Read NQAARIIT NE ROOG 2 Caloori ke 30 Bible Online

2 Caloori ke 30 - NQAARIIT NE ROOG bible

2 Caloori ke 30

¹Hiskiya a lulta kam Isra’el fop fo kam Yudaa. A binda itam Ee-efrayim we fo Maamanaase we xa leetar ndax da ngar no Mbind ne no Yaal oxe refna kam Yeerusaleem, a ndoofandan o Yaal oxe Roog fee Isra’el a Colandax ale.

²O maad oxe fo kelfa ke fo mbokatax naa fop kaa njeg’u o xet Yeerusaleem, ndax no nqool o ƭikandeer onqe da ndoofand a Colandax ale.

³O nanangaan koy, kaa mbaag’iran o ndoofand na waxtu um yaam saasadax mayu tedlandoox’afulee too xeet fee mbokatoor’ee Yeerusaleem.

⁴Kaaga a jofooxa o maad oxe fo mbokatax naa fop.

⁵A ngebooxa o mbi yegnit kam Isra’el fop, ke xotitna Beer-Seeba boo a damik Dan, ndax da ngar Yeerusaleem, a ndoofandan o Yaal oxe Roog fee Isra’el a Colandax ale, yaam jaaku ndoofandoogatiran, ne ta bindteena no kebil ke.

⁶We o maad oxe a lul’ina a ndeta kam Isra’el fa Yudaa fop, a ƥis xa leetar axe o maad oxe fo kelfa ke a mbind’ina yee: «Nuun Ii-isra’el we, nomtooxiidyo no Yaal oxe Roog fee Abraham fa Isaak fa Yakoob, ndax ta nomtooxiid me nuun, nuun yoqatin we ƥostoorna no ɓay no maad we Asuur:

⁷Ba nu nand fo daan nuun mbaat fo fog nuun we ngore’aƭar’ina no Yaal oxe Roog fee no daan den boo ta xaƴ a den da yaqel ne nu nga’oodtuuna.

⁸Ndiiki koy, ba nu saƭik a qoox nen daan nuun. Ndekyo a Roog xa ƥay, ngar no mbind tedu ne ten, ta tedlandna boo kili soo mbaɗoox o Yaal oxe Roog nuun, ndax fuux ɗomu le ten yenna took in a ɓoos.

⁹Nu nomtooxiidangaa me no Yaal oxe, xeƈa xan we ƥisna fog nuun took o hup doole a yirim a den soo a nqaƴ a den da nomtooxiid kam saax leeke, yaam o Yaal oxe Roog nuun a naaga o yirmaa too kaa may fo o paaxel. Nu nomtooxiidangaa no ten, xuunkee a nuun.»

¹⁰We lul’eena a ndeta kam teeru ke Efrayim fo ke Manaase boo no ke Sabulon, ndaa wiin we kaa njaloogu a den, a nqaadnooxaa a den.

¹¹Kaa koy, goor leng-leng na carind ale Aseer fo na le Manaase fo na le Sabulon a anddilooxa tooñ den soo a ngar Yeerusaleem.

¹²O Yaal oxe a duqa a qeeñ ake na xeet fee kam Yudaa itam soo da njaɓ ke o maad oxe fo kelfa ke a ngeblitna too ta inoor no Yaal oxe.

¹³Faan no wiin a mbokatoora Yeerusaleem no nqool o ƭikandeer onqe no hiid ole ndax da ndoofand Xew fee no puuru canja’e ke. Kaaga a reeƭa mbokatax maak.

¹⁴A ndalfooxa o yaq xa sadaxand axe no pangool ke ndeeƭna kam Yeerusaleem soo a yaq itam xa sadaxand cuuraay axe fop, a ndeɓ a den kam a yulanq alaa Kederon.

¹⁵Fo mbaal ne na Colandax ale a nqirse no ñaal xarɓaxay fo ñaal nahkandeer naa. Saasadax we fo Leelewi we sed’atna a tedlandooxa ndax da mbaag o ƥisiid sadax no Mbind ne no Yaal oxe.

¹⁶A njangatina o far den ne ta dalniteena, a reefandel no kebil ke Moyiis fee o kiin Roog oxe, soo saasadax we a mbiisaa fo’oy le Leelewi we a cooxoogna a den.

¹⁷Ne andoona koy ee a jeg’a wiin mayu waa tedlandooxeerna kam mbokatax naa, Leelewi we a nqirsana a den fop fo mbaal den ne na Colandax ale ndax ta kesanel o Yaal oxe.

¹⁸Mayu na xeet faa, moƴtaa sax no we Efrayim fo no we Manaase fo no we Isakaar fo no we Sabulon tedlandoox’ee. A ñaama fo mbaal ne na Colandax ale too ndeefee ke bind’eena. Ten taxu Hiskiya a xeɗan a den ee: «Kam o paaxel um, yaasam o Yaal oxe a waasan

¹⁹fop we mbosooxna na qeeñ den o mbaaƭ o Yaal oxe Roog fee no daan den too ndaaw’afulee o tedlandoox.»

²⁰O Yaal oxe a jaɓa a qeƭ ale Hiskiya soo a waasan xeet faa.

²¹Neene, Ii-isra’el we ndeeƭna Yeerusaleem a ndoofanda Xew fee no puuru canja’e ke boo ñaal ɓetuu ƭik fo o ɗaay o maak. Bes fuu refna, Leelewi we fo saasadax we kaa simatoogu o Yaal oxe, a njibnaa pakir ke den fa doole.

²²Hiskiya a saƭakina Leelewi we fop nqaƴ’ina a yiif den no Yaal oxe. A ñaamooga cegel ke boo ñaal ɓetuu ƭik, a ƥoxotaa sadax camsa’oor soo a simataa o Yaal oxe Roog fee no daan den.

²³Mbokatax naa fop a nqalaata o ndoofand ñaal ɓetuu ƭik lakas soo da ndalfoox o ndoofand a den fo o ɗaay.

²⁴Hiskiya fee o maad Yudaa a coox’a mbokatax naa qoox juni fo paal cuni ɓetuu ƭik, kelfa ke a cooxit qoox juni fo paal cuni xarɓaxay. Saasadax mayu koy a tedlandoox’a.

²⁵Mbokatax ne Yudaa fop fo saasadax we fo Leelewi we fa xeet fee fop inoor’ina no saax le Isra’el fo xa kataakon axe inoorna kam Isra’el mbaat we ndalna Yudaa a njega o ɗaay.

²⁶O ɗaay o maak a jega kam Yeerusaleem. No kaa xotitna na jamaane Salomo fee o ƥiy Dawid fee o maad Isra’el boo fa ndiik, kaa nandna neene mosee o jeg kam Yeerusaleem.

²⁷Saasadax we ndefna Leelewi we a inooxa soo a mbarke xeet faa. O ñuxur den a nannooxa, a qeƭ den a ret boo no Ngenand tedu ne no Yaal oxe na asamaan.