Read NQAARIIT NE ROOG 2 Caloori ke 27 Bible Online

2 Caloori ke 27 - NQAARIIT NE ROOG bible

2 Caloori ke 27

¹Yotaam a jeg’a xa kiid qarɓeen ƭik fo xa kiid xa ƥetaq ye ta sogna refaa o maad. A maadooxa xa kiid xarɓaxay fo xa kiid ɓetaa fo leng kam Yeerusaleem. Ya um Yerusa a ne’’e, a ref o ƥiy Saadok.

²Yotaam a fi’a kaa faaxna na kid no Yaal oxe, ne faap um Usiya a fi’it’uuna deŋ. Kaa koy, rok’ee kam Mbind ne no Yaal oxe, ndax ta doxan a xoox um cuuraay, ne faap um a fi’it’uuna. Keene fop koy yaqan’ee xeet fee a moƴ a moƴ o mo’aa.

³Yotaam o mat max’u o don-maax took ole no Mbind ne no Yaal oxe soo a max mayu no saŋe ne na ƥak ale Ofeel.

⁴A maxa teeru took xa coong axe Yudaa fo saŋe fo xa yetooxand kam a suungaan ake.

⁵A xire’a fo o maad oxe no Aa-amon we soo a xaw a den. No hiid olaaga, Aa-amon we a ndabdaan a bateer ngap parig qarɓeen tadik xaaliis fa nqoolu fo ngap parig cuni qarɓeen tadik bele fo ngap parig cuni qarɓeen tadik lorso. Keene Aa-amon we a ndabid’un itam no hiid o ɗikandeer ole fo no hiid o dadkandeer ole.

⁶Yotaam kaa moƴ’u moƴ o jegaa doole yaam ne ta ñaaƴit’ina ne ta helitna mbaambir no Yaal oxe Roog um.

⁷Ke yoqna na pi ake Yotaam fo qire ke ten fo ke ta fesoorna kaa mbindel no «Safe le no maad we Isra’el fo we Yudaa».

⁸Xa kiid qarɓeen ƭik fo xa kiid xa ƥetaq a jeg’u ye ta sogna refaa o maad. A maadooxa xa kiid xarɓaxay fo xa kiid ɓetaa fo leng kam Yeerusaleem.

⁹Yotaam a daba daan um, a gasel na ƥak ale Dawid, soo Ahas fee o ƥeem a rondandin.