Read NQAARIIT NE ROOG 2 Caloori ke 28 Bible Online

2 Caloori ke 28 - NQAARIIT NE ROOG bible

2 Caloori ke 28

¹Ahas a jeg’a xa kiid qarɓeen ƭik ye ta sogna refaa o maad. A maadooxa xa kiid xarɓaxay fo xa kiid ɓetaa fo leng kam Yeerusaleem. Fi’ee kaa faaxna na kid no Yaal oxe, ta guutatir fo ne o taan um Dawid a fi’it’uuna.

²A reefa o jaf no maad we Isra’el boo sax a fi’an a Baaliin xa taaƴ celem cawne.

³A doxooga cuuraay na yulanq alaa Ben-Hinom soo a doxaa xa ƥeem nen sadax, yaam a laalaa a pi a cednooxu ke no qeet ke o Yaal oxe a rax’ina mbaambir Ii-isra’el we.

⁴A ɓoxotta sadax fa cuuraay took a ñaang a sadaxand ake fo took loot maak ke fo yoora ndaxar saqtu nuu refna.

⁵Maaga, o Yaal oxe Roog um a ɓoxotaan na xa ƥay no maad oxe Araam. Aa-araam we a nqawaan, a ndamanin faɗ mayu, a ƥis a den Damaas. Ahas a ɓoxote itam na xa ƥay no maad oxe Isra’el, soo oxeene a xawin a qaw a ƭomu.

⁶Na bes fa leng kut, Peqah fee o ƥiy Remaliya a wara Yuuyudaa cuni teemeed fo cuni qarɓeen ƭik waa ndefna xir say. Keene a xewa yaam kaa da mbes’u a cinj o Yaal oxe Roog fee no daan den.

⁷Sikiri fee o leng na salma-koor ake Efrayim a wara a Maseya fee o ƥiy no maad oxe fa Asrikam fee o aa-adax oxe no mbind no maad ne fa Elkana fee jawdiin no maad oxe.

⁸Ii-Isra’el we a ndama no fog den Yuuyudaa we rew fo xa teɓandoong cuni teemeed ƭik. A njangala itam kalal mayu, a ƥis a den Samari.

⁹A jeg’a maaga o tuleer no Yaal oxe xaa ne’eena Oded. A sutooxa, a xetooxiid xiixire we ngatoogna Samari, a lay a den ee: «Nu anda yee Roog kaa fuuxan Yuuyudaa we, ten taxu o Yaal oxe Roog fee no daan nuun a ɓoxot a den na xa ƥay nuun soo nu ndek nduguñ a den neeke fo fuux laa retna boo na asamaan.

¹⁰Kaa jolna keene, goor weeke fo rew weeke inoorna Yudaa fa Yeerusaleem kaa nu ngeboox o mbi a den faɗ. Ndax refee yee kaa nu ngadnaa a qoox nuun tooñ mbaambir no Yaal oxe Roog nuun?

¹¹Ndiiki koy, nan-gilooxaamoo a paax too nomit fog nuun weeke nu ƥisiidna took o hup doole, yaam fuux ɗomu le Roog oxey took nuun.»

¹²Maaga, leng-leng weeke no kelfa ke no Ee-efrayim we: Asariya fee o ƥiy Yohanan, Berekiya fee o ƥiy Mesilemot, Hiskiya fee o ƥiy Saalum fa Amasa fee o ƥiy Hadlay a inooxana xiixire waa ngatoogna.

¹³A laya a den ee: «Nu ndokniidkee mene weeke nu ƥisiidna took o hup doole, yaam yaaga nu tooñnoor a in o Yaal oxe, ƥaatin no pakaad in fo no tooñ in. Tooñ ne i mbi’na soom a deya too fuux ɗomu le no Yaal oxe oxey took Isra’el.»

¹⁴Xiixire waa a nqaƴa we da ndamiid’ina fo paax ke da njaɓiid’ina mbaambir aa-adax waa fo mbaambir mbokatax naa fop.

¹⁵Goor weene ne’eena a inooxa, a nqot we ƥisiid’eena took o hup doole, soo a njiriiñoor ke jangaliid’eena, a ñir fop we yoq’ina cer ƥor. A cooxa a den ñirax fo xa ñaaƭ, a coox a den da ñaam, a yer soo da laxasan a den kaañax ke. A ŋaayna fop we mbaag’eerna a ñaaƈ took xa paam soo a nomit a den Yeriko refna teeru fee no keec ke maa no fog den. Cinj kaaga, a nomtooxiida Samari.

¹⁶Na jamaane faaga, o maad Ahas a xeɗa maad we Asuur ndax da ƈufgiidin.

¹⁷Ee-edoom we a ngarahina, a nqaw Yuuyudaa we soo a jeg waa da ƥisna took o hup doole.

¹⁸Fiifilista we a ndoka kam teeru ke no saax le a lanq fo no jegel ole no ɓemb-roog o ñamaak ole Yudaa. A njaɓa a Bet-Semes fa Ayalon fa Gederot fa Sooko fo caate ke ta waxooxna fa Timna fo caate ke ta waxooxna fa Gimso fo caate ke ta waxooxna soo a ngen a den.

¹⁹O Yaal oxe a neewanda Yuuyudaa we, yaam ne Ahas fee o maad Yudaa[18] a riñ’ina xeet fee no yapatil o Yaal oxe soo a gore’aƭar tigi no ten.

²⁰Tiglat-Pileseer fee o maad oxe Asuur a gara, a siiknoor fo ten, a fi’in o pañ, a fañin o dimle.

²¹Ahas kaa jang’u halal fee no Mbind ne no Yaal oxe fa fee no mbind no maad ne fa fee no kelfa ke, a ci’kin o maad oxe Asuur. Kaa koy, jegit’ee teen o ndimle leng.

²²Ke o maad Ahas a maad’ina o refaa na naqad fop oo yaqanee ta maad o gore’aƭaraa no Yaal oxe.

²³Ye Aa-araam we a nqawna a Ahas, a ɓoxota sadax roog ke Damaas yaam a lay ee: «Feek roog ke no maad we Araam kaa ƈufgiid maad den, xam ɓoxot a den sadax ndax da ƈufgiidaam!» Kaa koy, kaaga a ora no ten njom, a orin na Isra’el fop.

²⁴Ahas a fokata ƥaxañ ke no Mbind Roog ne fop, a duguñ a den, a weg begax ke no Mbind ne no Yaal oxe, soo a fi’an a xoox um xa sadaxand na xa lunq axe kam Yeerusaleem fop.

²⁵A fi’na a ñaang a sadaxand kam teeru ke Yudaa fop ndax ta doxanaa roog lakas ke cuuraay. Neene, a fuuxnoora o Yaal oxe Roog fee no daan um.

²⁶Ke xotitna no mberaandoong ne na pi ake Ahas fo ke ta fesoorna fop boo no muukandoong ne, kaa mbindel no «Safe le no maad we Yudaa fo we Isra’el».

²⁷Ahas a daba daan um soo a gasel na teeru fee Yeerusaleem. Kaa koy, geek’aand me no maad we Isra’el. O ƥeem Hiskiya a rondandaan.