Read NQAARIIT NE ROOG 2 Caloori ke 32 Bible Online

2 Caloori ke 32 - NQAARIIT NE ROOG bible

2 Caloori ke 32

¹A cinj ye Hiskiya a lalitna ngor no Yaal oxe, Sanxerib fee o maad oxe Asuur a songa maat ne Yudaa. A wida teeru cegu saŋe ke o kurul-keƥ ndax ta jaɓ a den.

²Ye Hiskiya a ga’na yee Sanxerib a gara too kaa yuuɓaa o songiid a Yeerusaleem,

³a ga’ra fo kelfa ke fo a salma-koor ake ndax da sux a cur poofi ke ndeeƭna tafil teeru faa.

⁴Faan no wiin a mbokatoora, a sux a cur ake fop fo a ƈufnand ale xayoogna a ndeer o jegel ole. Kaa da lay’u yee: «Maad we no Aa-asuur we mbaree o mbadiid, a soƥ meen foofi fo deyu.»

⁵Hiskiya a saqa njambaar, a maxatin saŋe ne jeg’ina xa kur, soo a yoɗ teen taax-took ke. A maxa itam taax-took ne kam Milo na ƥak ale Dawid tafil saŋe ne soo a jalin a salma fo pegoor mayu.

⁶A dalna aa-adax no xiixire a ndeer xeet faa, a fokat a den paam um na baayo fee no don-maax ole na teeru fee. A saƭakinta a den xa ƭelem axene yee:

⁷«Saƭakinooxyo too saq njambaar, ba nu saɗar too ba nu ndiid mbaambir no maad oxe Asuur fo mbaambir faan le yoonna fo ten, yaam oxe refna fa in hupu oxe refna fo ten.

⁸Ten koy, doole no kiin soom a yaakaaru, in o mat o Yaal oxe Roog in na dimle’kaa a in, a damit a in na ñoq ale.» Fa lay faaga na Hiskiya fee o maad Yudaa a saƭakina xeet faa.

⁹Cinj kaaga, Sanxerib fee o maad oxe Asuur a lula parɓa ke ten Yeerusaleem, a soƥ ta wid teeru fee Lakiis o kurul-keƥ, ten fo a yaj ake ten fop. A luliida a den me Hiskiya fee o maad Yudaa fo me no wiin we Yudaa fop ndeeƭna Yeerusaleem ee:

¹⁰«Sanxerib fee o maad oxe Asuur kaa tee: ‹Na xar nu ndoonu a koolax nuun boo a tax nu yoq neeke kam Yeerusaleem fa naqad?

¹¹Hiskiya kaa naxtaa a nuun ee o Yaal oxe Roog nuun xan a wat a nuun no ɓay no maad oxe Asuur. Ndax nu nga’ee yee kaa bug o warnoorit a nuun nqeex fo a koɗom?

¹²Mee ndax Hiskiya fa xoox um moocandu a ñaang a sadaxand ake fo xa sadaxand axe no Yaal oxe soo a lay wiin we Yeerusaleem fo Yuuyudaa lakas we fop ee mbaambir o sadaxand o leng soom nu mbugko ngungaa, ndoxaa teen cuuraay.

¹³Ndax kaa nu yegee ke i mbi’na qeet ke na saax a lakas ake, mi fo daan es? No ndigil roog ke na saax akeene mbaag’ee o mucil a saax den no ɓay es.

¹⁴A ndeer roog ke no qeet keene fop daan es a nduguñna, fum na den waag’u o mucil xeet um no ɓay es boo Roog nuun a waagkaa o mucil a nuun no ɓay es?

¹⁵Yaaga boog, ba nu nqaƴ a Hiskiya ta maaɓaa a nuun, a naxaa a nuun too ba nu ngimin. Fum no roog ke no qeet ke mbaat no maat ke waag’u o mucil xeet um no ɓay es mbaat na xa ƥay no daan es? Nam roog ke nuun boog a mbaagkaa o muclit a nuun no ɓay es?› »

¹⁶Parɓa ke o maad oxe Asuur a lul’ina a ndefa no layahinaa paaxeer took o Yaal oxe Roog fo took Hiskiya fee o tag um.

¹⁷O maad oxe Asuur kaa bind’u o leetar itam ndax ta wen o Yaal oxe Roog fee Isra’el. Kaa lay’u teen ee: «Roog ke no qeet lakas ke no lanq ke mbaag’ee o mucil qeet den no ɓay es, nam boog roog ke Hiskiya a mbaagkaa o muclit xeet um no ɓay es?»

¹⁸We Sanxerib a lul’ina kaa mbalalooxoogu a maak na lak fee Yudaa, ndax da saɗarnoor soo a ndiidland xeet fee Yeerusaleem ndeeƭna took saŋe naa fo itam ndax da njaɓit neene teeru fee.

¹⁹A layooga na Roog fee Yeerusaleem ne da layoogna no roog ke no qeet lakas ke no lanq ke ndefna kaa o ɓay no kiin a jalna.

²⁰O maad Hiskiya fo o tuleer Esayi fee o ƥiy Amoc a nqeɗa a Roog, a ƈufginooxin a maak.

²¹Maaga, o Yaal oxe a hebliida malaaka ta saŋik xir say we fo aa-adax we no xiixire we fo kelfa ke kam saŋe ne no maad oxe Asuur. A dalfooxa o nomtoox no saax um, a naag ɓot yaam gaci. A roka kam mbind ne na roog fee ten soo xa ƥeem a ngar a mbartin laƥ.

²²Neene, o Yaal oxe a mucla a Hiskiya fo we ngenna Yeerusaleem fop no ɓay Sanxerib fee o maad oxe Asuur fo na xa ƥay no fañ den fop, soo a ci a den jam[19] o saax oo saax.

²³Wiin mayu a ƥisiidooga o Yaal oxe sadax kam Yeerusaleem, a ƥisiidaa a Hiskiya fee o maad Yudaa ci’it itam. No kaa xotitna maaga, a niw’e a paax a ndeer no qeet ke mbidna a den.

²⁴Na jamaane faaga, Hiskiya a jira boo a ref ndeer xon fo ñoow. A xeɗa o Yaal oxe soo ta jaaɓin, a cooxin o anddiloor.

²⁵Kaa koy, Hiskiya anddilooxee paax ke ta fi’aneena, ndax a magnandooxaa. O Yaal oxe a fuuxanaan, a fuuxan a Yeerusaleem fo maat ne Yudaa.

²⁶Hiskiya fo wiin we Yeerusaleem a anddilooxa tooñ den. Ten taxu fuux le no Yaal oxe biltooxanee a den no ñoow Hiskiya.

²⁷Hiskiya a jeg’a halal fa mayu fo o ndam. A jalna a kamba kaa ta yipaa xaaliis fa wurus fo a ƥil a cafeñu fo qeeñe-xeeñe fo pegoor fo ƥaxañ cegu njiriiñ kuu ndefna.

²⁸A maxa taga kaa ta geeraa bele fo fo ndok naa ta geekaa biiñ fa nqas fee fa diwliin fee, cegel ke fop, o xos oo xos ta maxanin o fe’and soo xa siir axe ta ɗingand a den.

²⁹A maxana a xoox um sax teeru, a jeg a ked fo xa siir xa mayu, yaam Roog kaa ci’’un halal bo ta dey.

³⁰Hiskiya suxu itam a cur took ale Giihon, a ɓakandin a lanq farna fo mudand ne na ƥak ale Dawid. Kuu Hiskiya a jeem’ina ta ñaaƴ.

³¹Kaa koy, no kaa farna no we kelfa ke Babilon a luliid’ina me ten ndax da laamit paru no anddiloor ole jeg’ina no saax leene, Roog a xaƴa a Hiskiya ndax ta ɗeetlooxin boo a and fop ke refna no xeeñ um.

³²Ke yoqna na pi ake Hiskiya fo ngor ne ten kaa mbindel no mbeeñil ne no tuleer Esayi fee o ƥiy Amoc fo kam «Safe le no maad we Yudaa fo we Isra’el».

³³Hiskiya a daba daan um soo a gasel paam a ƭat ale jofna no poy ke na xa taan axe Dawid. A koom, we ngenna Yeerusaleem fo Yuuyudaa lakas we fop a simata o ndam um. O ƥeem Manaase a rondandaan no maat naa.