarnoorkaand yaam we ndimna a den, ndaa oxuu refna xan a warel yaam bakaad um.»

⁵Amatsiya a fokata goor we no maat ne Yudaa fop soo a jil aa-adax no xiixire juni fo aa-adax no xiixire teemeed, a reefandin na qaw ake na carind ale Yudaa fo na le Bensame. We njeg’ina xa kiid qarɓeen ƭik a jof took a lime, soo a ndef goor cuni teemeed tadik waa ndefna xir say, a mbaag o ndet na xire, a mbaag o njiriiñoor a salma fo pegoor.

⁶A xotta kam Isra’el xiixire cuni teemeed waa ndefna cambaar, a rabid a den ngap parig qarɓeen tadik xaaliis fa nqoolu.

⁷Kaa koy, o kiin Roog a gara, a layin ee: «Daali maad, baa xiixire Ii-isra’el we a yoon fa wo, yaam o Yaal oxe faree fo maat ne Isra’el no ɓemb-roog o janoon, xa taan axeeke na Efrayim fop.

⁸O yoonangaa fa den, kuu jegoona jeg doole na ñoq ale fop oo, xan Roog a xawnoorong mbaambir no fañ of, yaam Roog a waaga o dimle mbaat ta xawnoor.»

⁹Amatsiya a laya o kiin Roog oxe yee: «Nam um fi’kaa koy fa xaaliis fee cooxuuma xiixire weene?» A doonaan ee: «O Yaal oxe a jega pexey naa ta ci’toonga kupu keene.»

¹⁰Maaga, Amatsiya a nomta xiixire we inoor’ina Efrayim da nqaad. Weene koy a mbuuxana Yuuyudaa we ƭomu soo a nomtoox no pind den, a mbuux boo a mbuɓaa.

¹¹Amatsiya a jega njambaar, a adooxan xiixire we ten, da ndet na yulanq alaa no fo jem ole. A warta maaga Ee-edoom cuni xarɓaxay.

¹²Yuuyudaa we o mat a ndama na den xiixire cuni xarɓaxay waa na ñoowaa, a ŋaayin a den no jul o joong, soo a ndiñtiid a den maaga boo den fop da nduguñoox.

¹³Xiixire Ii-isra’el we Amatsiya a nomit’ina koy, a fañit a den da yoon fo ten na ñoq alaa, a yena took teeru ke Yudaa ndefna ndeer Samari fa Bet-Horon. A mbara wiin cuni tadik soo a njangit maaga kalal mayu.

¹⁴A cinj ye Amatsiya a xawna Ee-edoom we boo a nomtooxiidaa, a ɓislooxiida roog ke na xa taan axe Seyiir, a fi a den roog um, a gungaa mbaambir den, a doxanaa a den cuuraay.

¹⁵Maaga, fuux le no Yaal oxe a biltooxana a Amatsiya soo ta heblaniidin o tuleer ta layin ee: «Xar taxu o geleeroox farna fo roog ke na xeet fene mbaageerna o mbat xeet den na xa ƥay of?»

¹⁶Ye ta maadna o layaa, Amatsiya a doonaan ee: «Ndax kaa o dodel o aa-as no maad oxe? Naagi cuxus o bugangee um warong.» O tuleer oxaa a layaan ee: «Andaam ee Roog kaa heboox o saŋkong, yaam fi’aa keene, doon teen fañ o nan-giloox o as es.»

¹⁷A cinj ye Amatsiya fee o maad Yudaa a ga’irna fo aa-as we ten, a lulta maa Yehowas fee o ƥiy Yehowahas too a ref o ndaan Yehu, a layin ee: «Gariidi i nqire!»

¹⁸Yehowas fee o maad Isra’el a naxooxa a Amatsiya fee o maad Yudaa yee: «Bes, ndakar-ñiig ne Libaŋ a lulta o layanel ndaxar seedar ne Libaŋ ee: ‹Ci’anaam o ƥiy onqe mi o ƥiy onqe wo o tew!› Kaa koy, ƥaaɓaan ke Libaŋ a ngara, a nduut ndakar-ñiig ne.

¹⁹Ke xawoona Ee-edoom we taxu o yoɗ a kand. Ndiiki koy, moofi no mbind of! Xar taxu boo o bug o rok na xire faa malkeeroonga, maa o yenitkaa, wo fo maat ne Yudaa fop?»

²⁰Amatsiya mat a fañaan o nan-giloox, yaam keene na Roog a inoor’u, ndax ta ɓoxotel na xa ƥay no pañ oxe took ne ta faɗooxoogna roog ke no Ee-edoom we.

²¹Maaga, Yehowas fee o maad Isra’el a jagandooxana xire, a gomrit fa Amatsiya fee o maad Yudaa Bet-Semes fee fogna na Yudaa.

²²Ii-isra’el we a nqawa Yuuyudaa we boo oxuu refna a ƴuf no mbind um.

²³Maaga Bet-Semes o mat Yehowas fee o maad Isra’el a damtu a Amatsiya fee o maad Yudaa too a ref o ƥiy Yowaas fo o ndaan Ahasiya. Cinj kaaga, a gara Yeerusaleem, a sex no saŋe ne o gur olaa o yaajel um a fi’na xa noonoong teemeed nahik, a xotit no Ndokand ne Efrayim boo no Ndokand ne no kooñ ne.

²⁴Cinj kaaga, a janga wurus fee fa xaaliis fee fop fo tig oo tig ke fop ndeeƭna kam Mbind ne no Yaal oxe xa taan axe Obed-Edoom a yetooxoogna, a dam itam na kamba le no mbind no maad ne, a dam faɗ soo a nomtoox Samari.

²⁵Amatsiya fee o ƥiy Yowaas too a reeƭu o maad Yudaa a ñoow’a xa kiid xarɓaxay fo xa kiid xa ƥetaq a cinj fa nqon fee Yehowas fee o ƥiy Yehowahas reeƭna o maad Isra’el.

²⁶Ke xotitna no mberaandoong ne na pi ake Amatsiya boo no muukandoong ne kaa mbindel no «Safe le no maad we Yudaa fo we Isra’el».

²⁷A cinj ye Amatsiya a fesna o Yaal oxe a cinj, a hiɓante o ngir Yeerusaleem, a ƴuf Lakiis, ndaa a daabe soo a wartel maaga.

²⁸A doone took pis, a ɓisiidel soo a gasel me no daan um, na ƥak ale Dawid.